ZAKHARIA 3:7 - KITTA' MATANGKASA'

⁷ “Punna mannurukiko ri hukkung-hukkungKu siagang nugakang sikamma tugasa' Kupassareanga mae ri kau, situlusu'nu lakkulle a'jari pamimping ilalang ri Ballakku siagang angngurusuki paranglakkenna. LaKupilangngeri sikamma pappala' doannu, sangkamma Kupilangngerinna pappala' doanna sikamma malaeka' niaka ri ampikKu.

ZAKHARIA 3:7 Iomraidhean Croise

PA'JARIANG 26:5

LaKubarakkaki ngasengko, lanri le'ba'namo mannuruki Abraham ri Nakke siagang nakatutui sikamma hukkungKu siagang parentaKu.”

1 KARAENG-KARAENG 2:3

Gaukangi apa Naparentakanga Karaeng Allata'alanu mae ri kau. Turuki sikontu hukkung-hukkunNa siagang parenta-parentaNa ia tattulisika lalang Kitta' Musa, sollanna manna kemae lampanu la'wasselekko lalang sikontu usahanu.

1 KARAENG-KARAENG 3:14

Na punna ikau, sangkamma Daud manggenu riolo, nuturukiA' siagang nupinawangi hukkung-hukkungKu, laKusareko umuru' sallo.”

1 PATTOTTORANG 23:32

Nisare tongi tugasa' ke'nanga untu' amparakai KemaNa Batara kammayatompa Balla'Na Batara, siagang ambantui sikamma sari'battanna ke'nanga, iamintu sikamma imang turunganna Harun, untu' anggaukangi passambayanganga ri anjo tampaka.

YESAYA 62:9

Mingka ikau appasse'rea kattoang, lanukanrei wassele'na numammuji ri Batara; na nualle rappo anggoro'nu, lanuinung je'ne'na lalang ri parang lakkenna BallakKu.”

YEHEZKIEL 44:8

Teai ke'nanga bawang anggaukangi sikamma pa'gaukang matangkasaka lalang ri BallakKu, passangalinna tau bansa maraenga nasare tongi tugasa' ke'nanga untu' anggaukangi.

YEHEZKIEL 48:11

Anjo daera nisa'laka la'jari napatangi imang-imang jari-jarina Zadok. Ke'nanga allayani Batara satunggu-tungguna siagang tasangkammayai suku Lewi julu sukuna ke'nanga, iamintu amminawanga a'gau' dosa siagang tu Israel maraengannaya.

KAIMANGNGANG 10:3

Jari nakanamo Musa mae ri Harun, “Iaminjo natabaya kananNa Batara ri wattunna angkana, ‘Sikontu allayania mae ri Nakke musti napakala'biriki katangkasangKu. Kupa'nyatai kalompoangKu mae ri sikontu bansaKu.’ ” Mingka tena nakkana-kana Harun.

KAIMANGNGANG 8:35

Lalang tuju allo, allo bangngi, musti ammantang ngasengko ri dallekang pakke'bu'na Kemaya untu' anggaukangi apa Naparentakanga Batara. Punna tena nugaukangi, lamate ngasengko. Iaminjo Naparentakanga Batara mae ri nakke.”

ZAKHARIA 3:6

Nampa napabattu anjo malaekaka kananNa Batara mae ri Yosua angkana,

ZAKHARIA 4:14

Nakanamo, “Iaminjo battuanna ruaya tau le'baka Napilei Batarana sikontu linoa siagang nijo'joka untu' a'jari palayanNa.”

ZAKHARIA 6:15

Labattui tau battua ri tampa' bellaya siagang nabantui ke'nanga ambangungi BallakKu. Punna le'ba' anjo pambangunanga, lanaassemmi ke'nanga angkana iNakke Batara Kaminang Koasaya le'ba' assuroko battu mae ri ke'nanga. Sikontu anjo kammaya lakajariang ngasengi punna naturuki tojeng-tojeng ke'nanga sikamma parentaKu, Karaeng Allata'alana ke'nanga.”

ZAKHARIA 6:5

Appialimi angkana, “A'lampai ke'nanga mae ri appaka oloang ri wattu le'ba'na ke'nanga andallekang mae ri Batarana sikontu linoa.

MATIUS 19:28

Nakanamo Isa ri ke'nanga, “Tappa' mako angkanaya: Ri Lino Berua, lammempoi Ana' Ma'rupataua irate ri empoang kala'biranNa. Anjo wattua sallang, ikau ngasemmi ana'-ana' gurungKu lammempo irate ri sampuloa anrua empoang kala'birang. Na ikaumi langngadeli sampuloa anrua suku ri bansa Israelka!

LUKAS 22:30

Lanri kammana, akkulle tommako amminawang a'rannu-rannu siagang iNakke ri wattungKu a'jari Karaeng. Siagang lammempo ngaseng tommako irate ri sampuloa anrua empoang kala'birang, untu' ammarenta ri sampuloa anrua bansa Israel.”

YOHANES 14:2

Ri balla'Na ManggeKu jai tampa' pammantangang. ErokkA' a'lampa mange anjoreng ampasadiang ngasengko tampa'. Ka'de' tena nakamma tena oloKu lakkana kamma ri kau ngaseng.

PAPPICINI' 3:21

Ia ammetaya, laKupa'biangi ammempo ri empoang kala'birangKu siagang sipammempoangA' sangkamma Kalengku le'bakamo ammeta siagang kamma-kamma anne siagang ManggeKu ri empoang kala'biranNa.