Kolose 1:10 - Livulu lya Shukulu Kalunga

¹⁰ Asinoni mukasa kuyoya ngwe ku cizango ca Mwene, co simbu yoshe mukasa kulinga vije vimuvwaelelesa. Kuyoya kweni kukaima vushuka vwavungi manene vwa miyati yoshe ya vipangi vyavivwa, co mukakola mu mana eni akuzivuka Njambi.

Kolose 1:10 Iomraidhean Croise

Visimo 16:7

Omo uvwaelelesa Shukulu Kalunga, nameme vitozi vove vapwa vasamba.

Isaya 53:11

Omo nayoyo mu tuyando, co akajolela lalo, ikeye akazivuka ngeci kayandele ngoco embwe. Ngamba yange wa kulongwa, muli ikeye njilinakuvwaelela, ikeye akambata cihiso ca vanu vavangi, omwo njikavasambesela ali ikeye.

Ndanyele 12:4

Co wendekele kuli yange ngwendi, “Ololo, Ndanyele zenga lipapelo nakwakao cisateso noo simbu ya kaye ikahwa. A simbu ije, vanu vavangi vakaya noku-noku mukweseka kuzivisisa vije vilinakulingiwa.”

Mika 4:5

Muyati woshe wa vanu valemesa nakwononoka njambi yavo wa kamponya, oloni yetu tukalemesa nakwononoka Shukulu Kalunga Njambi yetu ku myaka yoshe.

Hambakuke 2:14

Oloni kaye kakashula na mana a vumpau vwa Shukulu Kalunga ngwe mema a kalunga mwakajalela.

Yowano 15:16

Kesi yeni mwanjangwile embwe, oloni yange njamyangwile nakumituma ngeci muye nakwima vushuka vwavungi, vushuka vuje vwa ku myaka yoshe. Ngecivene, cuma coshe mukalomba kuli Tate mu lizina lyange ikeye akamyanaco.

Yowano 15:8

Vumpau vwa Tate vusholoka nga mwima vushuka vwavungi, co mu ngila eyi vene mupwa vandongisi vange.

Yowano 17:3

Co mwonyo wa myaka yoshe ukewo ou, ngeci vakuzivuke yove Njambi umolika wa vushunga, co nakuzivuka Yesu Kilistu, uje iwatumine.

Loma 1:13

Vakwetu, munapande kwanuka ngweni visimbu vyavingi njakele na vutumbe vwakwija oko nakumisikamesa, oloni kuli cuma cimo cinanjivindika. Njishaka kukoka vanu akati keni, ngwe munjinalingi akati ka vaje kesi vaYunda.

Loma 4:12

Co ikeye lalo napu ishe ya voshe vaje vanatuuka, eci cikeco, kuli vaje, kuwezelelako kutuuka, vayoya yoyesi yakukulaela ije yayoyele tatetu Avilahama simbu kanda vamutuule.

Loma 6:4

Ngecivene, akutumbwitika, vatutsindile amo nendi na kutsa amo nendi, ngeci, ngwe omo Kilistu vamusangwile ku vatsi na vumpau vwa Ishe, ngeci netu tunapande kuyoyela mu mwonyo wauha.

2 Kolinte 2:14

Oloni kukandelela kuli Njambi! Omwo muli Kilistu simbu yoshe ikeye natutwamenena ngwe mbunga ya vinzinda vaka-kuhyana muli Kilistu. Njambi akatupangesa mukulingisa Kilistu ashandoke ngwe lwengo lwaluvwa lwakumuzivuka kwoshe-ikwoshe.

2 Kolinte 4:6

Njambi uje wendekele ngwendi, “Mu lisusulungu mukatwa ceke!” Ikeye Njambi uje vene umolika watwisile ceke mu vimbunge vyetu, mukututwisila ceke ca vumpau vwa Njambi vuje vunatu mu cihanga ca Kilistu.

2 Kolinte 5:9

Kutuvakana manene vene, nameme ngoco, tushaka kumuvwaelelesa ikeye, nambe mu njuvo yetu kuno nambe kuje.

2 Kolinte 9:8

Co Njambi akasa kumyana kutuvakana ngwe kukujeneka kweni, ngeci mukakale navyo vyavingi ngwe kukujeneka kweni, nakukala lalo na vyavingi vyakupwisa a vuvwa vwoshe.

Efeso 1:17

nakwihula Njambi ya Mwene yetu Yesu Kilistu, Ishe ya vumpau, amyane munzinzime wa mana nakusholola Njambi kuli yeni, ngeci mumuzivuke.

Efeso 2:10

Njambi natupwisa muje mutunafu, co akukala kwetu muli Kilistu Yesu watutangelele mwonyo wa vipangi vyavivwa, vije watuvwaeselelevyo laja ngeci tuvilinge.

Efeso 4:1

Ngecivene, njilinakumisindiya, yange njinapu cinzinda omwo kupangela Mwene ngwange, yoyeleni a mwonyo uje unaliseteka na seteko ije yanamyakela Njambi omo wamisanene.

Efeso 4:13

Ngecivene, yetu voshe tukapwa vamolika mukukulaela kumolika na mukuzivuka kwetu kwa Muna Njambi, tukapwa vanu vakukola nakweta ku seteko ije ya ciseteko cakushula ca Kilistu.

Efeso 5:10

Esekeni kulilongesa vije vivwaelelesa Mwene.

Efeso 5:15

Ngecivene, nyanyameni mumuli nakuyoya. Kesi muyoye ngwe vaka-kwonwa mana, oloni ngwe vaka-mana.

Efeso 5:2

Endeni mu cizemo ngwe Kilistu mwatuzemene, co wanene mwonyo wendi kuli yetu ngwe mulambu wa lwengo lwaluvwa na n̄ombelo ije ivwaelelesa Njambi.

Filipu 1:11

Kuyoya kweni kupwe kwakushula na vushunga vwavuvwa vyuma vije Yesu Kilistu lika asa kusholola, ku vumpau nakushangazala kwa Njambi.

Filipu 1:27

Ngecivene, cuma cakama manene eci, myonyo yeni iyoye ngwe muushaka muzimbu wauvwa wa Kilistu, ngeci nambe njasa kwija nakumimona nambe embwe, njakuziva ngeci munemana mbe a vutumbe vuno, co na cizango cimolika mulinakulwa amolika akukulaela a muzimbu wauvwa.

Filipu 4:18

Ngecivene, njilinakutuma vukaleo vwa vyuma vyoshe vije mwatumine kuli yange, vikevyo vyajawisa kujeneka kwange kwoshe! Ololo njili nevi vyoshe njishaka omwo Epafolonditu nanjinenela vwana vweni vwoshe. Vukevwo vunapu ngwe mulambu wakunika lwengo lwaluvwa kuli Njambi, n̄ombelo ije yatambula nakumuvwaelelesa ikeye.

Kolose 2:19

co vanalikela kukakateya kuli Kilistu, uje napu mutwe wa muvila. Ali Kilistu muvila woshe vanaulisa nakuukwatesa amolika omwo a manunga na mishisha, co ulinakukola ngwe muje Njambi ashaka ngeci ukolelemo.

Kolose 2:6

Ngwe omo munatambula Kilistu Yesu kupwa Mwene, co yoyeni muli ikeye.

Kolose 3:20

Vanike, ononokeni kuli visemi veni, omwo eci cikeco cikavwaelelesa Njambi.

Kolose 4:5

Pweni vakunyanyama mu ngila ije mulinakulinga kuli vaje kanda vakulaele, kupangesa simbu yoshe ije mulinavyo.

1 Tesalonika 2:12

Twamitakamesele, twamizembelekele, twamisindiiye kuyoya yoyesi ije ivwaelelesa Njambi, uje alinakumisana ngeci mulipangele amo Vumwene vwendi vavenya na vumpau.

1 Tesalonika 4:1

Mukumanesela, vasamba vetu, mwalilongesele kuli yetu vati munapande kuyoya ngeci muvwaelelese Njambi. Mwa vushunga vene, omu mukemwo mumunakala nakuyoya. Co ololo tumilomba nakumisindiya mu lizina lya Mwene Yesu ngwetu muwezeleleko manene.

2 Timateo 2:4

Lishwalale naumo wai asa kulinga nevi nevi mu vipangi vyendi vya vushwalale, omwo viyongola vyendi vinapu kushaka kuvwaelelesa uje ntwama yendi.

Tito 3:1

Anukisa vanu vove vapwe vaka-kulikeesa kuli vaka-kushwana na vaje vali na moko yakushwana, ngeci vavononoke, nakulivwaesela mukulinga mwamuvwa mu vyuma vyoshe.

Tito 3:14

Vanu vetu vanapande kulilongesa kukala na simbu yakulinga vipangi vyavivwa, ngeci kesi vajeneke cuma cimo, co kuvapandele kuyoya mu vyuma vyangoco-ngoco.

VaHevelu 11:5

Akukulaela, Inoke kamwene kutsa. A ngila ije vene, vamutwalele kwilu kuli Njambi, co naumo wai wamuwanene, omwo Njambi wamutwalele kwilu. Omwo visoneka vyendeka ngwavyo omo Inoke kanda vamutwale mwilu wavwaelelesele Njambi.

VaHevelu 13:16

Kesi mwivale kulinga mwamuvwa nakulikwasa umo na mukwavo, omwo evi vikevyo n̄ombelo vivwaelelesa Njambi.

VaHevelu 13:21

amyane vyuma vyoshe vyavivwa vije munajeneka ngeci mulinge cizango cendi, ngeci apange muli yeni vije vimuvwaelelesa ali Yesu Kilistu. Co kuli ikeye kukale vumpau ku myaka na myaka! Ewa.

2 Petulu 1:8

Evi vikevyo vyuma munapande kukala navyo, co nga mulinavyo mu vungi, vikevyo vikamilingisa kupwa vaka-kupanga na vaka-kwima vushuka mu mana eni ali Mwene yetu Yesu Kilistu.

2 Petulu 3:18

Oloni kakateyeni nakukola mu kutetela na mu mana vya Mwene yetu na Muyoyesi wetu Yesu Kilistu. Kuli ikeye kukale vumpau, ololo na ku myaka yoshe! Ewa.

1 Yowano 3:22

Tukatambula kuli ikeye cuma coshe tumulomba, omwo tukononoka mashiko endi nakulinga vije vimuvwaelelesa.

1 Yowano 5:20

Twazivuka ngwetu Muna Njambi naija, co natwana kuzivisisa ngeci tuzivuke Njambi wa vushunga. Tulinakuyoyela muli Njambi wa vushunga, muli Munendi Yesu Kilistu. Ou ikeye Njambi wa vushunga, co ou ukewo mwonyo wa myaka yoshe.

3 Yowano 1:6

Vanambulula vya cizemo cove ku cikungulukilo cili kuno. Vakwase ngeci vatwaleleleo a vungenzi vwavo mu ngila ije ivwaelelesa Njambi.