2 Kolinte 2:17 - Livulu lya Shukulu Kalunga

¹⁷ Omwo kutwafwile ngwe vavangi vaje vatanganesa lijwi lya Njambi, ngwe kulandulula vyuma vyakujeneka seo, oloni omwo Njambi natutumu, twendeka na kalemeso ku mesho endi, ngwe vangamba va Kilistu.

2 Kolinte 2:17 Iomraidhean Croise

Njelemiya 5:31

Vaka-kwimanena kuvesi nakwendeka vya vushunga kuvanga vya makuli lika, vaka-kukombelela kuvesi kumba mbunge ku vije njishaka yange, co vanu vange navo lalo valinakukavangeya vyuma evi. Oloni vakalinga vatijo omo litangwa lya vukalu liija?’ ”

Mateo 24:24

Omwo kukasholoka vaKuvwavesa va makuli na vaka-kwimanena va makuli, vakamwesa vizivukiso na vikomokeso vyakama, ngecivene, vakatangule nameme vaje vavaangwile kuli Njambi nga citava.

Vilinga vya Miluwa 20:20

Mwazivuka ngweni kunjalikelele kulinga cuma cimo cije capwile cakumikwasa omo njambulwile nakulongesa mu mbunga na mu vinjuvo vyeni.

Vilinga vya Miluwa 20:27

Omwo kunjalikelele kwambulula kuli yeni vutumbe vwoshe vwa Njambi.

1 Kolinte 5:8

Ngecivene, tulisambeni ciwano cetu, kesi na likende lili na musima walaja wa vuvi na kupenga-penga embwe, oloni na likende lije kulyesi na musima, likende lyakujela na vushunga.

2 Kolinte 1:12

Omwo kulyalesa kwetu kukekwo oku, citaku-taku cetu ngeci, kuyoya kwetu ano asi, vunene vusamba vwetu neni vanakala nakuvutwamenena mukujela na vushunga vyakutunda kuli Njambi kesi na mana a vunu embwe.

2 Kolinte 1:18

Oloni Njambi wapwa muka-vushunga, majwi etu kuli yeni kuwapwile, “Eyo” nambe “Embwe.”

2 Kolinte 11:11

Kuma njendeka ngeci omwo njamizinda ndi? Njambi azivuka ngeci njamizema!

2 Kolinte 12:19

Amo muyongola ngeci tulinakulisambesa yetu vavenya ku mesho eni ndi? Embwe! Tulinakwendeka ngwe omo Kilistu atuleka mukemwo twendeka ku mesho a Njambi, co vyuma vyoshe tulinga, vasamba vange, tulinakuvilinga mukukwasa yeni.

2 Kolinte 4:2

Ngecivene, a vyuma vyoshe vyalaja vyakushwekesa tunavyumbila kuti, kutwesi nakupanga na vilinga lalo vyakukwisa, nambe kutanganesa lijwi lya Njambi. Oloni mu mutanya mwelu wa vushunga tulinakuyoyela ku mesho a Njambi nakweseka kulikundika yetu vavenya ku munu na munu mu vuvwa vwa citaku-taku cendi.

2 Kolinte 6:7

na a lijwi lyetu lya vushunga na a nzili ya Njambi. Vushunga tunavupwisa vitwa vyetu vwakulwisa navyo na vyakutwamena.

Ngalatiya 1:6

Njakomoka kuli yeni! Mu simbu yaindondo yeni voshe munatundu kuli uje wamisanene na kutetela kwa Kilistu, co munatava ku muzimbu weka lalo.

1 Tesalonika 2:4

Oloni visimbu vyoshe tulinakwendeka ngwe muje Njambi ashaka ngeci tulinge, omwo natusompela yetu ngeci twafwilamo kwambulula Vin̄anda Vyavivwa. Kutushaka kweseka kuvwaelelesa vanu, oloni kuvwaelelesa Njambi, uje muka-kweseka vimbunge vyetu.

Tito 1:11

Cinapande vene kuvindika vyendeka vyavo, omwo vakevo valinakutanganesa naanga yoshe yamutunu nakulongesa vije kuvyavapandele, nevi vivalinakulinga a vutumbe vwavo vwa shwamwa vwakunganyala vimbongo.

VaHevelu 11:27

Akukulaela, Mosesa watundile mu Ingito kakele na lyova lyakutewa vukalu vwa mwene. Nambe ngwe namono laja Njambi uje kutwasa kumona, co wavyanene kwilukilako.

1 Petulu 4:11

Voshe vaje vambulula vanapande kwambulula lijwi lya Njambi, voshe vaje vapanga vanapande kupanga na nzili ije yanavana Njambi, ngeci mu vyuma vyoshe Njambi vamushangazale ali Yesu Kilistu, kuli ikeye kwakundama vumpau na nzili ku myaka yoshe. Ewa.

1 Yowano 4:1

Vasamba vange vanjazema, kesi mukulaele kuli voshe vaje vendeka ngwavo vali na Munzinzime, oloni veluleni muwane ngeci nga munzinzime uje uvalinawo unatundu kuli Njambi. Omwo vaka-kwimanena vavangi va makuli vanashandokela kwoshe-ikwoshe.

Yunda 1:4

Omwo vanu vamo vaka-kujeneka kukulaela vanakovela mu vushweke akati ketu, vanu vaje vaka-kutengulula lijwi a kutetela kwa Njambi ngeci valisambese vakevo vavenya mu mashungu avo amavi, co vanavyana Yesu Kilistu, Shukulu yetu na Mwene yetu. Ku san̄ulu Visoneka vyambulwile cihiso cije civanatambula.

Kujombolola 12:9

Co uje canza-ngombe wakama vamumbilile asi, uje linyoka wa ku san̄ulu vatumbula ngwavo Liyavola, uje wakwisile kaye koshe. Vamumbilile asi amo na tungelo twendi voshe.

Kujombolola 19:20

Co uje cikashama vamupwisile cinzinda, amo na muka-kwimanena wa makuli uje walingile vizivukiso ku mesho endi. (A vizivukiso vije vene akeo akwisilile vaje vakele na cizivukiso ca uje cikashama na vaje valemesele kamponya ka uje cikashama.) Uje cikashama na uje muka-kwimanena wa makuli vavombilile anga vaciyoya mu lishali lya tuhya twakushukuma na sulufa.

Kujombolola 2:20

Oloni kuli cimo njalinyenge ali yove, unecelela uje munakazi Njezevele, uje alinakulitumbula ikeye vavenya ngwendi muluwa wa Njambi. Kulongesa kwendi kulinakutwamenena vangamba vange kulinga vupangala nakulya vyakulya vyakukombelela ku tumponya.