1 Petulu 4:2 - Livulu lya Shukulu Kalunga

² Ngecivene, kutunda ano kutwala kulutwe, munapande kuyoya yoyesi yeni ya ano asi ku nzili ya vutumbe vwa cizango ca Njambi, kesi ku mashungu a vunu embwe.

1 Petulu 4:2 Iomraidhean Croise

Myaso 143:10

Njilongese kulinga cizango cove, omwo yove wapwa u Njambi yange. Munzinzime wove wauvwa, unjitwamenene mu ngila yaivwa.

Hoziya 6:7

“Oloni vwasi-vwasi omo vakovelele mu lifuti ku Andama, co vapokwele cikumiiyo cije njalikumiiye navo.

Mateo 12:50

Woshe uje alinga cizango ca Tate ali mwilu, ikeye vene napu ndolome yange, na ndokazi yange, na vanana.”

Mateo 20:4

ngecivene, wavalekele ngwendi, ‘Neni lalo yeni mukapange ku lihya lyange, njikamifweta muyinapande fweto yeni.’

Mateo 21:31

Iyajo akati kaava vanu vavali walingile cizango ca ishavo?” Vamukumbulwile ngwavo, “Uje mwana wa mukulunu.” Ngecivene, Yesu wendekele kuli vakevo ngwendi, “Mwa vushunga njimileka ngwange, vaka-kutambula lisimu na vikwizi vakalivanga kukovela mu Vumwene vwa Njambi, yeni mukakotokela.

Mateo 7:21

“Kesi munu woshe anjitumbula ngwendi, ‘Mwene, Mwene’ akakovela mu Vumwene vwa mwilu embwe, oloni kuvanga vaje vakalingi cizango ca Tate wa mwilu.

Mako 3:35

Woshe uje alinga cizango ca Njambi ikeye vene napu ndolome yange, na ndokazi yange, na vanana.”

Mako 7:21

Omwo mukati, mu mbunge ya munu, mukemwo mukatundu viyongola vyavivi vije vimutwamenena ku vyuma vya vuvi, kwiva, kutsiya,

Yowano 1:13

Vakevo kuvapwile vana va Njambi ku cisemwa ca ano asi embwe, cisemwa cakusemuka ku munalume, oloni Njambi vavenya ikeye wapwile ishavo.

Yowano 7:17

Woshe ashaka kulinga vije vyashaka Njambi akazivuka nga evi njilinakulongesa vitunda kuli Njambi nambe nga njilinakwendeka na moko yange.

Loma 12:2

Kesi mulipwise ngwe vanu va muno mu kaye, oloni eceleni Njambi atengulule viyongola vya mu vimbunge vyeni. Asinoni mukazivuka cizango ca Njambi, vije vyavivwa nevi vimuvwaelelesa nevi vyakushungama.

Loma 14:7

Naumo wai wetu waliyolela endi lika, naumo wai wetu walitsila endi lika.

Loma 6:11

Mu ngila eyi vene munapande kuliyongola yeni vavenya ngweni munatsi, kwesekesa na vuvi, oloni mulinakuyoya muli Njambi ali Kilistu Yesu.

Loma 6:2

Embwe kesi ngoco! Tunatsi ku vuvi, co vatijo twasa kuyoyelamo?

Loma 7:4

Neni lalo cifwa cimo, vakwetu. Neni lalo munatsi omwo munapu vilyo vya muvila wa Kilistu, co ololo munakundama kuli ikeye, uje ivasangwile ku vatsi ngeci tupangele Njambi vipangi vyavivwa.

2 Kolinte 5:15

Co watsililile vanu voshe, ngecivene, vaje valinakuyoya kuvapandele kuliyoyela vakevo vavenya embwe, oloni vanapande kuyoyela kuli uje wavatsililile, co vamusangwile omwo yetu.

Efeso 2:3

Mwa vushunga vene tuvavoshe twafwile ngwe vakevo, co twayoyele vene ngwe ku cisemwa ca mashungu etu a vunu, twalingile vije vyoshe mivila yetu na mana etu akele nakuvilinga. Ku cisemwa cetu ca vunu ngwe vanu voshe, vatwimikilile tuyande ku vukalu vwa Njambi.

Efeso 4:17

Ngecivene, mu lizina lya Mwene, njiminangula ngwange, kesi muyoye ngwe vaje vaka-kujeneka kukulaela, vaje viyongola vyavo vyapwa vyangoco,

Efeso 5:17

Ngecivene, kesi mupwe vilema, oloni lingeni vije vyashaka Mwene ngeci muvilinge.

Efeso 6:6

Lingeni eci kesi omo valinakumikengelela, omwo mushaka kuvwaesa ku vimbunge vyavo embwe, oloni na vimbunge vyeni vyoshe lingeni vije vyashaka Njambi, ngwe vindungo va Kilistu.

Kolose 1:9

Omwo a cuma eci, simbu yoshe tukamilombelela, tunde aje twazivile vya ali yeni. Tulomba Njambi ngeci amishulise na mana a cizango cendi, na mana oshe nakuzivisisa kwoshe kuje kwanamyana Munzinzime wendi.

Kolose 3:3

Omwo yeni mwatsile, co myonyo yeni vanaishweke amo na Kilistu muli Njambi.

Kolose 4:12

Viindu vyeni kuli Epafalase, mukweni umo wakundama ku munga yeni uje napu ngamba ya Kilistu Yesu. Ikeye simbu yoshe akamyanuka mu malombelo endi, nakulomba Njambi ngeci amikolese nakwimana mbe, ngwe vaka-Yesu vanakolo mu vu Yesu, na na mukwononoka kwoshe ku cizango ca Njambi.

1 Tesalonika 5:18

kandeleleni mu visimbu vyoshe. Eci cikeco cashaka Njambi mukuyoya kweni muli Kilistu Yesu.

VaHevelu 13:21

amyane vyuma vyoshe vyavivwa vije munajeneka ngeci mulinge cizango cendi, ngeci apange muli yeni vije vimuvwaelelesa ali Yesu Kilistu. Co kuli ikeye kukale vumpau ku myaka na myaka! Ewa.

Yakomba 1:18

Ku cizango cendi natutanga yetu a lijwi lya vushunga, ngeci tupwe mushoke wakulivanga akati ka vyoshe vije vyatangele.

1 Petulu 1:14

Pweni vaka-kwononoka kuli Njambi, co kesi mutave kuyoya kweni vacendese ku vizango vije mwakele navyo omwo mwakele ku nzimba.

1 Petulu 2:1

Ngecivene, umbileni kuti vyuma vyoshe vyavivi, kesi mwendeke makuli lalo, nambe kulinga civembulu, nambe lifuwa, nambe vyendeka vyakushaula.

1 Yowano 2:17

Kaye na vyuma vyoshe vilimo vije vanu vashungwiya lilinakwita, oloni vaje valinga cizango ca Njambi vakayoya myaka yoshe.