Isaya 23:18 - Livulu lya Shukulu Kalunga

¹⁸ Vimbongo vyakawana akulandulula vakavikundika kuli Shukulu Kalunga. Kuvakavitulikila mu nganda embwe, oloni vaje vaka-kulemesa Shukulu Kalunga vakapangesa vimbongo evi mukulanda vyakulya na vuzalo.

Isaya 23:18 Iomraidhean Croise

Myaso 45:12

Vanu va ku lifuti lya Tile vakakunenela vwana, co vanu vaka-kufuka vakakushangazala.

Myaso 72:10

Vimyene va ku Sipeini na ava va ku man̄anda vakamulambwila milambu, na vimyene va ku Shemba na ku Semba vakamunenela vwana.

Myaso 72:11

Vimyene voshe vakatsikama ku mesho endi, co miyati yoshe vakamupangela!

Kutuuka 28:36

“Co fula mande ya ngolinde yakujela yakupasha ngwe vulami, co talekao ngwe muje vakataleka a mamanya a cizivukiso ngwove, ‘Wakukundika kuli Shukulu Kalunga.’

Visimo 13:22

Munu wamuvwa asezela vatekulyendi vushwana, oloni vufuko vwa vaka-vuvi vakavwambata kuli vaka-vushunga.

Visimo 28:8

Uje awezelela vufuko vwendi na kakondweso, nakutambula vya munu mu ngila yalinyanyamena, co vufuko vwove vukaya kuli uje ali na ngozi na tuutu.

Muka-kwambulula 2:26

Njambi aana mana, nakuzivuka, nakuvwaelela kuli vaje vamuvwaelelesa, oloni akapangesa vaka-vuvi, kuwana nakutulika, ngeci vije vivawana vavyane kuli vaje vamuvwaelelesa. Evi vyoshe vinapu vyangoco, vinapu lika ngwe kusheka lihunzi.

Ezekiyele 26:12

Co vitozi vove vakapukula vufuko vwove vwa seo. Vakasiwula vivumbe vyove nakupukula vinjuvo vyove vyavivwa. Vakanona mamanya na viti na vyoshe vya mazilo, co vakavyumbila mu mema a kalunga.

Mika 4:13

Shukulu Kalunga alinakwendeka ngwendi, “Vanu va mu Yelusalema, yeni nakunyanyamesa vitozi veni! Njikamitakamesa ngwe ngombe wa nkomba wa vimbinga vya vutale na vimbemba vya vunengu. Mukatsena miyati yaingi ya vanu na vufuko vwavo na nzita, co mukavwana kuli yange Kalunga wa kaye koshe.”

Zakaliya 14:14

Vanu va mu Yunda vakalwa mukuvingilikiya Yelusalema. Co vakambata vufuko vwakupukula vwavungi vwa miyati ya vanu voshe, ngolinde na siliva na vuzalo.

Malakiya 3:10

Neneni vyoshe vyavulikumi ku cishete, ngeci mu Njuvo yange mukale vyakulya vyavingi. Kacinjesekeni tayi nga kunjikamishokolwela vinjanena vya mwilu nakumyana vyuma vyavingi vije mukajeneka kwakuvitulikila.

Mateo 25:16

Uje ngamba watambwile vimbongo vyakupwa 5,000 waile nakukasekasana, wawaneneo lalo vimbongo vyakupwa 5,000.

Mako 3:8

co veka lalo vatundile ku Yelusalema, veka lalo vatundile ku lifuti lya ku Indumeya, veka lalo vatundile ku lifuti lya musambwa ya Yondau, co vakwavo lalo vatundile ku mafuti aje azengelekele ku vinganda vya Tile na Sindone. Vanu voshe ava vezile kuli Yesu omwo vazivile vyuma vije vyakele nakulinga.

Luka 12:33

Landeseni vyoshe mulinavyo, co aneni vimbongo kuli vaka-kuutwa. Litongeleni vinkombe vije kuvyesi kutuvika, co litulikileni vufuko mwilu, kuje kuvwasa kutepuluka, omwo mwizi kasa kukovelamo, nambe tunembulu kuvasa kuvuviisa.

Luka 8:3

na Yowana munakazi wa Kuza uje wapwile mukulunu wa mu mbanja ya Helonde, amo na Suzana, na vanakazi veka vavangi vaje vapangesele vyavo mukukwasa Yesu na vandongesi vendi.

Vilinga vya Miluwa 9:39

Ngecivene, Petulu wakatukile waile navo. Omo wetele vamutwalele ku mulili wa akamwa kuje vifwile voshe vamuzengelekele nakulila nakumumwesa vimbinja na vikoveyo vije vyalingile Ndokasi a simbu wakele nakuyoya.

Ngalatiya 6:6

Munu uje valinakulongesa lijwi lya vuka-Yesu napande kulipangela vyuma vyoshe vyavivwa vije alinavyo na mulongisi wendi.