Isaya 1:4 - Livulu lya Shukulu Kalunga

⁴ Ngongo yeni, yeni muyati wakuvulumuna, yeni vanu vakulemuwa na vuvi! Yeni naanga ya vaka-kulinga vuvi, vanu vaje vaka-kulinga vyangoco. Munaseza Shukulu Kalunga, Njambi wakujela wa Isalele, co munamukengesa nima.

Isaya 1:4 Iomraidhean Croise

Kushangumuka 13:13

Vanu va ku Sondoma vapwile vaka-vuvi, valingile vyuma vyavivi manene ku mesho a Shukulu Kalunga.

2 Vimyene 21:22

Ikeye wavyanene Shukulu Kalunga Njambi ya vakukulwila vendi, co kononokele mashiko endi.

2 Mizimbu 12:1

Omo vumwene vwa Lehovowame vwakolele, nendi lalo omo wakele na nzili, co ikeye na vanu va Isalele voshe vasezele Lishiko lya Shukulu Kalunga.

2 Mizimbu 27:2

Ikeye walingile vije vyavwaelelesele Shukulu Kalunga, ngwe mwalingile ishe Uziya, oloni kalingile vuvi vwakwenyekela insense mu Njuvo ya Shukulu Kalunga. Oloni nameme ngoco, vanu anga vakele nakulinga vuvi.

Nehemiya 1:7

Tunalingi vuvi vwakama kuli yove, kutwanyungile mashiko ove, na vizilika vyove, na vilongesa vyove vije viwashikile ngamba yove Mosesa.

Myaso 58:3

Vaka-vuvi vapwa vaka-kuviisa simbu yoshe yakuyoya kwavo, vendeka makuli tunde a litangwa lya kusemuka kwavo.

Myaso 71:22

Mwa vushunga njikakushangazala lalo na kalyalya, njikashangazala kulongwa kwove, yove Njambi yange. Njikakwimbila myaso a kalyalya kange, yove Njambi wakujela wa Isalele.

Myaso 78:40

Visimbu vyavingi vamutengulukilile mu mambo, nakumuvavalesa ku mbunge!

Myaso 78:41

Vatengulukile lalo nakweseka Njambi, co vashangumwine Njambi Wakujela wa Isalele.

Myaso 78:57

Oloni vapwile vaka-kujeneka kulongwa nakujeneka kukulaela ngwe vakukulwila vavo, kuvapwile va vushunga, vapwile ngwe mukili wa kupenga-penga.

Myaso 78:8

Vakevo kuvakapu ngwe vakukulwila vavo, vanu vakukaluwa vimbunge nakujeneka kwononoka, vanu vaje kuvakulaelele Njambi, co kuvapwile va kulongwa kuli ikeye.

Myaso 89:18

Yove Shukulu Kalunga mwene yetu, u muka-kutunyunga, yove Njambi Wakujela wa Isalele, wapwa u ntelo yetu.

Kutuuka 32:7

Co Shukulu Kalunga wendekele kuli Mosesa ngwendi, “Shelumukila asi vwasi-vwasi, omwo vanu vove, vaje watwamenenene nakuvatundisa mu Ingito, vanalingi vuvi nakunjivyana yange.

Isaya 1:23

Vantwama vove vananjiyengula, co vanalikwata vusamba na vanu va muuka, simbu yoshe valinakutambula wana vwavungi na mazika-kanwa. Kuvesi kwamena visiwa mu vimbanja nambe kutolilila omo vifwile vambulula milonga yavo.

Isaya 1:28

Oloni vaka-kutengulukila na vaka-vuvi vakavanyongesa voshe, na vaje vavyana Shukulu Kalunga vakavanyongesa.

Isaya 10:6

Njatumine Asilya nakulwisa muyati wa vaka-kujeneka kunjikulaela, vanu vaje vananjiluvalesa. Njavatumine mukupukula nakwiva nakulyatangela vanu ngwe mazilo a mu vitapalo.”

Isaya 12:6

Munu woshe wakala mu Siyone atambeke nakwimba! Njambi ya Isalele wakujela napu wakama, ikeye wakala akati ka vanu vendi.”

Isaya 14:20

Omwo wanyongesele lifuti lyove nakutsiya vanu vove, kuvakakutsindi ngwe vakweni vimyene. Naumo wai akasalao ku naanga yove yaivi.

Isaya 29:19

Tuutu na vaka-kulikeesa vakajolela muli Shukulu Kalunga, Njambi wakujela wa Isalele.

Isaya 3:8

Eyo, Yelusalema inanyongo! Co Yunda inau! Vyuma vyoshe valinakwendeka nevi valinakulinga vilinakulwisa Shukulu Kalunga, valinakushaula Njambi citona-mesho.

Isaya 30:1

Shukulu Kalunga nendeka ngwendi, “Ngongo yavo vaje valinakushwana mu Yunda, omwo vananjitengulukila nakunjilwisa. Valinakukava matumbe aje kunjalingile, valinga lizivasano kesi lya ku cizango cange, co valinakutwalao kulinga vuvi.

Isaya 30:15

Shukulu Kalunga wa Akamwa ya Vyoshe, Njambi Wakujela wa Isalele, nendeka kuli vanu ngwendi, “Mukutenguluka namukuhwima mukemwo mumukawana mwonyo, co mu kwoloka namukukulaela mukemwo mumukawana nzili.

Isaya 30:9

Simbu yoshe valinakutengulukila Njambi, simbu yoshe vapwa vaka-makuli, simbu yoshe vakavyana kutolilila ku vilongesa vya Shukulu Kalunga.

Isaya 31:2

Shukulu Kalunga azivuka vije vyalinakulinga! Atuma tuyando. Ikeye akahisa vaka-vuvi na vaka-kuvanyunga.

Isaya 37:23

Yove unayongola ngwove iyajo iwunashaula nakuyeluwisa? Yove wanjizivisa shwamwa yange, Njambi ya Isalele wakujela.

Isaya 41:14

Shukulu Kalunga nendeka ngwendi, “Isalele nameme munapu muvavandondo, kesi muzive lyova. Yange Njambi wakujela wa Isalele, njikamyamena nakumyovola.

Isaya 41:16

Mukavombila mu mukambwila, co lihunzi lyakama likavashandola nakuvapekumwina kulyala. Asinoni mukavwaelela, nakunjishangazala, omwo yange njapwa nji Njambi yeni, Njambi wakujela wa Isalele.

Isaya 41:20

Vanu vakacimona, nakuzivuka ngeci yange Kalunga, Njambi wakujela wa Isalele, njavitangele vyoshe.”

Isaya 5:19

Mwendeka ngweni, “Shukulu Kalunga azambule kulinga vije vyendekele, ngeci tuvimone. Njambi wa Isalele wakujela atumbe matumbe endi, ngeci tumone viyongola vyendi.”

Isaya 5:24

Ngecivene, ngwe muvikenye vishati na mwila wakuma mu tuhya, ngecivene, mizi yeni ikavola, na vishani vyeni vikominina nakupekumuka, omwo munavyana vije vyatulongesele Shukulu Kalunga Muka-nzili yoshe, Njambi wakujela wa Isalele.

Isaya 57:17

Njaluvalele navo omwo vuvi vwavo na muuka wavo, ngeci njavahisile nakuvaseza, omwo vakaluwisile vimbunge vyavo nakuya mu vingila vyavo.

Isaya 58:2

Vakanjilemesa a litangwa na litangwa, vendeka ngwavo valinakushungwiya kuzivuka vingila vyange nakwononoka mashiko ange. Vendeka ngwavo vashaka njivane mashiko a vushunga, ngeci vavwaelele mukunjilemesa.”

Isaya 65:11

“Oloni kukakala kulyangunuka neni mulinakunjivyana, yeni mulimbulula Siyone, lilundu lyange lyakujela, nakulemesa Ngande na Meni, vinjambi va sande na luvinda.

Isaya 65:3

Vakanjiluvalesa nakunjiyeluwisa. Vakombelela vin̄ombelo ku tumponya mu vitungu vyavo vyakujela nakwenyeka insense a mitula yakutunga na livu.

Isaya 9:17

Ngecivene, Shukulu Kalunga kakatava vakwenje ngeci vaputumukeo, co kakazivila lalo mema ku mbunge vifwile nambe visiwa, omwo vanu voshe vanapu vaka-kujeneka kukulaela, co vanapu vaka-vuvi, na vyuma vyoshe vendeka vinapu vya vuvi. Nameme ngoco, vukalu vwa Shukulu Kalunga kuvukahu, oloni anga akolola livoko lyendi mukuvahisa.

Njelemiya 15:6

Yeni vanu vange munanjivyana nakunjiseza, munanjikengesa nima. Njinajuka kumizivila mema ku mbunge, cooni njikaminyongesa.

Njelemiya 2:13

omwo vanu vange vanalingi vuvi vuvali, vanatundu kuli yange, lisima lya kavwelu-vwelu lya mema akutonola, vanalicokwela masima a myanzi muje kumwasa kukendama mema.

Njelemiya 2:17

Isalele, yove vavenya walikokela vuvi! Wasezele yange Kalunga Njambi yove, omo njakutwamenenene mu ngila.

Njelemiya 2:19

Vuvi vwove vukakuhisa yove vavenya omwo unatundu kuli yange. Ngecivene, ukalilongesa vuvi na vunyengwe, akuseza yange Kalunga Njambi yove, kujeneka kunjisingimika. Yange Kalunga wa Akamwa ya Vyoshe, Muka-nzili yoshe, njinendekamo.”

Njelemiya 2:31

Vanu va Isalele, tolilileni vinjendeka. Kuma yange njamisezele mu mambo, nambe kumifwika na lisusulungu ndi? Omwo vikajo mwendeka ngweni mukalinga ngwe mucamivwasela, ngweni kumukelukila lalo kuli yange?

Njelemiya 2:33

Mwa vushunga mwazivuka mwamuvwa kukavangeya cizemo. Nameme vanakazi vakavilinga vyavivi vasa kumitembunwina.

Njelemiya 2:5

Shukulu Kalunga alinakwendeka ngwendi, “Mulonga ukajo uvanjiwanene nawo vakukulwila veni ngeci vatunde kuli yange? Valemesele tumponya twakujeneka seo, co na vakevo lalo vapwile vanu vangoco.

Njelemiya 32:32

omwo a vuvi vwoshe vuje vuvanalingi vanu va mu Yunda na vanu va mu Yelusalema, amolika na vimyene vavo, na vantwama, na vaka-kukombelela vavo, na vaka-kwimanena.

Njelemiya 50:29

Saneni vaka-mata a lusipa valwise Mbambilone. Voshe vaje vazivuka kupangesa vuta vwa lusipa na mukili. Zengelekeni nganda, kesi mutave umo aputumukemo, ilingeni mwamuvi ku vije vyoshe vyalingile, co ipangeseni ngwe muyapangesele vakwavo, omwo yalingile na kulyalesa ku mesho ange, muka-kujela wa Isalele.

Njelemiya 51:5

Yange Kalunga Njambi Muka-nzili yoshe, kunjasezele vanu va mu Isalele na vanu va mu Yunda, nameme vanalingi vuvi ku mesho ange muka-kujela wa Isalele.

Njelemiya 7:19

Kuma yange valinakuzivisa ku mbunge kuvavala ndi? Embwe, vali na kulizivisa shwamwa vakevo vavenya.

Njelemiya 7:26

Oloni nameme ngoco, naumo wai wavatolililile nambe kumbako mbunge. Oloni yeni mwakaluwisile manene vimbunge vyeni nakunjitengulukila kutuvakana vakukulwila veni.

Ezekiyele 14:5

Tumponya tuje twoshe tunatengulula vaIsalele nakuvatundisa kuli yange, oloni kukumbulula kwange kukavatengulula, co vakanjisingimika lalo.

Ezekiyele 16:33

Vikwizi voshe vakavondo, oloni yove waanene vwana kuli vikwizi vove voshe kupwa lizika-kanwa, ngeci vatunde ku mitambela yoshe valinge nove vupangala.

Ezekiyele 16:45

Mwa vushunga yove u muna vanyoko. Vanyoko vasezele munalume wavo na vana vavo. Yove wafwa ngwe vandokazi vove, vaje vazindile vanalume vavo na vana vavo. Yove amolika na vinganda vije walifwa navyo mwakele na vanyoko kaHiti, co ishweni wapwile kaAmoli.

Ndanyele 9:11

Isalele yoshe vapokwele mashiko ove nakuvyana kutolilila ku vije viwavalekele. Twalingile vuvi ku mesho ove, ngeci watusingile na cisingo cije civasoneka mu Lishiko lya Mosesa ngamba yove.

Zefaniya 1:6

Njikanyongesa lalo vaje vanalikela kunjipangela, vaje kuvesi kwija kuli yange nambe kunjilomba ngeci njivatwamenene.”

Kulava 32:14

Co yeni munengi mu mwela wa vaishweni, cisemwa caciha ca vanu vavavi vaje vashaka kunena vukalu vwa Shukulu Kalunga ali vanu va Isalele.

Mateo 11:28

“Ijeni kuli yange, yeni voshe munajuka nakwambata vyakulema, co njikamihwimisa.

Mateo 23:33

Eni manyoka na vana va manyoka! Vatijo mutewa kusompa kwakuya ku tuhya twa myaka yoshe?

Mateo 3:7

Oloni omo Yowano wamwene vaFaliseo na vaSanduki vavangi vakele nakwija kuli ikeye ngeci avambwitike, co wendekele kuli vakevo ngwendi, “Eni manyoka! Iyajo naminangula ngeci mutewe vukalu vwa Njambi vuje vulinakwija?

Loma 8:7

Omwo cizango ca vusitu cikeco cinena vutozi kuli Njambi, kucasa kwononoka Mashiko a Njambi, co kucitava vene.

1 Kolinte 10:22

Kuma tushaka kulingisa Mwene lifuwa ndi? Kuma tuyongola ngwetu tuli na nzili kutuvakana ikeye ndi?

Kwituluka mu Mashiko 29:25

Co vakakumbulula ngwavo, ‘Omwo vanu va Shukulu Kalunga kuvanyungile cikumiiyo, cije Shukulu Kalunga Njambi ya vakukulwila vavo, walikumiiye navo omo wavatundisile mu Ingito.

Kwituluka mu Mashiko 31:16

Co Shukulu Kalunga wendekele kuli Mosesa ngwendi, “Ololo ukatsa, co omo unatsi laja, vanu vakajeneka kunjononoka, co vakapokola cikumiiyo cije njalikumiiye navo. Vakanjiseza nakulemesa vinjambi va mu lifuti lije livakakovela.

Kwituluka mu Mashiko 32:19

“Omo Shukulu Kalunga wamwene evi, co waluvalele, omwo vana vendi va vanalume na ava va vanakazi vamushangumwine.

Kwituluka mu Mashiko 32:5

Oloni yeni mwalingile mwamuvi kuli ikeye, co kumwapandele kupwa mu vanu vendi embwe, muyati wauvi wa makuli.

Kolose 1:24

Co ololo yange njilinakujolela a tuyando twange omwo yeni, omwo a tuyando twa muvila uno njase kumanesa tuyando twa Kilistu tuje tunasalako twa muvila wendi, ukewo cikungulukilo.

Kujombolola 18:5

Omwo vuvi vwendi vunatumu vunete na mwilu, co Njambi nanuka vingila vyendi vya kupenga-penga.

Maako 10:10

Asinoni vaIsalele valililile kuli Shukulu Kalunga vendekele ngwavo, “Tunalingi vuvi ku mesho ove, omwo tunaseza yove, Njambi yetu, co tunalemesa Mbale.”