Ezekiyele 20:6 - Livulu lya Shukulu Kalunga

⁶ Njavakulaesele kuvatundisa mu Ingito nakuvatwamenena ku lifuti lije njavaangwilile, lifuti lya vufuko na vwilo, lifuti lyalivwa manene kutuvakana mafuti oshe.

Ezekiyele 20:6 Iomraidhean Croise

Nehemiya 9:12

Ku mutanya wavatwamenenene na lishelwa, co ku vutsiki watwisile ceke ca tuhya mu ngila yavo.

Nehemiya 9:9

“Yove wamwene vakukulwila vetu muvayandele mu Ingito, wazivile mutambi wavo wakuvakwasa ku Mema a Kalunga Akuvenga.

Myaso 106:24

Vanu vayeluwisile lifuti lije lyalivwa, kuvakulaelele cikulaeso ca Njambi.

Myaso 47:5

Njambi aya ku litanda lyendi lya vumwene! Kuli mitambi yakujolela nakwimba malupembo, omo Shukulu Kalunga alamata kwilu!

Myaso 48:2

Siyone munkinda wa Njambi, ukewo uli kulyala ku kunto, co lalo wauvwa, nganda ya mwene wakama inena kujolela mu kaye mwoshe!

Kutuuka 13:5

Omwo Shukulu Kalunga akamitwala mu lifuti lya vaKanana, na vaHiti, na vaAmoli, na vaHivi, na vaNjevushi, lifuti lije lyalisingile na vakukulwila veni kumyanalyo, lifuti lije lyalivwa, nevi vyakujenekamo vyai, co mukanyunga ciwano eci a mwaka na mwaka ku ngonde yakulivanga.

Kutuuka 3:17

Co nayongola ngeci akamitundisa mu tuyando twa mu Ingito, nakumitwala mu lifuti lyalivwa nevi vyakujenekamo vyai, lifuti lya vaKanana, na vaHiti, na vaAmoli, na vaPelezi, na vaHivi, na vaNjevushi.’ ”

Kutuuka 3:8

Ngecivene, njinaija mukuvapatula ku livoko lya vaka-Ingito, nakuvatundisa mu lifuti eli lya Ingito nakuvatwala mu lifuti lyalivwa nevi vyakujenekamo vyai, muje ololo mucili vaKanana, na vaHiti, na vaAmoli, na vaPelezi, na vaHivi, na vaNjevushi.

Kutuuka 33:3

Mulinakuya ku lifuti lyalivwa, nevi vyakujenekamo vyai. Oloni yange kunjikai neni amolika, omwo yeni mu vanu vakukaluwa vimbunge, kutewa njikaminyongesela a ngila.”

Kutuuka 6:8

Co njikamitwala mu lifuti lije njakulaesele kulyana kuli Avilahama, na Isake, na Yakomba, co njikalyana kuli yeni kupwa vushwana vweni. Yange njapwa Kalunga.’ ”

Njelemiya 11:5

Asinoni njikanyunga cikumiiyo cije njalikumiiye na vakukulwila veni, ngeci njikavana lifuti lyalivwa nevi vyakujenekamo vyai, muje mumuli nakukala ololo.” Co njakumbulwile ngwange, “Ewa Shukulu Kalunga.”

Njelemiya 3:19

Shukulu Kalunga alinakwendeka ngwendi, “Isalele, njashakele kukutambula ngeci upwe u munange nakukwana lifuti lyalivwa, lifuti lyalivwa manene mu kaye koshe. Njashekele ngwange unjitumbule nji isho ngeci kesi utunde lalo kuli yange.

Njelemiya 32:22

Wavanene lifuti eli lyalivwa lya vwilo, ngwe muwakulaesele vakukulwila vavo.

Ezekiyele 20:15

Ngecivene, njalisingile muje mu mambo ngwange kunjikasa kuvatwala ku lifuti lije linjavanene, lifuti lya vufuko na vwilo, lifuti lyalivwa manene kutuvakana mafuti oshe.

Ezekiyele 20:23

Ngecivene, njalikumiiye lalo cikumiiyo cikwavo mu mambo. Njalisingile ngeci njikavashandwela mu kaye mwoshe.

Ezekiyele 20:42

Omo njikamiilwisa mu Yelusalema, lifuti lije linjakulaesele kulyana kuli vakukulwila veni, asinoni mukazivuka ngeci yange njapwa Kalunga.

Ezekiyele 20:5

Valeke vije vinjilinakwendeka. Omwo njaangwile Isalele, njavapwisile lizivasano. Njalisholwele kuli vakevo mu Ingito nakuvaleka ngwange yange njapwa nji Kalunga Njambi yeni.

Ezekiyele 47:14

Yange njalikumiiye cikumiiyo na vakukulwila veni ngeci njikavana lifuti eli kupwa lyavo, co ololo lipangezelenilyo akati keni muvavoshe mupwise amo.

Ndanyele 11:16

Oloni mwene wa Silya akalinga cizango cendi kuli vakevo, naumo wai akamuyeluwisa. Akemana mu Lifuti lya Cikulaeso, co lyoshe likapwa lyendi.

Ndanyele 11:41

Ikeye lalo akakovelela Lifuti lya Cikulaeso nakutsiya vanu vakupwa 100,000. Oloni mafuti a Endome na a Mowavi na vaje vakasalao kuli Amoni vakevo vakatewa.

Ndanyele 8:9

Akati ka vimbinga evi viwana amenene mbinga imo yaindondo. Yapwile yailaja, yetele mu mbwela na mu ngangela na ku Lifuti lya Cikulaeso.

VaLevi 20:24

Oloni yange njamikulaesele lifuti eli lyalivwa lya vwilo nevi vyakujenekamo vyai kupwa vushwana vweni, co yange njikamyanalyo. Yange njapwa Kalunga Njambi yeni, yange njamyangwile nakumyangununa akati ka miyati yoshe.

Zakaliya 7:14

Co njavapekumwine ngwe lihunzi nakuvatwala ku mafuti eka ngeci vakayoyeleko. Lifuti eli lyalivwa lyasalele mu ngundu yangoco, naumo wai wayoyelelemo.”

Kulava 13:27

Co valekele Mosesa ngwavo, “Tunakanengele mu lifuti muje muwatutumine, tunakawana ngeci likelyo linapu lya vufuko na vwilo nevi vyakujenekamo vyai, co ovu vukevwo vushuka vwamwo.

Kulava 14:8

Nga Shukulu Kalunga atava, co akatutwala mu lifuti lije nakutwanalyo, lifuti lije lya vufuko na vwilo nevi vyakujenekamo vyai.

Kwituluka mu Mashiko 11:9

Ngecivene, mukakale simbu yakama mu lifuti lije lyakulaesele Shukulu Kalunga vakukulwila veni kulyana kuli vatekulwila vavo, lifuti lyalivwa nevi vyakujenekamo vyai.

Kwituluka mu Mashiko 26:15

Co kenga ano asi oku uli mu mwela wove wakujela mwilu, vezikisa vanu vove vaIsalele na livu liwunatwana, ngwe muje muwakulaesele vakukulwila vetu, lifuti lyalivwa nevi vyakujenekamo vyai.’

Kwituluka mu Mashiko 26:9

Co watunenele kuno nakutwana lifuti lino lyalivwa nevi vyakujenekamo vyai.

Kwituluka mu Mashiko 27:3

Asinoni mukasonekao mashiko oshe awa na vilongesa vyoshe evi. Omo mukakovela mu lifuti lije lyakamyana Shukulu Kalunga Njambi yeni, lifuti lije lyalivwa nevi vyakujenekamo vyai, ngwe muje mwamikulaesele Shukulu Kalunga Njambi ya vakukulwila veni,

Kwituluka mu Mashiko 3:25

Shukulu Kalunga njitave njijavuke Ndonga ya Yondau, ngeci njikamone lifuti lije lyalivwa lya malundu na Minkinda ya Lembanone.’

Kwituluka mu Mashiko 31:20

Njikavatwala mu lifuti lije lyalivwa lya vwilo nevi vyakujenekamo vyai muje njalisingile na vakukulwila vavo. Muje vakakala na vyakulya vyoshe vivakashaka, co vakakala mwamuvwa. Oloni vakanjikengesa nima nakulemesa vinjambi veka. Co vakanjivyana nakupokola cikumiiyo cange.

Kwituluka mu Mashiko 32:40

Mwa vushunga yange njapwa Njambi wakuyoya simbu yoshe, njikajundula livoko lyange nakulisinga,

Kwituluka mu Mashiko 32:8

Omo Njambi wa Akamwa ya Vyoshe waanene miyati mafuti avo, waangunwine vanu, watavwilile vanu vinginga, ngwe ku vungi vwa vanu va Isalele.

Kwituluka mu Mashiko 6:3

Ngecivene, tolilileni, yeni vanu va Isalele, ononokeni nakuwanyunga mwamuvwa. Co mukatuma manene ngwe muje Shukulu Kalunga Njambi ya vakukulwila veni mwamikulaesele mu lifuti lije lyalivwa nevi vyakujenekamo vyai.

Yoshwa 5:6

VaIsalele vendele mu mambo myaka makumi awana, noo cisemwa coshe ca vanalume vaje vasele kuya ku nzita vaje vatundile ku Ingito vanyongele, omwo kuvononokele Shukulu Kalunga. Ngwe muje mwalisingile ikeye kavatavele ngeci vakamone lifuti lije lyalisingile na vakukulwila vavo kuvanalyo, lifuti lyalivwa lya vwilo, nevi vyakujenekamo vyai.