Yakapingula 3:7 - Amazwi Yakwe Leza 2013

⁷ Aina Izlaeli yilila Yawe Leza wao, yiifya kunoli nu kupepa Baali na Asyela, tuleza tuluwi tutu.

Yakapingula 3:7 Iomraidhean Croise

1 Yamwene 16:33

Alino mu ng'anda kwene iyo, Aabu aikamo unkolanya wakwe Asyela. Mu musango kwene uwo Aabu acita ivintu ivivule vyakulenga Yawe, Leza wa ina Izlaeli ukusoka, ukuluta pali vivyo ivyacisile Yamwene aku Izlaeli yonsi amukolelile.

1 Yamwene 18:19

Caleka ndakai ulinzile ukwama antu yonsi aina Izlaeli, yize yankomenkanye pa Mwamba wa Kalimeli. Apa kwiza ulete na yakasema yalya imyanda ini na makumi yasano yakwe Baali nga na yakasema imyanda ini yakwe Asyela, yano yakaimulwa pi tebulo lyakwe Yezebele.”

2 Yamwene 23:14

Umwene Yosiya nupya atamola nu lucesi lwa mawe luno yimike nu kukomola ulucesi lwa unkolanya wakwe Asyela luno lwali ulucindame sana, nu kukolana lwakoline nu mwanaci. Aluno yapepanga pa kumucindika wakwe Leza wao. Na payelile ivintu vivyo, Yosiya aimika penepo amafupa ya antu.

2 Yamwene 23:6

Yosiya afumya nu lucesi lucindamisye umu Ng'anda ikulu yakwe Yawe, luno yapepanga apa kucindika Asyela. Nalo kwene alusenda ukunzi ya musumba nu kulutwala uku Cifoloma ca Kiduloni, akuno yaya yalocela. Ni itwi alisansantila apapela ya malindi kuno yakazika umuntu ali wensi.

2 Milandu 15:16

Umwene Asa wafumizye Maaka uwali a nyinakulu, pa cifulo cakwe unamwene apamulandu wakuti nakulu wiyo walanga wapanga ulucesi ulwakolana nu mwanaci, luno wene wapepanga apakucindika Asyela, wakwe Leza wikwata. Fwandi Asa walanga wamanya cico, ali pakulutema, aluwisya nu kulukomoola. Aya alocela nu mu Cifoloma ca Kiduloni.

2 Milandu 24:18

Antu lyene iyata ukuya ku Ng'anda ikulu yakwe Yawe, Leza wa vikolwe vyao, yatandika kutumikila unkolanya wakwe Asyela nu tuluwi. Alino ukali wakwe Yawe iuponela aikazi amu Yuda nu mu Yelusalemu kwene.

2 Milandu 33:19

Vino Manase wapepanga Leza na vino nawe wamwasukanga, ni vintu vyonsi iviipe vino Manase wacitanga, ni ncende zya kupepelamo utuluwi zino wakuuzile, ni vinkolanya vyonsi pamwi nu tuluwi twakwe Asyela tuno wapanzile pa kucindika Asyela, vyonsi vyalembwa mu mpapulo zyakwe yakasema.

2 Milandu 33:3

Wakuululwile incende zyakupepela mwenemo zino isi Hezekiya watamozile. Akuula nu tuvuwa apa kupepela Tubaali nu kupanga amaunkolanya yakwe Asyela.

2 Milandu 34:3

Umu mwaka wakwe cinani uwa kuteeka kwakwe Yosiya, ale acili sile akalumendo ka myaka ikumi na mutanda, wene watandike ukupepa nu kucindika sana Yawe Leza wakwe Davidi icikolwe cakwe. Ipapita sile imyaka ini, atandika ukutamola incende zizi muno yapepelanga tuleza utuluwi kumwi nu unkolanya wakwe ka leza kanaci ka Asyela. Atamola nu tuluwi tuze tonsi utwasyala.

2 Milandu 34:7

Aonona utuvuwa na maunkolanya yakwe Asyela, asyunola ni viluwi nu kukomola utuvuwa tonsi utwakocela penepo ubani. Alino aswilila mwenemo ku Yelusalemu.

Masamu 106:35

lelo yamatwalana sile na inamasi yakopola ni micitile yao.

Masamu 106:36

Yatumikila nu tuluwi twao, tuto utwayafutukile ituya wa nkose.

Masamu 106:7

Ivikolwe vitu umu Eguputo vitatezizye ivipezyamano vyako, vitiwisye nu luse lwako uluvule, vyatalamila umucindami kuli Yemba Muyenzu.

Kufuma 34:13

Mwawisya tuvuwa twao, monone amawe yao amuzilo yano iimika, nupya muwisye incesi zyakwe Asyela.

Yelemiya 23:27

Uku viloto vyao, yakalandilana nu kwelenganya ukuti yalalenga antu yane ukwilila izina lyane, ndi vino ivikolwe vyao vilile izina lyane umu kulondela Baali.

Malango 16:21

“Lino mwaca mumakuulila Yawe Leza winu kavuwa, mutakezye ukusimpa mu mbali ya kavuwa kako ulucesi lwa cimuti ulwa cimanyililo cakwe kanamwene ka Asyela.

Malango 4:9

Ali cino fwandi cenjelini! Nupya lino mucili nu umi, mutakezye ukwilila vintu vino mweisikulu mwailolela na manso inu. Muce mwanena ku yana yinu na izikulu inu

Malango 8:11

“Musininkizye ukuti mutilila Yawe Leza winu. Mutaposiwa kuyela isunde lyakwe lili lyonsi pa masunde yakwe yano nkumupeela ilelo.

Malango 8:14

muce musininkizye ukuti mutakaye ni cilumba nga mwilile Yawe Leza winu wino wamufumizye mu Eguputo, muno mwali azya.

Malango 8:18

Mwaiusya ukuti Yawe Leza winu aliwe akamupeela amaka akuya akama. Wene akacita cii pamulandu wakuti ni lelo kwene acili uwacumi ku upangano uno wene wacisile ni vikolwe vinu.

Yakapingula 3:12

Aina Izlaeli nupya yiifya pa manso yakwe Yawe. Pamulandu wakwe cii, Yawe aleka Egiloni umwene waku Moabu aye na maka ukuluta aina Izlaeli.

Yakapingula 3:8

Acino Yawe nawe pasi pakusokela aina Izlaeli alenga nu kuti Kusyani Lisyataimu, umwene waku Mesopotamya, ayacimvye. Wene wayateesile pa myaka cinani.

Yakapingula 6:25

Usiku ulya Yawe anena Gidyoni ati, “Tola cipambasi wakwe so, nga na cipambasi namuze uwa myaka cinimbali. Utamole kavuwa kakwe so kano wakuulile Baali, nga uputule ulucesi lwa cimanyililo cakwe Asyela, Leza mwanaci wilya, ululi pambali ya kavuwa kako.

Yakapingula 8:33

Pacisila ca mfwa yakwe Gidyoni, aina Izlaeli nupya kwene yatali acumi kuli Leza nga iyapepa tuleza Tubaali. Iyaipangila Baali Beliti ukuya ali leza wao.

Yakapingula 8:34

Yene yatatwalilile kutumikila Yawe Leza wao uwayatuulanga ku anisi yao yonsi ayazingulwike.

1 Samueli 12:10

Lyene iyalilila kuli Yawe kuti ayazwe, iyati, ‘Twatitwifya pa kukufutatila we Yawe nu kutumikila maunkolanya yakwe Baali na yakwe Asyitaloti. Lelo ndakai tutuule ku anisi itu, nga naswe tumakupepa!’

1 Samueli 12:9

“Lelo yene yilile Yawe Leza wao. Icaleka wene ayapeela mu makasa yakwe Sisela, musika mukalamba uwa vita vya mwene waku Hazoli, nu mu makasa ya ina Filisti, nu mu makasa ya mwene wa ina Moabu, yayo yonsi ayalwisizye.