Filipi 3:19 - Amazwi Yakwe Leza 2013

¹⁹ ukuti antu yaa yalasumbwa kuzimo! Yene yakapepa inda zyao nu kuitumika pa vintu vino yalinzile ukuuvwa insonyi. Yene yakaelenganya sile pa vintu vya muno nsi.

Filipi 3:19 Iomraidhean Croise

Masamu 17:14

We Yawe, ntuule uku antu yayo yano umu umi wao wa muno nsi yakwata vino yakalonda vyonsi. Yapini ucuzi wacipezya mano, uno wayateyanyizizya nu ku izikulu yao kwene!

Masamu 52:1

Icani cino ukuitutumwila pa uyi wako we cimuntu ca vilumba? Umusanya onsi ukaelenganya sile ivyaononyi. Umulomo wako wasongola wakwe coco.

Yelemiya 44:17

Swemo tumatwalilila ukucita vino twalaya. Tumaocelanga namwene wa mwiyulu ubani. Tumamupongolwelelanga na mawila ya vyakumwa. Vivi kwene sile vino twacitanga sweisikulu, ivikolwe vitu, yamwene itu, intunguluzi zitu, ndi vino antu yacitanga mu misumba yamu Yuda nu mu miseo yamu Yelusalemu. Pano lilyo lyene twakwatanga vyakulya ivivule, twayanga nu longo nupya ni syamo litatuponelanga, awe.

Ezekelo 13:19

Mukanzewanya apa manso ya antu yane, apakuti mulole utungano twakwe baale tumwi utwa pikufi, nga nu tumokolwa twa mukate. Pasi pano mukakoma antu atalinzile nu kufwa, nu kupususya atalinzile nu kwikala muno nsi. Mukasomba antu yane yano yatemwa ukuuvwa vyaufi.’”

Ezekelo 34:3

Mwemo mwailyokezyanga iziya, mwazwalanga insalu izyokoswa na mavumbu ya mfwele kwene, mwakomanga imfwele iziine ningo, lelo mutacemanga ufyo foo.

Oseya 4:7

“Lino yasimapepo yavulilako, nu kwifya kwao kunondi ikuvulilako. Acino ndasangula ucindami wao kuti uye umuzewanya.

Mika 3:11

Yakapingula yakweo yakapoka amafukakanwa apakupingula. Yasimapepo yakweo yasisambilizya ukwaula kulifya cimwi. Yakasema yakweo yakasema kuti yalipilwe. Nupya yene yakalanda ukuti Yawe ali na alio. Yakavwanga yati, ‘Kusi cimwi ciipe icingatuponela, awe, pano Yawe ali naswe.’ ”

Mika 3:5

Yawe wavwanga wati, “Antu yane yasombwa na yakasema yamwi, yano yakapumbola antu. Ndi umwi wayimula, yene yakamulaya umutende, lelo ndi atacisile vivyo, yene yakamunena amazwi ya misindicila a nkondo.”

Malaki 1:12

“Lelo mwemo mutancindika apakulanda ukuti kavuwa kane akasauke na pakupeela penepo impolelwa zino mwasuula.

Mateo 16:23

Lelo Yesu aseleuka, asinkola Petulo ati, “Fuma pano, Ciwa! Kunondi ukoline wa cisiki mu nzila, pano amelenganyo yako yatafumile kuli Leza, lelo auntunze.”

Mateo 25:41

“Lyene alanena yao ali kwi mani lyakwe ati, ‘Fumini pano, ntamumanyile mwe muno mwatipwizilwe. Yangini ku moto usyazima uno Leza wateyanyizizya Ciwa na angeli yakwe.

Luka 12:19

Alino ndainena nemwisikulu nti, ‘Nene musyuke! Nakwata vintu vyonsi vino nalondanga pa myaka iingi. Kanapuza, nalya, namwa, nu kuzanga.’

Luka 16:19

“Kwali umuntu mukama uwazwalanga insalu ziyenzulukile zyamutengo, uwalyanga ningo nupya watenzi mu luzango lwa manda pe.

Luka 18:4

Pa nsita ntali kapingula wakananga kumuputwila mulandu. Lelo pacisila aivwanzya umwisikulu ati, ‘Nanti angala nsiopa Leza, nanti kucindika umuntu,

Loma 16:18

Pano yao akacita vii yasyatumikila Klistu Mwene witu, lelo yakatumikila vilondwa vyao. Kupitila mu mazwi yao akusyenteka nga ni mvwango zyao zya kutasya mwi syente, yene yakasomba antu akaele yano atakuma ku vintu vii.

Loma 6:21

Uzye umuzano cii uno mwazanyile mukucita vintu vino ndakai vikumuletela insonyi? Ala icikafumamo, imfwa!

1 Kolinto 3:3

pano micitile inu icili wa micitile ya antu amu nsi. Pakasi kinu mukuzuwilana nu kulemanila wenga nu muze. Uzye cii cisyakusininkizya vino mwemwe amu nsi, mukucita vintu kulingana ni miyele ya muno nsi?

1 Kolinto 5:2

Uzye lyene mungaitumika uli? Mulinzile kuvwa ulanda pa cintu cii, nu kuzinga umuntu wiyo mu utandano, wino uwacita cintu cii.

1 Kolinto 5:6

Cisi cisuma ukuti mwaitumika! Uzye mutamanya vino citutumusi cinono sile cingatutumula munya wa ngano?

2 Kolinto 11:12

Namatwalilila kucita vino ncili cita na ndakai, pakuti yao akaitaka kuya atumwa yatakakwate nzila yakuti yaitumikamo kucita vintu vili vimwi na vino swemo tukucita.

2 Kolinto 11:15

Caleka citange ciloleke cipya aomvi yakwe Satana ndi yaomvya usomvi kuti yaloleke kwati yene aomvi ya wololoke. Mpelelekezyo yao ilalingana ni milimo yao.

Galatiya 6:13

Nanti yasilamulwa lelo yasyayela Masunde. Cino yakalonda ukulola ukuti mwasilamulwa, pakuti yangailumba apakumulenga kuti mucite vii.

Filipi 2:21

Cila muntu akasakamala pa vintu vyakwe umwisikulu, kwaula kusakamala mulimo wakwe Yesu Klistu.

Kolose 3:2

Mwalonda sile vya mwiyulu asi vya pano nsi.

2 Tesalonika 1:9

Uvunuko wao ulaya ulovyo umalilike, uwa kupatululwa ku Mwene nu ku maka yakwe alulumbi.

2 Tesalonika 2:12

Ni cilafumamo cakuti yao onsi atataila cumi, lelo yene yazangila mu kwifya, yalavunukwa.

2 Tesalonika 2:8

Alino lyene Mui wilya alasokololwa. Lelo lino Mwene Yesu aliza, wene alamukoma ku mupu uwamu mulomo wakwe, nu kukaoka kwakwe kulamulovya.

1 Timoti 6:5

nga na lyonsi vikanza vikufuma ku antu yano myenzo yao isi ya mpomvu nupya yatakwata cumi. Yene yakaelenganya ukuti amapepo ili nzila yakuzanilamo ukama.

2 Timoti 3:4

Yalaya asomvi, azakantike nupya yalaya na mataki. Yene yalatemwa vyakuizanzya kuluta kutemwa Leza.

Yakobo 4:16

Lelo ndakai muli ni cilumba nupya mukuitumika. Kuitumika kwa musango uu konsi ukuluvyanya.

2 Petulo 2:1

Ku mpiti kwalolike yakasema yaufi pakasi ka ina Izlaeli. Mu musango uli onga kwene yakasambilizya yaufi yalaloleka munomuli. Mu nkama yene yalaleta usambilizyo uwakonona nupya usi wa cumi. Yene yalakana musambazi wino wayakulwile. Acino yalailetelela kononwa mukupumikizya.

2 Petulo 2:13

nupya yalacitilwa viipe pa viipe vino yacitila antu yauze. Yene yakaelenganya ukuti icisuma kuitumpa mu vyamuzangalwe mu nsita zya musanya kuti yazanzye imbunu zyao. Yene yakacita vya winyi, nupya yakamucita insonyi nu kucita usomvi lino yakulya pamwi namwe.

2 Petulo 2:3

Pamulandu wa kutemwisya cuma yene yalamusomba na mazwi aucenjezi. Lelo kuvunukwa kwao kwateyanyiziwa mpiti, nu kononwa kwao kukayalolela.

Yuda 1:10

Lelo antu yaa, yakapontela cintu consi cino yatiiluka. Ndi vino inyama zya mpanga zyaya, vintu vino yamanya mu civyalilwa vyaya ivintu vilayonona.

Yuda 1:16

Antu yaa, yakailizyanya lyonsi nu kutwika auze milandu. Yene yakalondela vya lunkumbwa vyao viipe. Yakaitutumula nga nu kucindika auze mwi syente kuti yazanilemo muzano.

Yuda 1:4

Pano antu yamwi yakaifya, yasokelela munotuli ukwaula kumanyika. Nupya yakasenula ilandwe lya pa cikuku cakwe Leza witu pakuti yaipele insambu pa miyele yao ya winyi. Yene yakana Yesu Klistu, Musambazi nupya Mwene witu wenga sile. Antu yaa yalavunukwa ndi vino calembwa mpiti mu malembelo.

Umbwilo 18:7

Mucuzyini nu kuleka anyunguluka cuze kulingana nu lulumbi nu wikazi wapapela uno umwisikulu waipile. Pano wene akutwalilila kuinena ati, ‘Ntenzi pano, ne namwene! Nemo insi mukamfwilwa, ntalatala ndosye!’

Umbwilo 19:20

Cilyanyi casenzilwe ku ng'anda yaminyololo pamwi na kasema waufi wino wacisile vinjelengwe pa manso yakwe. Wene waomvizye vinjelengwe vii pa kusomba yao akweti cimanyililo ca cilyanyi na yao apefile unkolanya wa cilyanyi. Cilyanyi pamwi na kasema waufi yasumbilwe apuma muli yemba wa moto, muno mwapyanga maluti.

Umbwilo 21:8

Lelo antete na yano asi nu utailo, na yakacita ya vintu vyawinyi, ni nkomi, yacizelele, alozi, na yakapepa ya tuluwi, na antu yonsi antumpu, wikalo wao a yemba wa moto muno maluti yakapya. Ii ili mfwa yakwe ciili.”

Umbwilo 22:15

Lelo yao akacita vya winyi na alozi, yacizelele ni nkomi, yakapepa ya tuluwi nga na yao akatumpoka mu mazwi nu mu vicitwa kwene, yaa yonsi yalasyala kunzi ya musumba ukulu.

1 Samueli 2:29

Nga nupya pacani cino ungatumbwila amanso nu kuzazila amawila yano nanenyile antu ukundetela? Uzye pacani cino ungacindikila ana yako aonsi ukuluta pali nene pa kuyata yiine pa kuilyokezya ukulya amawila asuma wakwe cimwi yano antu yane aina Izlaeli yapeela?