Danieli 9:3 - Amazwi Yakwe Leza 2013

³ Acino napefile ku Mwene Leza, ala nkupapata kunoli, nu kuizilizya, nu kuzwala vizwalo vya ndosya, nu kwikala umwi twi.

Danieli 9:3 Iomraidhean Croise

2 Samueli 12:16

Davidi wapapatile sana umwana wakwe kuli Leza pamulandu wa kulwala kwakwe. Davidi mpaka ata nu kulya nga aya umu ng'anda umwakwe nga alambalala pansi usiku onsi.

Ezila 10:6

Alino Ezila afuma ku Ng'anda yakwe Leza nga aingila mu muputule wakwe Yeoyada umwana umonsi wakwe Elyasyibu. Lino wene acili kweneko, atalile cakulya nanti ukumwa amanzi awe, pamulandu wakuti watwalilile ukunyunguluka pa kuntayela kwakwe yayo afumile mu uzya.

Ezila 8:21

Kuku kwene uku luzi lwa Aava, nemo ne Ezila napiile antu amasunde akuti swemo swensi tutale tute ukulya, pakuti tuicefye kuli Leza, tumupapate apakuti atutungulule umu ulendo witu nu kutucingilila, sweswe pamwi na ana itu, kumwi ni vyuma vitu vyonsi.

Ezila 9:5

Lino insita yakupeelelapo impolelwa amanguzi yafika, mvwandamuka nga nimilila ni vyakuzwala vyane vilepoke. Lyene mfukama nu kukatusya amakasa yane umupela kuli Yawe Leza wane.

Neemiya 9:1

Apa wanda uwalenga amakumi yaili na yani uwa mwezi kwene uwa, aina Izlaeli yonsi pyu yakongana uku kuifuntusya ku lunkumbwa lwa kulya icilyo. Lilyo ala yazwite ivisamu nga ala yatiyaiswela ni twi ku mitwe.

Esita 4:16

“Yanga ukakonganike Ayuda yonsi amu musumba wakwe Susa, nga mumpepele kweneko. Mutaezya ukulya nanti ukumwa apa manda yatatu, usiku nanti umusanya kwene. Nani kwene kumwi na aomvi yane akazyana avino tumacita. Lino cii cacitika, lyene ndaya ku musambazi, nanti caindwa ukulingana ni sunde. Ndi cakuti indi nu kufwa, kankafwe.”

Yobo 42:6

Ali cino fwandi nawezya umuvwango wane onsi. Naiswela ulukungu ni itwi, apakulanga ndi vino lyene nazenzuka.”

Masamu 35:13

Lino yene yalwala, nemo nkazwala vyakuzwala vya ndosya, nu kulya inta nu kulya. Ala nkupepa ninamike nu mutwe umu mpamba zyane,

Ezaya 22:12

Yawe Wamaka yonsi, wamwamile apa wanda ulya uku kulilizika nu mukulosya, kuti mungapela inkuuzu uku mitwe, nu kuzwala visamu.

Yelemiya 33:3

We Yelemiya, ndaizya sile nani namakwasuka, namakunena ni milandu ikulu nupya iyankama ino wemo utamanya.

Ezekelo 36:37

Nupya Yawe Simwandalali avwanga ati, “Vino nemo ndacita, vilaluta pali vino navwanga. Ndaleka aina Izlaeli yace yautukila kunondi pakuti nce nayazwako. Ndaleka yakasandulukisye wa ufyo wa mfwele.

Danieli 6:10

Lyene lino Danieli wamanya ukuti icipope caticilembwa, aya ukwakwe, uku muputule wapapela, kuno amawindo yalozya ku Yelusalemu. Kuku kwene, ndi vino wacitanga lyonsi, Danieli afukama pansi apipi ni windo iliyulwe nga apepa kuli Leza wakwe, nu kumutaizya amaila yatatu umu wanda.

Danieli 9:2

ne Danieli napitulwike mu Malembelo yamuzilo ukulingana na mazwi yano Mwene wanenyile kasema, nga niluka ukuti Yelusalemu alaya wa citalang'anda apa myaka amakumi cinimbali.

Danieli 9:20

Lyene ntwalilila kulanda nu kupepa, ala nkuilongwela amaifyo yane na maifyo ya antu yane aina Izlaeli nga nu kupapata uku Mwene kuti awezezye Ng'anda yakwe ikulu vino yali.

Danieli 9:4

Napefile ku Mwene Leza wane nu kulongwela amaifyo ya antu. Napefile inti, “Owe mwe, we Mwene Leza mukulu nupya uwakoofya, wemuno ukawaka upangano wako nu kulanga ukutemwa kuli yayo akutemwa, yano yakayela amasunde yako.

Yowelo 1:13

Mwe yasimapepo, si zwalini vyakuzwala vyandosya, alino muyume apa visao pamulandu wa ulanda uwatiutuponela. Lilini mwemuno mukatumikila apa tuvuwa. Zwalini muivimbe ivizwalo vya ulanda uwanda onsi. Mwe aomvi yakwe Leza winu.

Yowelo 2:12

Lelo Yawe wavwanga wati, “Nanti cili vivyo, welini kunondi nu mwenzo winu onsi, ale mwatimufunga ukulya nu kuponya aminsozi, nga nu kuililila ulanda ulanda.

Yona 3:5

Antu amu Ninive yataile Leza. Alino iyuma imbila kuti umuntu ali wensi ate ukulya, nga antu yonsi kwene, ukutandika pa mukulu mpaka ukufika na pa munono kwene, iyazwala vyakuzwala vyakulanga ulanda.

Mateo 17:21

Lelo kusi cuze cingafumya mupasi wankota uwa musango uu, suka sile mwapepa nu kuizilizya ukulya.]

Luka 2:37

Wene wali a mukamfwilwa uwa myaka makumi cinani na ini. Atatazile ataawe kuya ku Ng'anda ikulu yakwe Leza nupya watemilwe kutumikila Leza, nupya lili lingi pa kupepa Leza wapitanga kwaula kulya musanya nu usiku.

Milimo 10:30

Konelio aasuka ati, “Cali pacisila ca manda yani lino napepanga mu ng'anda yane manguzi, ni nsita yakwe 3 koloko. Umukupumikizya umuntu uwazwite insalu ziyengese aimilila nkolelo yane