7 Ŋɔn Naawunni biwuttigu puuni ka ti mari fa-m‑basi u ziim la zugu; tumbeeri kyɛ-m‑pɛŋŋi ka ti mara, ka di zaa nyɛ la Naawunni piiniseaa tin bu sum ni ka la, ka u ti ti.
Kaman man Ninsaala Bii bu kyɛ na ni ba tumni n‑suŋŋni ma, amaa n kyɛ na ni n ti tumni n‑suŋŋni niriba, ka zaŋŋi n nyɔvuri m‑pa talima ka niriba pam nya tiliginsim.”
N ziim nla. N ziim wa nin ti yi na, ka di yiibu na nin suŋŋi niriba pam ka kyɛ ka nangbanyinni zaalipaalli ti zaani n‑tiri ba, tumbeeri taalli kyɛ-m‑pɛŋŋi zugu.
Ni, ba nin zaŋŋi Masiiya yuuri m‑piili Gyɛrusalɛm timpuuni m‑moonni lahabaari maa n‑ti duniya wa zaa niriba, ni, ba ŋmaligma ka kyɛ ba tumbeeri tuma, ni ba ti nya ba taalli kyɛ-m‑pɛŋŋi.
Ya yi ti kyɛ sɔ tumbeeri taalli m‑pɛŋŋi u, di daama siri nin nya kyɛ-m‑pɛŋŋi: ka yan mun yi kyɛ ka sɔ taalli ti kpalim n‑dɔli u, di daama nin kpalim m‑mari taalli.”
Ka Piita daa labsi n‑yɛli ba, “Tuuba! Ya kyɛli ya tumbeeri tuma m‑basi, ka ya sɔkam zaa yinni yinni deaai Naawunni koom suubu, Yisa Masiiya Tuligra yuuri zugu. Ka Naawunni nin kyɛ ya taalli zaa m‑pɛŋŋi ya, ka ya nin deaai piini Naawunni saani, piini maa mun nyɛ Naawunni Sii Kasi kpeebu ya sufu ni.
Dizugu, m Badima, n susiri ya, ni, ya gɔsim ya mansi, ka laa n‑guri ninvugseeba Sii Kasi maa ŋɔn zaŋŋi n‑niŋi ya nuusi ni ni ya gɔsiri ba maa, hoo ban guri peesi seem mooni la. Naawunni niriba n nyɛ ba, ŋɔn daa zaŋŋi u maŋtoori ziim n‑yɔ seeba samni, ni ba ti nya nyɔvuri.
Bee, i bu baŋŋi, ni, Naawunni zɔri i la namboo ni u ti zi i n‑taasiri ziseaa ka i ŋmaligi ka kyɛ i tumbeeri ni i teesibeeri yɛla? Lala zugu ka i zeemni ŋɔn Naawunni nambɔzoaa, ni u veelim, ni u sugru, an galisi n‑tiri i: bee, m ma'ai ni?
Ŋɔn Yisa muna - Naawunni daa zaŋŋi u n‑tisi hoo maaligu, ni u ti nyɛ sɔ ŋɔn ziim mari kyɛ-m‑pɛŋŋi, ka di mun dɔli la yɛdda. Lala zugu Naawunni n wulisiri u mammaŋŋa yɛlimaŋni ŋɔn bɛ seem, dama sahanseaa la u daa di sugru zaŋŋi n‑kyaŋŋi ban daa daŋŋi n‑tum taalli.
Ka di bu laa n‑ya'ai ka u boori u ti wulisi u gyirima ŋɔn veeli pam seem. Ka dizugu u daa niŋi lala n‑tiri ninvugseeba ban ŋmanni la veelim tuma laasi la, ka u zɔ ba namboo, dama u daa daŋŋi m‑maali ba ni ba ti nya gyirima.
Ŋɔn Naawunni zugu ka ya bɛ Yisa Kirisita ni; ŋɔna ka Naawunni kyɛ ka u leebi yɛm n‑ti ti, ni yɛlimaŋni, ka u laa n‑kyɛ ka ti leebi Naawunni mammaŋŋa niriba kasi kasi, ka laa n‑nya fa-m‑basi.
Dama ya mi ti Dugma Yisa Kirisita tunsuŋŋu veelim ŋɔn nyɛ seem maa: ni, u daa su arizikki zaa, amaa yarim zugu ka u daa leebi fara daana, ni lala ti kyɛ ka ya mun leebi bundaandima.
Lala Sii Kasi maa bɛ la ti saani n‑wulisiri, ni, u nin kyɛ ka ti di faari; ni, u nin kyɛ ka ba yɔ ti samni n‑fa ti m‑basi; ni, u nin kyɛ ka ti yɛla kyɛ ka pɛ'abu bɛ ni n‑tiri Naawunni.
Ka n laa n‑susiri, ni, ya sufu nin nya ninneesim ka ya baŋŋi tama seaa zugu ŋɔn booli ya la, ka ya laa m‑baŋŋi ya faari ŋɔn ya zoaai seem m‑mari gyirima la, n‑tiri yaseeba ban nyɛ ŋɔn Naawunni dina maa.
Man muna - halli ni Naawunni niriba zaa ŋɔn gaari ma zaa yɔri, u daa zaŋŋi piini wa n‑ti ma na, ni n ti moonni lahabasuŋŋu n‑tiri ban pa Yɛhudiya dima la. Ka lala ka ba ti baŋŋi Kirisita nya'asim ŋɔn tibsa seem, halli ni sɔ ku toaai m‑baŋŋi di gbinni zaa yɔri.
Ban muna - ŋɔn Naawunni boori u wulisi yɛlisɔ'ara maa tibsim ni gyirima ŋɔn nyɛ seem maa n‑ti ba, ka a bɛ la ban pa Yɛhudiyadima maa saani gba. Ka di gbinni nyɛ la: ni, Kirisita bɛ la ya saani, ka di nyɛ la tama n‑tiri ya, ni, ya nin nya gyirima.
Yan daa na bu guni gunibu wa sahanseaa la, ka daa kpalim m‑bɛ ya yɛlibeeri ni la, lala saha ka Naawunni daa la'asi ya Kirisita saani n‑ti ya nyɔvuri. U daa kyɛ ti tumbeeri maa zaa taalli m‑pɛŋŋi ti.
N tumni lala ni di ti kyɛ ka ba sufu ti kpamsi, ka ba mari la nangbanyinni ni wurilim ni taaba. Lala ka ba nin ti baŋŋi Naawunni bunsuma zaa, birisigu ka ni, halli nti baŋŋi Naawunni yɛlisɔ'ara maa gbinni - din nyɛ Kirisita la.
Ŋɔn Yisa n daa zaŋŋi u nyɔvuri n‑tisi, ni u yɔlisi tirima ni ti ti leebi u toori niriba maa. Ka u laa n‑yiisi ti tumbeeri kam zaa ni, ka nyeesi ti ka ti leebi kasi, ka ti sufu kur nin boori la ti tumni din veela.
U daa deaai ti tumbeeri taalli n‑niŋi u saani u kum dɔpulli maa zugu; ni di ti kyɛ ka ti kpi zaŋŋi n‑kyaŋŋi ala'akyi ni, ka laa n‑doaai na nti bɛ yɛlimaŋni soori ni. U dansi maa zugu kyɛ ka ti nya alaafɛa.
Ya bu nya? Kirisita daa kpi yimmu ti tumbeeri zugu, ka a yɛla naai; ŋɔna yɛlimaŋni zaa daana daa kpi tirim halibeoo dima zugu, ni u ti zaŋŋi ti n‑taasi Naawunni saani. Ba daa ku u ningbiŋŋu, amaa u siiya daa doaai n‑na vu.
Wurilim mun ŋɔn nyɛ seem nla#:- pa la tirima n wuri Naawunni, amaa Ŋɔna n wuri ti ka tum u Bii la na ni u ti leebi maaligu kan ti ti soori n‑kyɛ ka ti nya kyɛ-m‑pɛŋŋi ti tumbeeri zugu.
Ban n daa nyɛ seeba ban mari ba mansi suŋŋa ka bu boori pɔ'aba, ka ba daa bu di pɔ'aba. Ba daa dɔli Pɛbila maa n‑kyaŋŋi ŋɔn daa yi wa seelikam zaa. Ninsaalidima zaa sunsukkuni, ban ka ba daa daŋŋi n‑yɔ ba samni n‑tiligi n‑ti Naawunni ni Pɛbila maa.
Ka ba daa yuumni n‑yɛtti, ni#:- “Nyin n sumsi ni i deaai bukku maa, I mun sumsi ni i lakki ka buntabinna! Dama nyini ka ba daa pun kɔrigi, Ka i lala kum zugu daa yɔ sɔkam samni N‑da ba n‑ti Naawunni na: Zuliya pam, ni yɛttɔ'azuna pam dima, Ni tinsi pam niriba, ni bura pam.