Loma 12:3 - Livulu lya Shukulu Kalunga

³ Omwo vwana njinatambula vwa mema ku mbunge a Njambi njilinakwendeka kuli yeni voshe ngwange, kesi muliyongole yeni vavenya kupwa muvakama manene kutuvakana omu mumunapu. Oloni, munapande kulikeesa mu viyongola vyeni, liiluleni yeni vavenya ngwe kukukulaela kweni kuje kwanamyana Njambi.

Loma 12:3 Iomraidhean Croise

Visimo 25:27

Kesi mwamuvwa kulya vuki vwavungi, mwamuvi lalo ku vanu kulishakezekela vulemu vakevo vavenya.

Visimo 26:12

Cilema natuvakana munu uje aliyongola ikeye vavenya ngeci napu muka-mana kuma kesi nao.

Muka-kwambulula 7:16

Ngecivene, kesi upwe u muka-vushunga manene, nambe kupwa u muka-kunyanyama manene, omwo vikajo ulinyongesela yove vavenya?

Mika 6:8

Embwe, Shukulu Kalunga natuleke vije vyavivwa vyashaka kuli yeni vikevyo evi, kulinga vije vya vushunga nakumwesa cizemo cije kucesi kutenguluka nakuyoya mu kulitombola na kulikeesa kuli Njambi yeni.

Luka 18:11

KaFaliseo wemanene kwendi lika nakulombela ngwendi, ‘Njikukandelela Njambi, yange kunjafwile ngwe vakwetu voshe valukolotelo, vaka-kujeneka vushunga, vaka-vupangala. Njikukandelela ngeci yange kunjafwile ngwe uje muka-kutambula lisimu nemana kuje.

Yowano 3:34

Omwo woshe uje yanatumu Njambi endeka majwi a Njambi, omwo Njambi namwana Munzinzime Wakujela muvungi.

Loma 1:5

Muli ikeye Njambi wanjanene vije vyanjipande mukupwa muluwa omwo ali Kilistu, mukutwamenena miyati yoshe kukukulaela nakukwononoka.

Loma 11:20

Eci cinapu ca vushunga. Vavajokweleko omwo kuvakulaelele, oloni yeni munatumbama mu mwela weni omwo munakulaela. Oloni kesi mulyalese a viyongola evi, munapande kuziva lyova.

Loma 11:25

Kuli vushunga vwakushwekesa, vakwetu, vuje vunjishaka ngeci muvuzivuke, omwo vukamivindika kuyongola ngweni munapu vakunyanyama. Oku kukaluwa kwa vimbunge vya vanu va Isalele kesi ngwe kwa myaka yoshe embwe, oloni kukakalako lika noo vaje kesi vaYunda vanapumo kwija kuli Njambi.

Loma 12:16

Yoyeni mulizivasano umo na mukwavo. Kesi mulyalese, oloni likeeseni mu vipangi. Kesi muliyongole yeni vavenya ngwe munapu vaka-kunyanyama.

1 Kolinte 15:10

Oloni a kutetela kwa Njambi njinapu muje munjinapu, co kutetela kuje wanjanene kucapwile cangoco. Oloni mu ngila ikwavo, njinaundangana manene kutuvakana miluwa voshe, nameme eci kucapwile cipangi cange vavenya, oloni capwile kutetela kwa Njambi cije cakele nakupanga nange.

1 Kolinte 3:10

Akupangesa vwana vuje vwanjanene Njambi, njalingile vipangi vya muka-kutunga wa vutongwe nakujala luvula, co munu weka lalo alinakutungilao. Oloni munu na munu napande kunyanyama omo alinakutungila a luvula luje.

1 Kolinte 7:17

Ngwe omo Mwene naana vwana ku munu na munu mukemwo mwanavasanena ngeci vendelemo. Eli likelyo lishiko linjikalongesa mu vikungulukilo vyoshe.

2 Kolinte 10:13

Nameme ngoco, ali yetu, kulyalesa kwetu kesi ngwe ciya a seteko eyi embwe, kulyalesa kwetu casikisila a seteko ngwe a vipangi vya Njambi vije vivanatwana, kuwezelela ku vipangi vyetu akati keni.

2 Kolinte 12:13

Cuma mukajo camyonwesele kutuvakana vikungulukilo vyeka? Kuvanga lika yange kunjashakele kumiyandesa nakutonda vyakulikwasa navyo kuli yeni. Vakwetu njisambeseni a cuma cakufwa ngacije!

2 Kolinte 12:7

Oloni mukunjinyunga kutewa njilyalesa omwo vyuma vije vyakukomokesa vinjamwene, co vanjanene mushongo wa lulanga mu muvila, uje wakele nakupanga ngwe muluwa wa Satana mukunjisindakana nakunjinyunga kutewa njilyalesa.

Ngalatiya 6:3

Nga munu umo ayongola ngeci napu wakama oloni kesi mukemwo mwanapu, alinakulikwisa lika ikeye vavenya.

Efeso 3:2

Mwa vushunga vene yeni mwaziva ngeci Njambi mu kutetela kwendi nanjana vipangi evi ngeci njimikwase.

Efeso 3:4

co nga mukalava vije vinjasoneka mwasa kulilongesa nakuzivuka visin̄iko vya Kilistu.)

Efeso 4:16

Ali ikeye vilyo vyoshe vya muvila vilinungakana amolika, co muvila woshe vanautungu amo mu manunga oshe ngwe kuseteko yawo. Ngecivene, omo cilyo cimo na cimo cipanga ngwe ku vipangi vyaco, co muvila woshe wamutunu ulinakukola, co ulinakulitunga ukewo vavenya mu cizemo.

Filipu 2:13

omwo simbu yoshe Njambi alinakupanga muli yeni ngeci mukale na cizango, co ngeci mwase kwononoka vutumbe vwendi vavenya.

Kolose 1:29

Akupanga evi njiwundangana nakulwa nakupangesa nzili yoshe ije yalinakunjana Kilistu, co ilinakupanga muli yange.

Kolose 2:13

A simbu imo mwatsile ku munzinzime omwo a vuvi vweni, omwo mwapwile vaje kesi vaYunda vakujeneka Lishiko. Oloni ololo Njambi naminena ku mwonyo muli Kilistu. Njambi watusambesele vivi vyetu vyoshe,

1 Timateo 1:14

Co Mwene yetu wetilile ngozi yendi yakama ali yange nakunjana kukulaela na cizemo vije vinapu vyetu muli Kilistu Yesu.

1 Timateo 2:15

Oloni munakazi vakamwamena akukita vana, nga akakateya mukukulaela na mu cizemo na mukujela na kasingimiko.

1 Timateo 2:9

Co njishaka lalo vanakazi vapwe vaka-kumwesa kulikeesa na mana avo a vuzalo vwavo, co vanapande kuzala mwamuvwa, kesi na vin̄ambu vyakuvinda mweka na mweka, nambe na ngolinde nambe yavuvwa vweka, nambe na makwalale akuvwaa manene, nambe na vinanga vyandando yakama,

Tito 2:12

Kutetela oku kulinakutulongesa kuvyana yoyesi yakujeneka kulemesa Njambi na mashungu amavi, nakuyoya yoyesi yakulemesa Njambi ano a kaye mukulinyunga na mukushungama,

Tito 2:2

Longesa vakulunu ngeci vapwe vaka-kulikongomeka, vaka-mana, vaka-kulinyunga vakevo vavenya, vaka-kushungama mukukulaela kwavo, mu cizemo, na mu lukakateya.

Tito 2:4

ngeci valongese vambanda kuzema vanalume vavo, na vana vavo,

Tito 2:6

Mu ngila eyi vene, sindiya vakwenje lalo ngeci valinyunge vakevo vavenya.

Yakomba 4:6

Oloni kutetela kwa Njambi kwanatwana kwapwa kwa nzili manene. Ngwe muvyendeka visoneka ngwavyo, “Njambi avyana vaka-kulyalesa, oloni atetela vaka-kulikeesa.”

1 Petulu 1:13

Ngecivene, livwaeseleni cimweja mu viyongola vyeni. Kengeleleni, co akeni cinyangavili ceni a vivezikiso vije vivakamyana omo Yesu Kilistu akasholoka.

1 Petulu 4:11

Voshe vaje vambulula vanapande kwambulula lijwi lya Njambi, voshe vaje vapanga vanapande kupanga na nzili ije yanavana Njambi, ngeci mu vyuma vyoshe Njambi vamushangazale ali Yesu Kilistu, kuli ikeye kwakundama vumpau na nzili ku myaka yoshe. Ewa.

1 Petulu 4:7

Kukotoka kwa vyuma vyoshe kuli muyehi. Munapande kulinyunga nakukengelela, ngeci mwase kulombela.

1 Petulu 5:5

Mu cifwa cimo vene, yeni vakwenje munapande kwononoka kuli vakulunu. Co yeni voshe pweni vaka-kulikeesa, mukupangela umo na mukwavo, omwo visoneka vyendeka ngwavyo, “Njambi akavyana vaka-kulyalesa, oloni akamwesa kutetela kuli vaka-kulikeesa.”

1 Petulu 5:8

Kesi mupende, pweni vaka-kukengelela! Citozi ceni Liyavola alinakwendangana nakwaana ngwe ndumba, ashakezeka umo ngeci amusanyozole.

3 Yowano 1:9

Njasonekele mukanda wa majwi amandondo ku cikungulukilo, oloni Ndiyotelefese, uje wazema ngeci apwe ntwama yavo, kesi kumbako mbunge ku vije njekendeka.