2 Samwele 5:3 - Livulu lya Shukulu Kalunga

³ Ngecivene, vantwama voshe va Isalele vezile kuli Mwene Ndaviti ku Hevelone. Ngecivene, walikumiiye cikumiiyo cakujela navo, co vamuvwavesele, wapwile mwene wa mu Isalele.

2 Samwele 5:3 Iomraidhean Croise

2 Samwele 2:4

Asinoni vanu va ku Yunda vezile ku Hevelone nakuvwavesa mazi Ndaviti kumupwisa mwene wa mu Yunda. Omo Ndaviti wazivile ngeci vanu va ku Njambeshe mu Ngilyande vanatsindi Saulu,

2 Samwele 2:7

Pweni vaka-nzili nakusimpa! Saulu mwene yeni natsi, co vanu va ku Yunda vananjivwavesa mazi kupwa mwene yavo.”

2 Samwele 3:21

Co Avinele wendekele kuli Ndaviti ngwendi, “Ololo oni njikafungulula Isalele yoshe ngeci ikale ku mutambela wove shukulu yange. Vakakutambula kupwa mwene, co ukambata vyoshe viwushaka, co ukashwana lifuti lyoshe.” Ngecivene, Ndaviti washuwile Avinele, co waile mwamuvwa.

1 Vimyene 1:34

co kuje vene Zandoke muka-kukombelela, na Natane muka-kwimanena, vakamuvwavese mazi kupwa mwene wa mu Isalele. Co imbeni lupembo nakutambeka ngweni, ‘Mwene Solomoni ayoye!’

2 Vimyene 11:17

Yehoyanda wakolesele cikumiiyo akati ka Shukulu Kalunga na mwene amo na vanu ngeci vapwe vanu va Shukulu Kalunga, co lalo walikumiiye cikumiiyo akati ka mwene na vanu.

1 Mizimbu 11:1

Asinoni miyati yoshe ya Isalele vaile kuli Ndaviti ku Hevelone nakwendeka kuli ikeye ngwavo, “Yetu tunapu tu vavushoko vwove.

1 Mizimbu 11:3

Ngecivene, vantwama voshe va Isalele vezile kuli Mwene Ndaviti ku Hevelone. Ngecivene, walikumiiye cikumiiyo cakujela navo, co vamuvwavesele, wapwile mwene wa mu Isalele, ngwe mwavakulaesele Shukulu Kalunga ali Samwele.

1 Mizimbu 28:4

Shukulu Kalunga, Njambi ya Isalele, wanjangwile yange na vatekulwila vange kushwana Isalele ku myaka yoshe. Co ikeye waangwile muyati wa Yunda kupwa vantwama, muli Yunda lalo waangwilemo muyati wa tate. Co mu naanga eyi yoshe camuvwaesele ku mbunge kwangula yange, nakunjipwisa mwene wa Isalele yoshe.

2 Mizimbu 23:16

Co Yehoyanda muka-kukombelela walikumiiye cikumiiyo na Mwene Yowashe amo na vanu voshe ngeci vapwe vanu va Shukulu Kalunga.

Nehemiya 9:38

Omwo a evi vyoshe vije vinalingiwa, yetu vanu va Isalele, tulinakulinga lizivasano lyakukola lyakusoneka, co vantwama vetu, na vaLevi vetu, na vaka-kukombelela vetu vasateleo visateso vyavo.

Kutuuka 3:16

Ya ukakungulwile amo vantwama va Isalele voshe ukavaleke ngwove, ‘Shukulu Kalunga, Njambi ya vakukulwila veni, Njambi ya Avilahama, na Isake, na Yakomba, nalisholwele kuli yange. Valeke ngwove Njambi nakenge ali yeni, co namono vika vaka-Ingito valinakumilinga.

Yoshwa 10:36

Munima yevi, Yoshwa na mashwalale vendi vatundile ku Engelone valamatele ku malundu nakuya ku Hevelone, co valwile navo.

Maako 11:11

Ngecivene, Njefeta waile amo na vantwama va ku Ngilyande, co vanu vamupwisile ntwama na muka-kushika. Njefeta wendekele majwi endi oshe ku mesho a Shukulu Kalunga kuje ku Mizipa.

1 Samwele 11:15

Ngecivene, voshe vaile ku Ngilingale, co kuje ku mwela wakujela vambulwile Saulu ngwavo napu mwene yavo. Vakombelelele vin̄ombelo vya kulitombola, co Saulu na vanu voshe va Isalele valisambele.

1 Samwele 16:13

Co Samwele wambatele lilulu lya mazi a olive, wavwavesele Ndaviti ku mesho a vandolome vendi. Co aje vene Munzinzime wa Shukulu Kalunga wezile na nzili ali Ndaviti, wakele amo nendi kutunda ku litangwa lije. Asinoni Samwele welukile ku Lama.

1 Samwele 23:18

Co muvuvali vwavo valikumiiye cikumiiyo cakujela ku mesho a Shukulu Kalunga. Co Ndaviti welukile ku Holeshe, Yonatana welukile kwimbo.