Hoziya 7:1 - Livulu lya Shukulu Kalunga

¹ “Oshe aje anjishakela kukangwisa vanu vange va Isalele ngeci vakale lalo mwamuvwa, vyoshe njilinakumona vinapu kupenga-penga kwavo na vuvi vuje valinakulinga. Valinakulikwisa umo na mukwavo, vatuva vinjuvo nakwiva, co vevila vanu mu vitapalo.

Hoziya 7:1 Iomraidhean Croise

Isaya 28:1

Vumwene vwa Isalele vunanyongo! Vumwene vwavwo vulinakuhwa ngwe cilongo ca vishani cili ku mitwe ya vantwama vamwo vaka-kupenda. Mitwe yavo ya kulyalesa vanaivwavesa mwamuvwa mazi akunika lwengo lwaluvwa, oloni vanalala, vanapende vwala.

Isaya 59:12

“Shukulu Kalunga, milonga yetu ku mesho ove yaingi manene. Vuvi vwetu vulinakutuhisa. Twavuzivuka.

Isaya 59:13

Twakutengulukila, nakuvyana kukukava. Twayandesele vakwetu nakutunda kuli yove. Viyongola vyetu vinapu vya makuli, na majwi etu anapu a makuli.

Isaya 59:14

Kulongwa kunahu, na vushunga kuvwesiko lalo. Vushunga vunahumo mu mbanja, co kulongwa kwaiko lalo.

Njelemiya 51:9

Vaje vaka-kwija vakele muje vendekele ngwavo, ‘Tuneseka kusaka Mbambilone, oloni tunonwa. Tuyisezeni twilukeni ku membo etu. Njambi nahisa Mbambilone na nzili yendi yoshe, co nayinyongesa yoshe njwa.’ ”

Ezekiyele 16:46

“Ndokazi yove wa mukulunu, wapwa Samaliya, wakala ku kunto na vana vendi. Co ndokazi yove wa mwanike, wapwa Sondoma, wakala mu mbwela na vana vendi.

Ezekiyele 23:4

Wa mukulunu lizina lyendi Ohola (ikeye wemanenene Samaliya), co wa shongo lizina lyendi Oholimba (ikeye wemanenene Yelusalema). Voshe muvuvali vwavo njavambatele nakukita navo vana.

Ezekiyele 24:13

Yove Yelusalema, vilinga vyove vya vupangala vinakujwalesa. Nameme njesekele kukujelesa, anga vene wajwalele. Yove kuukajele lalo kuvanga noo unazivi vukalu vwange.

Hoziya 10:5

Vanu vaje vali mu nganda ya Samaliya vakaziva lyova, co vakalila a uje ngombe wa ngolinde wa ku Mbetele. Co vakevo na vaka-kukombelela vaje vapangela uje kamponya vakakalilila. Vakalila omo vakamona valinakukatundisa vuvwa vwako vwa ngolinde.

Hoziya 11:12

Shukulu Kalunga alinakwendeka ngwendi, “Vanu va mu Isalele vananjizengeleka na makuli nakukwisa, co vanu va mu Yunda valinakunjitengulukila yange Njambi wa kulongwa nakujela.

Hoziya 11:8

“Vatijo njasa kukwecelela, Isalele? Vatijo njasa kukumbila kuti? Kuma njasa kuminyongesa ngwe munjanyongesele Andema ndi? Nambe kumipangesa ngwe munjapangesele Zemboime ndi? Mbunge yange kuyikanjitavesa kucilinga! Cizemo cange kuli yeni cinapu cakama manene.

Hoziya 12:1

“Vyuma vyoshe vije vivakalingi vanu va mu Isalele kutunda ku mutondo nakweta ku vutsiki kuvyesi na seo, co vinapu vyakunyongesa. Makuli na vilinga vya muuka vinatumu akati kavo. Co valinakulikumiiya cikumiiyo na vaAsilya, nakulinga nganyo na vaka-Ingito.”

Hoziya 12:2

Shukulu Kalunga nawana mulonga ku vanu va mu Yunda, co lalo akanyanyamesa Isalele a vyuma vije vanu vendi valinakulinga. Akavalinga shambandinga a vije vivanalingi.

Hoziya 4:17

Vanu va mu Isalele vanaangula kulemesa tumponya. Veceleni vaye mu ngila yavo.

Hoziya 4:2

Valinga vikulaeso, co lalo vavipokola, vendeka makuli, nakutsiya, nakwiva, nakulinga vupangala. Muuka unatumu, co lalo kutsiya kwakulikavasana kulinakutwalao simbu yoshe.

Hoziya 5:1

“Tolilileni vyuma evi, yeni vaka-kukombelela! Umbeniko mbunge, yeni vanu va mu Isalele! Tolilileni, yeni vaka-naanga ya vumwene! Munapandele kusompa mu vushunga, ngecivene, cihiso cikaija ali yeni! Yeni munapu ngwe nganjo ku Mizipa, munapu ngwe linimbwa lije vajangumwina a Munkinda wa Tambole.

Hoziya 6:4

Oloni Shukulu Kalunga alinakwendeka ngwendi, “Isalele na Yunda, cuma mukajo njikalinga kuli yeni? Cizemo ceni kuli yange cilinakuhwa vwasi-vwasi ngwe mbundu ku mutondo, cinapu ngwe lime lije likatotomoka ku mutondo-tondo.

Hoziya 7:13

“Vananyongo! Vananjiseza nakunjitengulukila. Vakavanyongesa. Njashakele kuvamena, oloni kunjilemesa kwavo kwapwile kwa makuli.

Hoziya 8:5

Njazinda ngombe wa nkomba wa ngolinde uje ivakalemesa vanu va mu nganda ya Samaliya. Njinaluvala navo manene. Simbu mukajo vakecela kulemesa tumponya twavo?

Hoziya 8:9

Vanu va mu Isalele vanakaluwa ngwe vimulu vavukalu, co valinakuya mu ngila yavo vavenya. Vanai nakukashakezeka vukwasi ku Asilya, co vanafwete mafuti eka ngeci vavanyunge.

Amose 3:10

Shukulu Kalunga alinakwendeka ngwendi, “Vanu ava vanashulisa vinjuvo vyavo na vyuma vanawana mu vingila vya muuka na vwizi. Vakevo kuvazivuka kulinga vushunga.

Amose 3:9

Ambululeni kuli vaje vakala mu mapela a mu Ingito na a Ashendonde ngweni, “Kungulukileni a malundu a Samaliya ngeci mumone kuviya kwakama kulimo, na milonga ivalinakulinga muje.”

Amose 8:14

Co vaje vakalisingi na tumponya twa ku Samaliya, vaje vakendeka ngwavo, ‘Ali njambi wa ku Ndani,’ nambe ngwavo, ‘Ali njambi wa ku Mbeleshemba,’ co vanu va cifwa eci vakawa, kuvakenduka lalo.”

Mika 6:16

Eci cikalingiwa omwo munakavangeya vilinga vyavivi vya Mwene Omeli, na munendi Mwene Ahave. Munakavangeya mashiko avo, ngecivene, njikaminyongesa. Co vanu voshe vakamishaula. Vanu vange vakamishaula kwoshe-ikwoshe.”

Mateo 23:37

“Yelusalema, Yelusalema! Yove ukatsii vaka-kwimanena nakwasha mamanya miluwa va Njambi vaje vatumine kuli yove! Visimbu vyavingi njashakele kukungulula vanu vove nakuvavumbatela mu mavoko ange, ngwe kasumbi avutikiya vana vendi mu mambava, oloni yove kuwanjitavele!

Luka 13:34

“Yelusalema, Yelusalema! Yove ukatsii vaka-kwimanena nakwasha mamanya miluwa va Njambi vaje vaatumine kuli yove! Visimbu vyavingi njashakele kukungulula vanu vove nakuvavumbatela mu mavoko ange ngwe kasumbi akavutikiya vana vendi mu mambava, oloni yove kuwanjitavele!

Luka 19:42

wendekele ngwendi, “Nga wazivukile lika lelo ngwove vika vishakiwa ngeci kukale kwoloka! Oloni ololo kuwasa kucimona!