Ayebulai 4:12 - Amazwi Yakwe Leza 2013

¹² Izwi lyakwe Leza ilya umi nupya likuomba. Lyene lyakalipa kuluta lupanga luno lwanyolwa konsi koili. Lyene likaputula nu kupenka monsi, kufika pano umi nu mupasi vyakomana, na muno yanamfyumfyu ni mimfyompo vyakomana lyene likapingula vilondwa, nu kwelenganya kwa mu mwenzo wa muntu.

Ayebulai 4:12 Iomraidhean Croise

Masamu 110:2

Yawe alasandulula amaka yako a wene, ukufuma ku Zioni. Wene akuti, “Yaa umwene wakuteeka anisi yako!”

Masamu 119:130

Ulondolozi wa mazwi yako uli wa luswepo, wene ukaletela imbutuma amano.

Masamu 139:2

Wamanya vyonsi vino nkacita. Ukamanya vino nkwelenganya, nanti uli akatalamukila uli.

Masamu 149:6

Kayale yalemasye yapundisye apa kulumbanya Leza, ala yali ni mpanga izinyolwe konsi konsi.

Masamu 45:3

Kwapila ulupanga lwako, we lumba lya maka. Wemo wakwatisya amaka, nupya wacindamisya!

Mapinda 5:4

Lelo impela yaviko yawaya nu kukalipisya wa ngweko, yakalipa wa lupanga ulunyolwe konsi konsi.

Kasambilizya 12:11

Imvwango zya antu yamano zyaya wa ntuwa zisongozye zyakwe yakacema ya mfwele zino yakaomvya pakutungulula amaufyo yao. Imvwango zyao zyaya wa nsunga zino yapampamila. Imvwango zizyo zyafuma kuli Leza, kacema witu swensi pakuti wene atutungulula swe antu.

Ezaya 11:4

Lelo umololoke wene alaputula imilandu ya antu aulilwa, nga nu kupingwila alanda amunsi umu ulungami. Izwi lyakwe lili wa ntuwa ya kuumila alukang'ansi aipe. Nu mupu wamu mulomo wakwe ulakoma umwipe.

Ezaya 49:2

Wene waleka na kanwa kane kuti kaye akakalipisye wa lupanga, nupya umweneco aliwe amansunganga. Wancita wa luceto ulusongole, wamfisa nu munyambi yakwe.

Ezaya 55:11

ali vino ni zwi lyane nalyo lisiweluluka kunondi, suka lyatala lyacita vino nkulonda, lyamalila nu mulimo uno nalitumile.

Yelemiya 17:10

Nene ne Yawe nkaceceta umwenzo wakwe cila muntu, nu kwezya amano yakwe. Nkapeela na cila wenga ukulingana ni micitile yakwe, ukulingana ni milimo yakwe ino akacita.”

Yelemiya 23:29

Yawe walanda wati, “Uzye kwene amazwi yane yatakoline wa moto, nanti inondo ino ikatamola iciliwe mu tupimfya?”

Luka 8:11

“Mulumbe u ukusenula vii, imbezu izwi lyakwe Leza.

Yoane 12:48

Na wino wensi uwankana, wasula mazwi yane, akunoli alamupingula. Mazwi kwene yano nkalanda alamupingula pa wanda wampelelekezyo.

Yoane 6:51

Nene kwene indi cakulya icikapela umi cino ciiza pano pansi kufuma kwiyulu. Muntu ndi walya cakulya cii, wene alaya nu umi wape. Umwili wane uli cakulya ca umi uno nkapela ku antu yonsi amu nsi kuti yaye nu umi.”

Milimo 2:37

Lino antu yuvwa cii, yasakamala cuze, nga yavwanga kuli Petulo na atumwa yauze, yati, “Mwe ina itu uzye tumacita uli?”

Milimo 4:31

Lino yamala kupepa, ng'anda ino yakonganilemo itenta. Onsi yazuziwa na Mupasi Wamuzilo, alino yatandika kukosola ilandwe lyakwe Leza nu kuposya.

Milimo 5:33

Lino amwi Tengo yuvwa cii, yasoka cuze, cakuti yasolola kuti atumwa yakomwe.

Milimo 7:38

Mose kwene wii uwali na aina Izlaeli lino yakongine mu lwanga, nupya uwali ni vikolwe vitu pamwi nu mungeli uwavwanzile nawe pa Mwamba wa Sinai. Wene uwapokelile na mazwi akapeela umi kuti atupele.

Loma 1:16

Pano nsi na nsonyi zya pi Landwe Lisuma, pano ali maka yakwe Leza akutuula wino wensi wataila, nkolelo ku Ayuda, nga nu ku Akulukuwa.

1 Kolinto 1:24

Lelo kuli yao yano Leza waama, Ayuda na Akulukuwa kwene, yonsi yaa iiluka ukuti Klistu ali maka nga na mano yakwe Leza.

2 Kolinto 2:17

Swemo tutakoline wa antu yauze aingi, yano yakaezya kuya akama kupitila mu kukosola ilandwe lyakwe Leza. Lelo pano twaya muli Klistu tuli wa nkombe zyakwe Leza, tukakosola mu cumi kulingana nu kulonda kwakwe.

2 Kolinto 4:2

Swemo tusyacita vintu vya nsonyi vino vikacitwa mu nkama. Caleka tusyacita vya usomvi nanti kupililika Ilandwe lyakwe Leza. Leza ali kambone witu ukuti vino tukulanda vyene ivya cumi. Caleka antu yauze muli yakampingu yao yangasininkizya ukuti sweswe yakutailwa.

Efeso 5:13

Lelo luswepo lulasokolola vintu vii ndi vino vili.

Efeso 5:26

Wene wacisile iuvi kuya ilyamuzilo kupitila mu kuliswefya na manzi nga na mazwi yakwe.

Efeso 6:17

Pokelelini ufyusi, uye wa ngowani, nga na mazwi yakwe Leza yano Mupasi Wamuzilo akamupeela, nayo yaye wa lupanga.

1 Tesalonika 2:13

Nupya kuli mulandu nauze uno swemo tukataizya Leza lyonsi. Lino twamuletile mazwi yakwe Leza, mwemo mwayuvwile nu kuyapokelela, asi wa mazwi ya muntu lelo wa mazwi yakwe Leza, nu mucumi akwakwe. Ndakai Leza akuomba muno muli mwe muno mwataila.

1 Tesalonika 5:23

Leza wino akapeela mutende, amucite kuya amuzilo umu nzila zyonsi. Nupya aliwe asunge myenzo inu, mipasi nga ni mili inu, kuti muce muye antungwa ku ndema zyonsi pa kwiza kwa Mwene witu Yesu Klistu.

Ayebulai 13:7

Mwaiusya yao ali ntunguluzi zinu, yano amunenyile ilandwe, mazwi yakwe Leza. Elenganyini musango uno ikalanga na vino yafwile, nga mukolane na alio mu utailo wao.

Ayebulai 6:5

Yene yamanyile vino mazwi yakwe Leza yazipa. Nupya yene yuvwile maka a mukulo ukwiza.

Yakobo 1:18

Ku kulonda kwakwe umwisikulu wene watupeela umi kupitila mwi Landwe lya cumi, kuti tuye wa vizao vyankolelo pa viumbwa vyonsi.

1 Petulo 1:23

Citini cii pano Leza ali So uwamupeela umi upya pa kuyela ilandwe lyakwe lya umi upya lya manda pee.

Umbwilo 1:16

Wene walemile intanda cinimbali mwi kasa lyakwe lilunji, nga mu mulomo wakwe mufuma lupanga lukali koili. Nu usyu wakwe wali suyengese wi lanzi lyafika mutwe papela.

Umbwilo 19:15

Lupanga lukali cuze lwafumile mu mulomo wakwe, luno wene alacimvizyako antu amu nko. Wene alayateeka ku nsonzo ya cela. Wene alafena matingi mu ciwina ca kufenelamo matingi a cipyu nu ukali wakwe Leza wa maka onsi.

Umbwilo 19:21

Vita vyao vyakomilwe nu lupanga luno lwafumile mu mulomo wakwe wino uwakwezile pa mfwalasi. Vyunyi vyonsi vyalile vyala vyao viikuta.

Umbwilo 2:16

Acino ndakai zenzukini. Ndi mutazenzwike, ndiza zuwa kunomuli nu kulwisya antu yao ku lupanga luno lukafuma mu mulomo wane.

Umbwilo 2:23

Nupya ndakoma ana yakwe onsi, nga lyene mauvi yonsi yalamanya ukuti nemo namanya amelenganyo nu kulonda kwa muntu wensi. Ndapela cilambu kuli cila muntu uwa munomuli kulingana ni milimo yakwe.

Umbwilo 20:4

Nupya ndola vilimba vya wene na yao atenzipo yapilwe maka akupingula. Alino ndola mipasi yakwe yao akomilwe pamulandu wa kukosola cumi cino Yesu wasokolwile nga na mazwi yakwe Leza. Yene yatapefile cilyanyi nanti unkolanya wakweco, nanti ukwikilwa cimanyililo caciko pa mausyu nanti pa makasa yao. Yene yaya nu umi nu kuteeka pamwi na Klistu kulingana ni myaka izimbi lyonga.

Yakapingula 3:16

Eudi waisulile na calimwi ulupanga ulunyolwe konsikonsi, nupya ulwatalimfile ukulingana mita wenga. Awe alunyepelela lwa kwi lunji lyakwe avimbilikizyapo ningo ni laya lyakwe.