Danieli 9:25 - Amazwi Yakwe Leza 2013

²⁵ “We Danieli umanye nu kwiluka cii: Ukutandika apa nsita ino ilamulo lyapilwe ilya kukuula Yelusalemu cipya cipya mpaka ukufika nalino Musololwe Wilya aliza, palapita imyaka cinimbali amaila cinimbali. Umusumba wa Yelusalemu ulakuulwa cipya cipya nupya ulaya ni miseo nga namalinga akome, apa myaka cinimbali amaila amakumi mutanda na iili. Lelo insita iyo ilaya insita ya ntazi.

Danieli 9:25 Iomraidhean Croise

2 Samueli 15:25

Lyene umwene anena simapepo Zadoki ati, “Swilizya Mbokosi ya Upangano yakwe Leza uitwale mu musumba. Ndi cakuti Yawe wazangila munondi, ale wene alambwezya mu musumba akaleke nkize nkailole nupya nkalole na pa cifulo pano itenzi.

Ezila 4:24

Fwandi avili vino yalesizye umulimo waku kuula Ng'anda yakwe Leza umu Yelusalemu suka ciza cafika nu mwaka wakwe ciili umu uteko wakwe Dalyusi mwene

Ezila 7:1

Apacisila ca vintu vii, umu manda ya kuteeka kwakwe Alitakisesi umwene waku Pesya, kwali kweneko umuntu wino yatemile izina Ezila. Wene wali umwana umonsi wakwe Selaya, umwana umonsi wakwe Azaliya, umwana umonsi wakwe Hilikiya,

Ezila 7:8

Ezila pamwi na ina Izlaeli yafumile uku Babiloni apa wanda wakutandikilapo uwa mwezi wakwe cisano uwa mwaka wakwe cinimbali.

Neemiya 3:1

Simapepo Mukulu, Elyasyibu pamwi na yasimapepo yauze yakatuka iyatandika nu kukula cipya cipya Impongolo ya Mfwele. Apacisila cakuipolelela iyapanga fulemu wa pa mulyango alino iyikapo ni cisasa. Lyene iyapanga ni mifikilo ningo nga alino iyatwalilila ukukuula ukufika ku Mpongolo ya Mwanda suka iyaya iyafika uku Lupungu lwa Hananeli.

Neemiya 4:2

Avwanga na pa manso ya antu yano wali nayo, nga na pa manso ya vita vya ina Samaliya ati, “Icani cino Ayuda yakucita, antu yaa atakwata na maka? Uzye yalapeela impolelwa? Uzye cikulanga ukuti yamamalila uku kuululula ilinga lii mu wanda onga? Uzye yakupaalila ukuti yamatukulula amawe yano yatulumine umu mitumba kumwi ni njelwa izyoce, viye vino vyali?”

Neemiya 4:8

Fwandi yonsi yumana kapi kuti yize yalwisye Yelusalemu nu kuleta icimvulunganya mwenemo.

Neemiya 6:15

Avino yamazile uku kuula ilinga apa wanda uwalenga amakumi yaili na yasano, lilyo ilyasenzile amanda amakumi yasano na yaili, umu mwezi wakwe Eluli.

Masamu 71:10

Anisi yane, akulonda uku nkoma, yakavwangila capamwi yonsi nu kumpingila.

Kasambilizya 3:3

kwaya insita ya kukoma ni nsita ya kupozya, kwaya insita ya komoola ni nsita ya kukuula.

Ezaya 55:4

Lola ninkucita kambone wa mitundu, intunguluzi na kateeka wa mitundu.

Ezaya 9:6

Ala lyene umwana watatuvyalilwa, yatiyatupeela umwana umonsi wino yatiyatwika uwene apa viye vyakwe. Yatiyamutemela izina lyakwe yati, “A Ciinda Wakuzunguka”, “Leza Wamaka yonsi”, “Umukwasi wa pee”, “Mwanangwa wa Cituku”.

Danieli 8:11

Lwaituumike kuti luye wa Mwanangwa wa vita vya mwiyulu, nu kulesya impolelwa zya cila wanda izyapeelwanga kunoli, nga nu konona Ng'anda ikulu yakwe Leza.

Danieli 8:25

Alalenga ukuti usomvi ucitike pamulandu wakuti wene incenjezi. Wene alaya ni cilumba nga alonona antu avule ukwaula kuyasoka. Nupya alakatukila Umwene wakwe yonsi, lelo alononwa ukwaula kuomvya amaka ya muntu.

Danieli 9:23

Lilya kwene lino watandike ukupepa, Leza wakwaswike. Wene wakutemwa, nga acino natiniza ukukunena uwasuko. Acino ndakai usumbeko amano lino nkukulondolwela icilolwa.

Mika 5:1

Lyene konganikini impuka zya vita, mwe ikazi yaku Yelusalemu, pano anisi yatiyatuteyamila. Yene yakupoola intunguluzi ya ina Izlaeli umunzekete ni mbuungo.

Mika 5:2

Yawe akuti, “Lelo we Betelemu waku Efulata, nanti angala wewe munono mu misumba yakwe Yuda, lelo munuli ndafumya umuntu wino alateeka aina Izlaeli. Intuntuko yakwe wiyo iya mpiti mpiti, kutandikila sile uku katalili.”

Mateo 13:23

Imbezu izyaponile pa musili uvunde ayao yano ndi yuvwa mazwi yakwe Leza, yuvwikisya nu kumanya. Yene yakaseeka vizao vivule, yamwi umwanda onga, yamwi makumi mutanda, nga na yamwi makumi yatatu.”

Mateo 24:15

“Mulalola ‘Ca winyi ca ononyi’ cino kasema Danieli wavwanzile, cimilila mu Ng'anda ikulu yakwe Leza.” (Kawelenga ailuke vino ci cikusenula.)

Mako 13:14

“Lelo lino mulalola ‘Ca winyi ca ononyi’ cimilila pa cifulo cino citalinzile kuyapo.” (Kawelenga ailuke vino ci cikusenula!) Lyene yonsi ali mu Yudeya yakuutukile ku myamba.

Yoane 1:41

Lilyo kwene, alonda Simoni mwina wakwe, amuzana amunena ati, “Twati tuzana Mesiya.” (Kuli kuti “Klistu.”)

Yoane 4:25

Mwanaci nawe amunena ati, “Namanya vino Katuula uwalavilwe aliza nga lino wiza alatunena vyonsi.”

Milimo 3:15

Mwakomile Umwene wino akapeela umi, lelo Leza wamuzyukwile kufuma ku afwe, nga naswe sweswe yakambone pali cii.

Milimo 5:31

Lelo leza wazyukwile Yesu alino amwika kwi kasa lyakwe lilunji, ukuya intunguluzi na katuula, kuti apeele aina Izlaeli longo lwakuzenzuka nu kwelelwa maifyo yao.

Milimo 8:30

Filipo asimwililako, amuvwa akuwelenga mu lupapulo lwakwe kasema Ezaya. Alino amuuzya ati, “Uzye ukuvwa vino ukuwelenga?”

Efeso 5:16

Mwaomvya insita zinu ningo pano manda ya ndakai aipe.

Umbwilo 1:5

Cikuku nu mutende viye namwe kufuma kuli Yesu Klistu kambone uwakutailwa, uwali wankolelo kuzyukuka kufuma ku mfwa, nupya wene ali kateeka wakwe yakateeka yonsi amu nsi. Wene watutemwa nupya waipile kuti atukulule ku maifyo itu

Umbwilo 19:16

Pa mwingila wakwe na pa lupamba lwakwe palemvilwe zina lino likati, “Kateeka wakwe yakateeka nu Mwene wakwe yamwene.”