Isaya 51:16 - Livulu lya Shukulu Kalunga

¹⁶ Njajangumwine melu nakujala luvula lwa asi, njendeka kuli Yelusalema ngwange, ‘Yeni munapu vanu vange! Njamyana mashiko, co njikunyunga na livoko lyange.’ ”

Isaya 51:16 Iomraidhean Croise

Myaso 75:3

Nambe asi na vyoshe vije vyakalao vijaja, oloni yange njikakolesa luvula lwa asi mbe.

Myaso 91:4

Ikeye akakufwika mu mambava endi, nakukunyunga mwamuvwa, vushunga vwendi vukakwamena nakukunyunga.

Myaso 92:13

Vanalifu na miti yakukuna mu Njuvo ya Shukulu Kalunga Njambi, ije ilinakukula mwamuvwa, mu Njuvo yetu ya Shukulu Kalunga,

Kutuuka 33:22

Omo ceke ca vumpau vwange cikaita, co yange njikakwaka mu mwanzi wa limanya, co njikakufwika livoko lyange noo yange njineti.

Kutuuka 4:15

Ukendeka nendi nakumuleka evi vyanapande kwendeka. Co njikamikwasa muvuvali vweni akwendeka, njikamileka muvuvali vweni vimukalinga.

Isaya 45:18

Shukulu Kalunga ikeye watangele melu, ikeye lika Njambi! Ikeye wamungile nakutanga kaye, wakolesele kaye mbe, nakukala ku myaka yoshe. Katangele kaye ngeci kapwe ngwe mambo embwe, oloni apwe akuyoyela vanu. Ikeye nendeka ngwendi, “Yange njapwa Kalunga, kukwesi njambi weka lalo.

Isaya 48:13

Njatangele kaye na mavoko ange, nakujangumuna lilu. Lilu na kaye vyononoka kushika kwange kwoshe.

Isaya 49:2

Ikeye walingisile majwi ange kuvambuka ngwe moko ya mukwale, nambe ngwe mukili wakushongomoka, wakukalwila cimweja. Wanjinyungile mwamuvwa na livoko lyendi.

Isaya 49:8

Shukulu Kalunga alinakwendeka kuli vanu vendi ngwendi, “Omo simbu yakumyamena yeta, njikakumbulula malombelo eni nakumimwesa ngozi yange, njikamikongweya nakuminyunga, co muli yeni njikalinga cikumiiyo na vanu voshe. Co njikamitava mutunge lalo mu lifuti lyeni lije ololo linapu ngundu.

Isaya 50:4

Shukulu Kalunga wa Akamwa ya Vyoshe nanjilongesa vije vyakwendeka, ngeci njase kutakamesa vaje vanajuka. A mutondo na mutondo akanjiindula ngeci njizive vije vyanjilongesa.

Isaya 57:19

Njikana kwoloka kuli voshe vaje vali muyehi na vaje vali kulyala! Njikakangwisa vanu vange.

Isaya 59:21

Njilinakulikumiiya cikumiiyo neni, njinamyana Munzinzime wange na vilongesa vyange kupwa vyeni ku myaka yoshe, co kutunda lelo nakutwala kulutwe, munapande kunjononoka nakulongesa vana veni, na vatekulwila veni kunjononoka visimbu vyoshe vikaija kulutwe.”

Isaya 60:21

Vanu vove voshe vakapwa vaka-vushunga, vakashwana lifuti ku myaka yoshe. Njavakunine, nakuvatanga, ngeci vasholole vukama vwange ku vanu voshe.

Isaya 61:3

nakwana kuli vaje valinakulila mu Siyone kuvwaelela nakujolela. Mwaso wakushangazala ukakalako kwinga mu mwaso wa vusiwa. Vakafwa ngwe miti ije yanakunu vavenya Shukulu Kalunga. Voshe vakalinga vya vushunga, co vakashangazala Njambi a vije vyanalingi.

Isaya 65:17

Shukulu Kalunga alinakwendeka ngwendi, “Njitanga kaye kakaha na melu amaha. Vyuma vyalaja vikahwa, co vakavivala.

Isaya 66:22

“Ngwe kaye kakaha na melu amaha vikeshwala simbu yakama, ngecivene, vatekulwila vove na lizina lyove vikeshwala.

Njelemiya 1:9

Asinoni Shukulu Kalunga wolwele livoko lyendi, co wakwatele a kanwa kange, wendekele kuli yange ngwendi, “Njilinakukwana majwi aje aunapande kwendeka.

Njelemiya 24:7

Co njikavana mbunge yakuzivuka ngeci yange njapwa Kalunga. Asinoni vakapwa vanu vange, co yange njikapwa Njambi yavo, omwo vakelukila kuli yange na mbunge yavo yoshe.

Njelemiya 31:33

Cikumiiyo caciha cije njikalikumiiya na vanu va Isalele cikapwa eci, njikaka lishiko lyange muli vakevo, nakulisoneka mu vimbunge vyavo. Yange njikapwa Njambi yavo, navo vakapwa vanu vange.

Njelemiya 32:38

Co vakapwa vanu vange, nange lalo njikapwa Njambi yavo.

Zakaliya 13:9

Co njikelula litambelo lyamucitatu vaje vakasalao nakulijelesa ngwe muvakajelesa siliva na tuhya. Co njikavelula ngwe muvakelula ngolinde. Asinoni vakalombela kuli yange, co njikavakumbulula. Njikavaleka ngwange vanapu vanu vange, co vakalitavela ngeci yange njinapu Njambi yavo.”

Zakaliya 8:8

njikavatundisa mu ngangela na mu kangombe ka yambi ngeci vakukale mu Yelusalema. Vakevo vakapwa vanu vange, nange lalo njikapwa Njambi yavo, njikavashwana na kulongwa na vushunga.

Yowano 17:8

Omwo njavanene muzimbu uje uwanjanene, co vanautambula, co vanazivuka ngeci mwa vushunga yange njatundile kuli yove, co vanakulaela ngeci yove wanjitumine.

Yowano 3:34

Omwo woshe uje yanatumu Njambi endeka majwi a Njambi, omwo Njambi namwana Munzinzime Wakujela muvungi.

Kwituluka mu Mashiko 18:18

Njikavatumina muka-kwimanena wakufwa ngwe yove wakutunda akati kavo vene. Co njikamuleka evi akendeka, co ikeye akaleka vanu vyuma vyoshe vinjikamushika.

Kwituluka mu Mashiko 33:27

Njambi simbu yoshe wapwa cimpaka ceni, simbu yoshe mavoko endi kuwesi kujuka kumivungutiya. Ikeye washekele vitozi veni kulutwe lweni, co wamilekele ngeci muvanyongese voshe njwa.

VaHevelu 8:10

Co kengeni, eci cikeco cikumiiyo njikalinga ololo kuli vanu va Isalele munima ya matangwa aje. Njikaka mashiko ange mu mana avo, co njikawasoneka mu vimbunge vyavo. Ngeci njikapwe nji Njambi yavo, co vakevo vakapwe vanu vange.

2 Petulu 3:13

Oloni yetu tuvandamena vije vyanakulaesa Njambi, vikevyo, lilu lyaliha na kaye kakaha, muje mukakala vushunga.

Kujombolola 1:1

Mu livulu eli vanasonekamo vyuma vije vyajombolwele Yesu Kilistu. Njambi wamwanene kujomboloka oku ngeci avisholole kuli vangamba va Njambi vije vikalingiwa vwasi-vwasi. Kilistu wajombolwele vyuma evi kuli ngamba yendi Yowano akutuma kangelo kendi kuli ikeye,