JOSHUA 5:13 - KHYINGEI PU'TLOU Bible (BSI)

¹³ Heirouri Joshua'ne Jericho pongra mayungbi leiyei kheenrou, ani mangalbi thiyeinungri, aiyei maibongra napawa khatni aihutra raalshon phuithutbi shinbini loumayung ani mukur; heirouri Joshuane aiyei pongra tonkarsilbini, heitoubi anung heikngai- “Nangri kanungeiko, nimanung kaiyei yeekna thimi rapbeiko?”

JOSHUA 5:13 Iomraidhean Croise

KANTHOUNA 18:1

Umpune Mamreyei phaikarra bok'heengyao haangra Abraham'nung shak'rungrungni muyerpikur; heirou ani nunghang-tlaikal shalutyei kheenrou aiyei khuiluphi cheem mangkhallei daikallimbi ombini leiyeinung;

KANTHOUNA 18:2

heirou ani aiyei mitni loumangalbi thiyeinungri, napawa napung'khyum aiyei maibongra kanthrinrap mayungbini heiklei; heirou ani yaya mulhakkur heirouri, ani aiyei shumtrum'rouwei yaya murilnanungei louchanrokur, heitoubi thleira khuklu kanthrunchani kanel'lhakbi, mai sikhuplhakbi khrumchakur.

KANTHOUNA 28:16

Heirouri Jacobne ipnarei kanthoubi ani kyun, “Umpuri tanghakpani bi arou leileime touri keine ningmukhoumak.”

KANTHOUNA 33:1

Heirouri Jacob'ne mangalthutbi aiyei mitni louthiyei kaallouri, thilak, Esau'ne aiyei thimi macha-phali'le kalhonni wakur heiya ani loumuwurla. Heingamei ani aiyei chanao rapya Leah'le, Rachel heirou aiyei shok napuiyarap napung'khniyei hangra yerkhaibi loukhoukur.

KANTHOUNA 33:5

Heitoubi Esaune mangalthutbi aiyei mitni thinarouri, napuiya raple yaiyei chanao rapya mulhakkur; heirouri ani loukngai, “Nangkou kalhonbi kleirap heiri huhuwo?” Heirouri Jacobne, “Yarap heiri neishok keinungei Dunpune kringpibi phayerkur keiyei chanao rapme,” toubine louyunpikur.

1 CHAANLAM 12:22

Heisitoubi David'ya raal pangnungei wachangkur raallui rapri nungkhatnuinui'yei Dunpuei Thangring naksine thimi katchungduikur.

1 CHAANLAM 21:27

Heirou Umpune Thangringya chaytlouni yukshunkur heirouri, ani aiyei raalshon heiwaya shonkhum rilla ronlhakthu.

1 CHAANLAM 21:30

Heiya David'neri bi heitamrou kabine Dunpu'nungei tlou ngaithikur manimakura, ngamri ari Umpuei Thangringei raalshon heiwani chimathunyerwurla.

HOYOUNA 23:23

Kouweiyo toulanungri, Keiyei Thangringni naiyei maibongra lam ruipibi, heirou naya Amoria rapbei, Canaania rapbei, Perizzia rapbei, heirou Jebusia rapbei ramra ruilhakpirou; heitoubi Keine ya nammaya tumni maangyerrou.

DANIEL 10:5

heirou keine mangalthutbi thiyeinungri, thilak, napawa khat, phaikhringei shambya bangbine, aiyei shintlakra Uphaz'yei sina-khyingei shintlakrui khat mshuibine heiklei keine mukur.

DANIEL 8:3

Heirouri keine mangalthutbi thinarouri, thilak, chee khintam klei yaopa khat kungpalra mayungbi kleiya keine mukur. Chee khintam heiri shang, heiya chee paangkhat heiri pangkhatreiya duini shaang, chee heiri hillei katpukthut.

ZECHARIAH 1:8

Masanung keine thiyei kheenrouri, thimi khatne sapuk mrao khat tungbine, phaitlaiyei heengyao hangra mayungbine klei heiwaya mulhakkur; heitoubi aiyei hillani sapuk mrao khatkhi, mrao-bungrang khatkhi, heirou khngoukhi mayungbine heiklei.

MSHING KANSHER 22:23

Heirouri gadha heini UMPUei Thangringni, aiyei hutra raalshon phuithutbi shinbini lamtlaira mayungbi louklei heiwaya mulhakkur heirouri, gadha heiwani lamruira mai khreilhakkurbi phailou lhangra chakur. Heitounei ngamrou Balaam'ne aiyei gadha heiwaya umbini lamranung hanui hulmallengkur.

MSHING KANSHER 22:31

Heirouri UMPUne Balaamyei mitmai waaryerwurla, heirou UMPUei Thangringni aihutra raalshon phuithutbi heiwaya tlangbini lamtlaira mayungbi louklei heiwaya ani mulhakurla. Heirouri aiyei lu sikhuplhakbini thleira khuplhop kanellhakbini leikur.

PAOCHA 1:10

Heirou yane aiyei kanthumbangkur heiwaya yaimitne heisi Thangmun lhangra thimanthrambi leiyeinung, khngou shamb mansambine napawa napung-khnine yaipongra mayungbi,

JOSHUA 6:2

Heirouri Umpune Joshua'nung shun: “Thilak, Jericho'ri Keine aiyei Krungle, heirou aiyei hutmantrang shireikhei raallui rapyakhi neihutra pilhakurla.

KANRETHUTPI 1:13

heirou yaihangra thimiyei Chanapawaei shakrungnak khatkhi, Aiyei hoparbil yongtlungni linglikchul khat naabi heirou Aiyei malungpakra sinayei shinkai ruikhi yeetbi kyao khatkhi keine mukur.

PICHAR PURAP 13:11

Heirouri Manoah'ne kanthoubi aiyei nuyei hilla louchanthungkur, heitoubi ane hungtlungbi napawa heinungei hungkngai, “Napuiya awinungei tlou shunkhoukur napawa heiri nang nimakeiko?” Heirou ane loumallangkur: “Moi, heiwari Keime!”

PICHAR PURAP 13:22

Heisi tounarouri Manoahni aiyei nuya shun, “Kakhu-shangramri shuimakni hirou leiyame, kouweiyo toulanungri, kane Dunpuya muwurlame.”