1 Peteru 3:4 - Sateré-Mawé

⁴ Taꞌatukyiꞌat taꞌatuekat ikahu kahato rakat mekewat mehit rakat hekat rakat kawiat uru kawiat saity koꞌi hawyi taꞌatupag yne taꞌatuꞌasap taꞌatupiit koꞌi ete uru imehit rakat yn taꞌatupag. Teꞌeruwepainug kahato wen maꞌato taꞌatupiit ete yn. Maꞌato eipe waku poꞌog ewetunug eipyꞌa pe ehekat ikahu hap eiwanetup hawe eiwese hap eiwepiit hap koꞌi. Miꞌi ewetunug mote ikahu rakat sese wo eweikupteꞌen Tupana wanetup hawe. Hekat rakaria sese wo eweikupteꞌen Tupana wanetup hawe Tupana mikyꞌesat ewy ewetunug mote.

1 Peteru 3:4 Iomraidhean Croise

Mateu 11:29

Pyno torannia uimohey haria eiwemohapap to uhete kat pote uito waku kahato areineꞌen iperupꞌi kahato rakat. Miꞌi hap kaipyi eweipuẽti kuap aru eiwemohy hap sese.

Mateu 21:5

-Tuut wyti aru Aipotypot sese aihũ Iumentu tote ahewowi eweiꞌe ro tawa Ierusarẽi miaria pe e. Yt morekuat ewy hin i tuut maꞌato paa e hat aihũ Iumentu mepyt hit tote e ti saꞌawyꞌi te wuat miwan me Isaia 62.11 pe Iesui etiat tohenoi.

Mateu 23:26

Pyno miitꞌin woꞌonapin haria yt ehehapytig hin rakaria e. Taꞌi kuiꞌa ihaꞌumpype ipit pit hap ewy topyhuꞌat ehewa ikahu wen. Pyno waku saꞌawyꞌi eipyꞌa eweikoho yt naku i nug hap koꞌi moweityk hamo e. Miꞌi hawyi ten eiminug hap koꞌi iꞌewyte waku raꞌyn topyhuꞌat e.

Mateu 5:5

Miꞌi hawyi Iesui toꞌe i -Pyno eiperia ti taꞌi paa e haria eweikupteꞌen pote ti aru putꞌok e Tupana miium ehepiat aipoityro hap.

Iruka 11:40

Yt weꞌeg i kahato rakaria ti rat eipe e. -Pyno Tupana miit nug hat toineꞌen. Taꞌi iꞌewyte toineꞌen miit ipyꞌa piat nug hatno. Miꞌi pote toikuap kahato aikotã eipyꞌa piat pe. Toikuap kahato eipit pit hap koꞌi eipyꞌa piat pe.

Iruka 16:15

Miꞌi pote Iesui tiꞌatuwesat -Eiperia miitꞌin mimotypot haria wo eweikupteꞌen neran pykai Tupana tikuap kahato raꞌyn aikotã eipyꞌa piat hap koꞌi e. Taꞌi eweikupteꞌen miitꞌin mimotypotno maꞌato yt nakuaria i wo eweikupteꞌen Tupana wywo e.

Humanu 1:23

Tupana toineꞌen wuatꞌi eꞌat piat ieineꞌen hat pykai mesuwarotiaria yt timohey i mio tã e hap. Taꞌi yt taꞌatumotypot hin i Tupana Sese mekewat Wuatꞌi Eꞌat Piat Ieineꞌen hat. Maꞌato taꞌatukyꞌesat poꞌog taꞌatupo wuat taꞌatuminug tupanaria saꞌag hit koꞌi. Miꞌi hawyi miitꞌin me -Eipe ti tupana iꞌatuꞌe saꞌag Tupana minug koꞌi pe iꞌatuꞌe. Taꞌatunug miitꞌin mesuwarotiaria taꞌatuetupana wo. Miꞌi hawyi miitꞌin iãꞌãkap mo wuat minug koꞌi kape teꞌeruwepỹꞌãtutuk -En ni tupana iꞌatuꞌe. Iraniaꞌin weitaria iãꞌãkap koꞌi kat kat kawiat mo wuat taꞌatunug hawyi -Meimuẽ ni tupana sese iꞌatuꞌe saꞌag. Iraniaꞌin miat koꞌi pira koꞌi iakare koꞌi iãꞌãkap koꞌi taꞌatunug saꞌag taꞌatuetupana wo. Taꞌatunug taꞌatupo wo hawyi miꞌiria kape teꞌeruwepỹꞌãtutuk -Miꞌiria so tupana iꞌatuꞌe saꞌag. Moiꞌok kape iꞌewyte iꞌatuwẽpapꞌi aat kaꞌap maꞌato taꞌatunug hat kape Tupana Koro kape mekewat Poꞌog Poꞌog Ikahu Torannia Tominug Koꞌi Kawiat Rakat kape yt kat i iꞌatuꞌe hap are. Teꞌeruweꞌywyk kahato Tupana sese kaipyi taꞌatukuap saꞌawyꞌi pykai. Nuꞌe saꞌyruꞌin saꞌawyꞌi wuat yne aito pote.

Humanu 2:29

Taꞌi Tupana ikuap kahato toꞌywania sese koꞌi katupono sio toineꞌen taꞌatupyꞌa pe Topaꞌãu Wakuat sio yt hap. Toikuap kahato sio waku pe tukupteꞌen sio yt hap. Yt tehaꞌat hin i wemusin ãpy sokpe tek hap toineꞌen sio yt hap kape maꞌato aiwanetup hap kape tehaꞌat kahato hawyi aipyꞌa piat kape tehaꞌat kahato hawyi toikuap yne raꞌyn aipyꞌa piat sio waku sio yt. Miꞌi hawyi toꞌe Topaꞌãu mikyꞌesat nug haria pe -Eipe uiꞌywania sese e katupono Uipaꞌãu miat einapin hap ewy kahato ewetunug e. Miꞌi pote eipe uiꞌywania sese eweikupteꞌen e Tupana tomikyꞌesat nug haria pe sio Iuteu ywania sio wẽtup ywania pe. -Waku kahato eipe e Tupana ahepe pote waku pe watoineꞌen. Karãpe iraniaꞌin -Yt naku i kahato eipe iꞌatuꞌe ahepe wen maꞌato watikuap yt pywo pe i raꞌyn iꞌatuꞌe hap katupono Tupana wanetup hawe waku pe watoineꞌen mote.

Humanu 6:6

Yt naku i kyꞌesat hap iwato kahato ahete. Miꞌi hap ete yn ahehapap saꞌawyꞌi te. Maꞌato miꞌi hap upi Aikaꞌiwat Iesui ikuꞌuro ariaꞌyp posak ete hawyi aiwepywiat yt naku i nug kyꞌesat hap topyhuꞌat Iesui piit kuꞌuro hap wywo. Miꞌi hawyi Iesui ikuꞌuro hawyi aimikyꞌesat saꞌag ikuꞌuro iwywo. Koitywy watikuap aiwetiat yt naku i nug hap kyꞌesat hap tuweityk taꞌyn.

Humanu 7:22

Mekewat uito sese atikyꞌesat kahato Tupana ehay e hat uipap kahato Tupana piat ainapin hap upi.

2 Kuriniu 10:1

Uito ti eimuꞌe hat sese saꞌawyꞌi wuat. Haꞌawyte Tupana uipoꞌoro ehewowi. Miꞌi turan worohoꞌonapin perupꞌi puo aikotã Aikaꞌiwat Iesui ainapin hap ewy aikyꞌe hap wywo. Saꞌawyꞌi ihakyꞌeꞌi hakyꞌeꞌi rakatno uito areineꞌen eipyꞌasetpe turan poꞌog yi kape. Maꞌato koitywy areineꞌen pya eikai. Miꞌi pote worohoꞌonapin uimiwan me haty wo uiwemotypot wywo.

2 Kuriniu 4:16

Karãpe urutaꞌakasa ehepiat imohey hap kapiat hawyi urutoꞌe -Pyno waku poꞌog wahoꞌopot iraniaꞌin muꞌe Iesui etiat hamo urutoꞌe. Maꞌato koitywy urupiit yt hesaika kahato i saꞌawyꞌi wuat ewy maꞌato miꞌi pykai poꞌog uruesaika saꞌawyꞌi wuat kai urupyꞌa pe uruwanetup hawe Tupana esaika hap poꞌog uruete saꞌawyꞌi kai katupono Tupana Paꞌãu urumopakup kahato Iesui ehay moherep hamo wuatꞌi eꞌat pe. Miꞌi pote yt uruiꞌatoiat hin i sehay wakuat etiat miitꞌin muꞌe hap.

Karasia 5:23

Yt wemowato haria wo i watoineꞌen. Wewaĩ kuap kahato haria wo watopyhuꞌat. Karãpe miꞌi tã e hap ewy watunug hawyi yt kat i ahewaĩ Muisei mienoi kaipywiat hap tuwẽtem aipiit pyi e. Miꞌi pote iperupꞌi rakatno watoineꞌen e. Watuwenapin kahu kahato pote miꞌi hap yn tuwẽtem Tupana Paꞌãu kaipyi aipiit pyi. Miꞌi tã e hap yne. Miꞌi waĩꞌe hap mopoꞌinik hap yt kat i toineꞌen e.

Ewesu 4:2

Yt naku i watoꞌe aiwanetup hawe -Uito poꞌog iraniaꞌin imohey haria kai yt naku i watoꞌe. Pyno toꞌiro watoineꞌen hãpyk kahato rakaria wo. Waku watuwepotpap Aikaꞌiwat kape aiperupꞌi wywo yt kat i aipyꞌahak hap mywo waku are. Waku watimoherep iraniaꞌin miitꞌin kyꞌe hap yne aiminug koꞌi ete are. Waku watiꞌatukyꞌe iraniaꞌin yt iꞌatuwese i pykai.

Korosi 3:12

Waku watuwepainug hap ewy waku ahesokpe pakup watopag maꞌato wẽtup ahesokpe pakup woꞌokyꞌe hap kawiat. Wẽtup aipainug hap woꞌowese hap. Wẽtup aipainug hap -En poꞌog waku uikai e hap aiwanetup hawe. Wẽtup aipainug hap paa e hap. Wẽtup hap aipainug hap aiperupꞌi hap. Wẽtup Iesui mohey motꞌi hap. Miꞌi koꞌi wo waku watuwepainug are.

Korosi 3:3

Watimohey Iesui hawyi wẽtup piit ewy watoineꞌen. Ikuꞌuro hawyi aikotã watoineꞌen ipiit pe hap ewy ikuꞌuro hawyi aikuꞌuro hap topyhuꞌat hap ewy. Tuwẽtem miꞌi pote watuwẽtem aito guꞌuro pyi hap ewy. Koitywy Aikaꞌiwat Iesui toineꞌen atipy pe Toꞌywot wywo i raꞌyn. Miꞌi hawyi aito ipiit pe watoineꞌen. Miꞌi pote waku yt kat i mesuwarotiat saꞌag koꞌi kape watuwanetup.

1 Tesaronika 4:11

Uiwyriaꞌin worohoꞌonapin pywuat sehay wo. Woꞌoeremopusu haria wo yt naku i aito watukupteꞌen. Waku teꞌen aipotpap kaipyi aimiꞌu ahekareꞌen aikotã urutoꞌe saꞌawyꞌi hap ewy waku watoiat yne aiperup hap koꞌi urutoꞌe.

2 Tesaronika 3:12

Miꞌi tupono waku waĩ watoꞌe iperup takaria pe. Aikaꞌiwat Aipotypot Iesui yt tikyꞌesat i sẽtup i sẽtup i e haria wo watoineꞌen hap waku watoꞌe miꞌi hat pe. Iesui tikyꞌesat watoiat mekewat aipotꞌeremopusu hap hawyi waku aiwepotpap aimosakup i hap aiwemosero hap kaipyi yn waku aimiꞌu ahekat toineꞌen waku watoꞌe aiwoꞌope.

1 Timoteu 2:2

Iꞌewyte waku wahẽtup Tupana pe -Etiꞌatupowyro o uruporekuaria uruꞌakag koꞌi mesuwarotiaria. Urupowyro kahato urutukupteꞌen hap ete hamo meiũpe waku wahẽtup. Etiꞌatupowyro uruieineꞌen hap wẽtup ehay yn hamuat. Yt karãpe i saꞌag uruete hamuat yt wẽtup ok i urupyhyp pyhyp wakuat nug hap ete emikyꞌesat nug wuatꞌi puat hamo. Etiꞌatupowyro morekuaria tuꞌisaria waku kahato wahẽtup Tupana pe.

2 Timoteu 2:25

Hepama towese popuo toiꞌatunapin kuap kahato ipyꞌahak teran tetiat rakaria. Etiꞌatumuꞌe mio tã iraniaꞌin mote meiũran Tupana tum kuap iꞌatuepe paa iꞌatuꞌe hamuat taꞌatuꞌatoiat mono taꞌatuminug saꞌag -Pywo raꞌyn taꞌatuꞌe haype.

Titu 3:2

Iꞌewyte yt uwe teiꞌo eweiꞌatuehay moweukaꞌi ereꞌe o. Iꞌewyte miitꞌin wuatꞌi wywo o eiwese eweikupteꞌen ereꞌe o Titu. Iꞌewyte waku eweikat ewy ewese hap wywo. Iꞌewyte eiperupꞌi kahato yn o yne miitꞌin ete eweikupteꞌen ereꞌe o Iesui mohey haria pe.

Tiaku 1:21

Waku ti watoiat yne yne aiminug yt naku i hap koꞌi iꞌewyte yne aheko saꞌag nug hap koꞌi. Miꞌi hawyi ti waku watuwewaure kaꞌa kahato Tupana ehay kape paa aiꞌe hap wywo yn katupono Tupana yn ahehakyeraꞌat kuap tehay wo. Miꞌi pote -Uimuꞌe kahato ro ehay nug hamo waku watoꞌe Tupana pe. Tupana etikoi kahato o ehay uiwanetup hawe waku watoꞌe. Yt naku i aheko saꞌawyꞌi wuat ewywuat ahewaire waire nug hap.

1 Peteru 1:23

Kat pote aito Tupana saꞌyruꞌin sese Tupana sakiꞌytꞌin sese ewy aitoria katupono Tupana Paꞌãu aity ewy aimoherep pakup i raꞌyn. Saꞌawyꞌi aimoherep haria aity aiꞌywot. Aipiit nug hap taꞌatunug mekewat toꞌupiꞌa kaipyi mekewat iãꞌỹi kaipyi ainug. Miꞌi ti waku kahato wen maꞌato yt toineꞌen motꞌi i aipiit. Aikotã aipiit nug haria ewy aikuꞌuro neꞌi are. Meiũran ikuꞌuro raꞌyn iꞌatuminug aipiit maꞌato aiwemoherep pakup i hap Tupana kaipywiat mekewat hãꞌỹi Tupana ehay aity aiꞌywot ewy topyhuꞌat. Miꞌi ti ainug wuatꞌi eꞌat piat aimoieineꞌen hamuat. Yt karãpe i ikahuro Tupana ehay maꞌato toineꞌen wuatꞌi eꞌat pe. Miꞌi kaipyi aiwemoherep hawyi watoineꞌen wuatꞌi eꞌat pe are.

1 Peteru 3:15

Waku poꞌog watimotypot Tupana aipyꞌa pe. Miꞌi hawyi waku watikat sehay wakuat aiwanetup hawe yne miitꞌin wesat hamuat hap. Karãpe putꞌok e wẽtup ok ahowawi hawyi toꞌe ahepe -Kat pote etimohey Iesui. Miꞌi hawyi waku watimoherep iꞌatuepe aimimohey Iesui ahehay perupꞌi puo yt kat i -Uito poꞌog eikai aiꞌe hap wywo. Maꞌato aikotã paa e haria ewy waku watiꞌatuekyi miitꞌin aimimohey Iesui kape.