Danieli 12:1 - Amazwi Yakwe Leza 2013

¹ Umungeli uwazwite insalu itelepelele alanda ati, “Apa nsita ilya umungeli mukulu Mikaeli, wiyo akacingilila antu yako, alaloleka. Lyene kulaya insita ya macuzi, iipisye wakwe cimwi ino itatazile iyako ukufuma sile ku kutandika kwa nko ukufika na pilelo kwene. Lelo lino insita ilya ilafika, antu yako yonsi yano amazina yao yalembwa mu lupapulo lwakwe Leza yalatuulwa.

Danieli 12:1 Iomraidhean Croise

Masamu 56:8

Wemo wamanya vino nkacula, ukaiusya na minsozi yane. Uzye kwene vitatantikwa umu lupapulo lwako?

Masamu 69:28

Uleke na mazina yao yafutwe umu lupapulo lwa umi, yatakezye ukuzanwa mumu umwalembwa amazina ya antu yako.

Ezaya 4:3

Yao yonsi alasyala umu Zioni, aalapusuka umu Yelusalemu, yalaamwa ukuya asuma umu cumi, yonsi yano yalembwa umu antu aumi amu Yelusalemu.

Ezaya 9:7

Uwene wakwe ulandalila konsi konsi. Ulasyukila ulongo ulutalasila. Wene alikala apa cifulo ca wene wakwe Davidi nga nu kuteeka uwene wakwe. Wene alausimpa nu kuukomya umu ulungami nu mu ololoke. Ukutandikila sile pali ndakai ukufika na pano insi ilasilila. Ee, cumicumi, avino Yawe Wamaka yonsi alafikilizya cico.

Yelemiya 30:10

“Utaaopa fwandi we muomvi wane Yakobo. Utazakaza we Izlaeli. Ivyalanda ne Yawe. Pano nemo ndakukulula mu mpanga ntali na ana yako mu mpanga ya uzya wao. Yakobo alasyukila nupya ulongo nu mutende, kutalaya nu wakumucuzya.

Yelemiya 30:7

Iye mwe vino uwanda uu wakulisya! Kusi uwanda nauze uno wakolana na uu. Insita imwi iya ulanda kuli Yakobo, lelo wene alakululwa.

Ezekelo 13:9

Nkutumpula ikasa lyane nu kukatusya nu kulwisya yakasema ya vya uwelewele. Yatalazumiliziwa ukwiza umwitengo lya yantu yane, yatalalembwa nu mu lupapulo lwakwe ya mwana Izlaeli. Alino mulamanya ukuti nene indi Yawe Simwandalali.

Ezekelo 34:24

Nemo ne Yawe ndaya Leza wao, nu muomvi wane Davidi aliwe alayatungulula. Ivyalanda ne Yawe.

Ezekelo 5:9

Ndakufulula wemo we Yelusalemu vino ntatala nakufulula, nupya ntalatala nswilizyepo ukukufulula ndi vino ndakufulula, pano ukacita ivintu vyonsi vino nemo nasoka.

Danieli 10:13

Lyene mungeli kateeka waku Pesya andwisya apa manda amakumi yaili na onga. Lyene Mikaeli, wenga uwamu akalamba ya angeli, aiza ku kungazwilizya, pamulandu wakuti yansile nenga kuku ku Pesya.

Danieli 10:21

Lelo inkolelo namatala nkunene ivyalembwa mu Lupapulo lwa Cumi. Kusi umwi uwakungazwa, suka sile Mikaeli, umungeli wino akalinda Izlaeli.

Danieli 11:45

Wene alasimpa na mataalu yakwe aku wene apakasi kakwe yemba nu mwamba apa kuulwa Ng'anda ikulu yakwe Leza. Lelo wene alafwa, nga kutalaya umwi kuku uwakumwazwilizya.”

Danieli 7:10

Nu luzi lwa moto ala lukukonkoloka ukufuma apa nkolelo yakwe. Kwali kweneko na antu avule wakwe cimwi akumutumikila, nga ni mintapendwa ya antu aimi nkolelo yakwe. Alino kuputwilwa kwa milandu kutandika, nga ni mpapulo zikupulwa.

Danieli 9:12

Wemo watufikilizya vino wavwanzile ukuti ulafikilizya ivyakupezya sweswe kumwi ni ntunguluzi zitu. Wavunwike Yelusalemu icikalale ukuluta umusumba uze uli onsi pano nsi.

Yowelo 2:2

Ulaya uwanda wa mfinzi nu ulanda, ulaya uwanda wa makumbi ni mfinzi. Impuka ya vita vyamaka iikulu cuze ikwiza, ino ikoline wa mfinzi iyatikupa imyamba, ino itatala yayako nupya italatala iyeko umu manda akwiza.

Malaki 3:16

Lyene yayo akaoopa Yawe yatandika ukulanzyanya, nga Yawe auvwa kunoyali nu kutezya vino yalandanga. Ulupapulo lwa ciusizyo ilulembwa pa manso yakwe, ulukalanda pali yayo akaoopa Yawe nu kucindika izina lyakwe.

Mateo 24:21

Pano pa nsita ilya, kulaya macuzi aipisye kuluta, yano atatazile yayeko kufuma lino insi yaumvilwe kufika na ndakai nupya yatalatala yayeko.

Mako 13:19

pano macuzi ya manda yayo yalaya aipisye kuluta yano insi yamanya kufuma ku utandiko lino Leza waumvile insi kufika na ndakai, nupya yatalatala yayeko.

Luka 10:20

Lelo mutazanga pano mipasi yankota ikumuyela. Muzange pano mazina inu yalembwa mu lupapulo lwa kwiyulu.”

Loma 11:15

Leza wafutatile Ayuda nga pacisila awikizyanya na antu yauze muno nsi. Uzye cilaya uli lino alapokelela Ayuda nupya? Cumi cilaya wa kuzyukuka kufuma ku mfwa.

Loma 11:26

Vii, ali vino aina Izlaeli yalatuulwa. Ndi vino calembwa mu malembelo cati, “Katuula alafuma mu Zioni nu kusisya ukakasi onsi kufuma pa vizikulula vyakwe Yakobo.

Efeso 1:21

Kuku akuno Klistu waya a kateeka papela yakwe yakateeka onsi, intunguluzi zyonsi, maka nga na pa mazina yauze yonsi a utesi wa mukulo uu nu mu mukulo uuliza.

Filipi 4:3

Nawe kwene, we cuza wa cumi pa mulimo witu, nkulonda kuti wazwe yamama yaa. Pano yene yaombisye cuze pamwi nani mukusalanganya Landwe Lisuma, pamwi na Klementi nga na aomvi yanji yonsi yano ndakai mazina yao yalembwa mu lupapulo lwa umi.

Yuda 1:9

Nanti Mikaeli kwene mungeli mukulu atacisile cii lino walemanile na Ciwa pa kulola wino angatola cala cakwe Mose. Mikaeli atavwanzile izwi nanti lyonga lya miponto. Wene wavwanzile sile ati, “Mwene akukalipile!”

Umbwilo 1:5

Cikuku nu mutende viye namwe kufuma kuli Yesu Klistu kambone uwakutailwa, uwali wankolelo kuzyukuka kufuma ku mfwa, nupya wene ali kateeka wakwe yakateeka yonsi amu nsi. Wene watutemwa nupya waipile kuti atukulule ku maifyo itu

Umbwilo 12:7

Nupya mwiyulu mukatuka ulwi. Mikaeli na angeli yakwe yalwisyanya ni cizoka nga cizoka pamwi na angeli yakweco yalwisyanya nao.

Umbwilo 13:8

Antu yonsi akaikala pano nsi yalacipepa, suka sile antu yano mazina yao yalemvilwe mu lupapulo lwa umi kufuma lino insi itali iumbwe, ulwa Mwana wa Mfwele wino uwakomilwe.

Umbwilo 17:14

Yalalwisya Mwana wa Mfwele. Lelo Mwana wa Mfwele alayacimvya, pano ali Mwene wakwe yamwene, kateeka wakwe yakateeka. Nupya antu yakwe aamwa, asololwe na a utailo yalacimvya pamwi nawe.”

Umbwilo 20:12

Nga ndola afwe akulu na anono kwene, ala yaimi nkolelo ya cilimba ca wene. Alino mpapulo zikupulwa, nga lyene lupapulo na luze lukupulwa. Luu luli lupapulo lwa antu aumi. Afwe yapingulwa kulingana ni vintu vino yacisile ndi vino vyalembwa mu mpapulo.

Umbwilo 20:15

Wino wensi atalemvilwe izina lyakwe mu lupapulo lwa umi wene wasumbilwe muli yemba wa moto.

Umbwilo 3:5

Wiyo alacimvya alazwikwa vizwalo vitiswe wakwe yakwene nga nani ntalafuta zina lyakwe mu lupapulo lwa antu aumi. Pa manso yakwe Tata na angeli yakwe ndalanda paswe ukuti uwakwane.

Umbwilo 7:14

Nani mwasuka inti, “Musambazi, wewe umanyile.” Nawe anena ati, “Yaa ali antu yano aposya mu macuzi akulu cuze. Yene yafula mingila yao nu kuiswefya mu wazi wa Mwana wa mfwele.