1 Yowano 3:1 - Livulu lya Shukulu Kalunga

¹ Kengeni cizemo cakuhyana eci Tate alinaco kuli yetu! Cizemo cendi cakama manene ngeci valinakututumbula vana va Njambi, ngecivene, mu cifwa eci, mukemwo mutwafwa. Omu mukemwo vene vaka-kaye kuvatuzivuka, omwo vakevo kuvamuzivuka Njambi.

1 Yowano 3:1 Iomraidhean Croise

2 Samwele 7:19

Nameme ngoco anga ucili nakuwezelelako lalo, Shukulu Kalunga wa Akamwa ya Vyoshe, unanjikulaesa cikulaeso ca vatekulwila vange ku myaka ya kulutwe. Co unatava munu ngeci amone evi, Shukulu Kalunga wa Akamwa ya Vyoshe!

Myaso 31:19

Mwa vushunga ngozi yove yakama, ije iwunatulikila vaje vakukomoka, ije iwunapangela vaje vavanda muli yove, ku mesho a vana va vanu!

Njelemiya 3:19

Shukulu Kalunga alinakwendeka ngwendi, “Isalele, njashakele kukutambula ngeci upwe u munange nakukwana lifuti lyalivwa, lifuti lyalivwa manene mu kaye koshe. Njashekele ngwange unjitumbule nji isho ngeci kesi utunde lalo kuli yange.

Hoziya 1:10

Vanu va mu Isalele vakapwa ngwe lishen̄avu lya ku mema a kalunga, lije kuvasa kulilava nambe kuseteka. Ngecivene, ololo Njambi alinakwendeka kuli vakevo ngwendi, “Yeni kesi mu vanu vange,” oloni litangwa lilinakwija omo akendeka kuli vakevo ngwendi, “Yeni munapu vana va Njambi wakuyoya!”

Luka 20:36

Vakevo vakafwa ngwe tungelo kuvakasa lalo kutsa. Vakevo vanapu vana va Njambi, omwo vanasanguka ku vatsi.

Yowano 1:12

Oloni kuli voshe vaje vamutambwile nakukulaela kuli ikeye, wavanene moko yakupwa vana va Njambi.

Yowano 11:52

co kesi vakevo lika embwe, oloni akungulwile amo vanu va Njambi mu muvila umo vaje vanashandokela kweka.

Yowano 15:21

Oloni vakalinga vyuma vyoshe evi kuli yeni omwo yeni mwapwa muvange, omwo kuvazivuka uje wanjitumine.

Yowano 16:3

Co vanu vakalinga vyuma evi kuli yeni omwo kuvazivukile Tate nambe yange.

Yowano 17:25

Yove Tate wa vushunga! Vaka-kaye kuvakuzivuka, oloni yange njikuzivuka, co ava vazivuka ngeci yove wanjitumine.

Yowano 3:16

Omwo Njambi wazemene vaka-kaye manene ngeci waanene Munendi umolika, ngeci woshe akulaela kuli ikeye kesi anyonge, oloni akale na mwonyo wa myaka yoshe.

Loma 5:8

Oloni Njambi nasholola cizemo cendi cakama kuli yetu, omo a simbu ije twapwile tu vaka-vuvi Kilistu watutsililile!

Loma 8:19

Omwo vyakutanga vyoshe vili na cizango cakukengelela Njambi ngeci asholole vana vendi.

Loma 8:21

ngeci vyakutanga ku litangwa limo vikapatuke ku vundungo vwa kutsa, co vikakale na vumpau vwakupatuka kwa vana va Njambi.

Loma 8:32

Njambi kavyanene kwana Munendi umolika, oloni watweceleleye yetu voshe! Uje watwanene Munendi, kuma kasa kutwana vyuma vyoshe ndi?

2 Kolinte 6:18

Njikapwa nji ishweni, co yeni mukapwa vana vange va vanalume na ava va vanakazi, mwanendeka Shukulu Kalunga Muka-nzili yoshe.”

Ngalatiya 3:26

Akukulaela ngeci yeni voshe munapu vana va Njambi muli Kilistu Yesu.

Ngalatiya 3:29

Co nga munakundama kuli Kilistu, ngecivene, yeni munapu vatekulwila va Avilahama, co mukatambula vije vyakulaesele Njambi.

Kwituluka mu Mashiko 14:1

“Yeni munapu mu vanu va Shukulu Kalunga Njambi yeni. Ngecivene, omo mukalila a kutsa, kesi mukalicate a mivila yeni nambe kuteula vin̄ambu vya kumukulo wa maholo eni embwe, ngwe muvakalingi vanu vamo.

Kolose 3:3

Omwo yeni mwatsile, co myonyo yeni vanaishweke amo na Kilistu muli Njambi.

1 Yowano 3:10

Aka kakeko kaangu kakutungukwa akati ka vana va Njambi na vana va Liyavola, vaje kuvesi kulinga vyavivwa nambe kuvesi kuzema vakwavo, kuvapwile vana va Njambi embwe.

1 Yowano 3:2

Vasamba vange vanjazema, yetu ololo tunapu vana va Njambi, oloni kucasholokele mwamuvwa ngeci yetu tukemuka vati. Oloni tunazivuka ngwetu omo Kilistu akasholoka, tukalifwa nendi, omwo tukamumona ngwe muje vene mwaafwa.

1 Yowano 4:17

Cizemo cinatungukwa muli yetu ngeci tusimpe a Litangwa Lyakusompa, co tukakala naco omwo kuyoya kwetu kwa muno mu kaye kwapwa cifwa cimo ngwe Kilistu.

Kujombolola 21:7

Woshe uje ahyana akashwana vyuma evi, njikapwa Njambi yendi, co ikeye akapwa munange.