ZAKHARIA 14:10 - KITTA' MATANGKASA'

¹⁰ Sikontu pa'rasanganga appakkaramula battu ri Geba bageang wara' sa'genna Rimon ri bageang timboro', la'jari lappara' ngasengi. Mingka Yerusalem lammenteng tinggi nai', la'bi tinggiangngang nabutta niaka ri tammulilina; anjo kotaya la'la'baki appakkaramula battu ri Pakke'bu' Lompo Benyamin sa'genna mange ri Pakke'bu' Lompo Panyingkulu', iamintu tampa'na pakke'bu' lompo Makase'rea siagang battu ri Menara Hananel sa'genna mange ri tampa' pammaccokang anggoro'na karaenga.

ZAKHARIA 14:10 Iomraidhean Croise

1 KARAENG-KARAENG 15:22

Le'baki anjo, sikontu tau niaka ri Yerusalem niparentakangi ri Karaeng Asa untu' angngangka' batu siagang kayu le'baka napake Baesa ri Rama untu' angkassakki anjo kotaya. Anjo bahang-bahanga napakemi Asa untu' angkassakki kota Mizpa siagang Geba, iamintu kota niaka ri daera Benyamin.

2 KARAENG-KARAENG 14:13

Nijakkala'mi Amazia ri Yoas, nampa a'lampa Yoas mange ri Yerusalem anruntungi tembo'na anjo kotaya kira-kira 200 metere' la'buna, appakkaramula battu ri Pakke'bu' Lompo Efraim sa'genna mange ri Pakke'bu' Lompo Panyingkulu'.

1 PATTOTTORANG 4:32

Ammantang tongi ke'nanga ri tampa' maraenga, iamintu: Etam, Ain, Rimon, Tokhen, Asan,

1 PATTOTTORANG 6:77

Turungang battua ri Merari tenayapa nanggappa tampa', nisarei desa-desa siagang parang-parang ruku' niaka ri tammulilina iamintu: Ri daera suku Zebulon, iamintu: Rimono siagang Tabor.

2 PATTOTTORANG 25:23

Nijakkala'mi Amazia ri Yoas nampa nierang mange ri Yerusalem, siagang naruntung tembo'na anjo kotaya kira-kira nia' 200 metere' la'buna, appakkaramula battu ri Pakke'bu' Lompo Efraim sa'genna mange ri Pakke'bu' Lompo Panyingkulu'.

2 PATTOTTORANG 26:9

Ambangungi Uzia menara ri Pakke'bu' Lompo Panyingkulu', ri Pakke'bu' Lompo Ka'bung Lappara', siagang pa'bilukang tembo', untu' ampakajarreki kota Yerusalem.

NEHEMIA 12:39

Nampa ammalo ikambe ri Pakke'bu' Lompo Efraim, Pakke'bu' Lompo Salloa, Pakke'bu' Lompo Juku', Menara Hananeel siagang Menara Mea sa'genna ri Pakke'bu' Lompo Gimbala'. Ammantangi barisanna ikambe ri ampi'na Pakke'bu' Lompo Pa'jagaang ri ampi'na Balla'Na Batara ri Yerusalem.

NEHEMIA 3:1

Iaminne laporang ri passala' antekamma batena nipakabaji' tembo' kalli'na kota Yerusalem. Imang Lompoa niarenga Elyasib, siagang ngaseng aganna ambangungi ammotere' Pakke'bu' Lompo Gimbala', ampatabai sikamma pakke'bu'na siagang antangkasi poro untu' Batara. Iatommi ke'nanga ampakabajiki siagang antangkasi temboka sa'genna ri Menara Sibilangngang, kammayatompa sa'genna ri Menara Hananeel.

YESAYA 10:29

Allalomi ke'nanga ri pa'limbangnganga siagang a'bangngi ke'nanga ri Geba! Annekkere'mi pandudu'na kota Rama, siagang larimi pandudu'na Gibea, kotana Saul.

YESAYA 2:2

Ri allo-allo labattua bulu' tampa' Balla'Na Batara ammenteng tinggi nai' siagang ammenteng kassaki irate moncong-moncong siagang sikamma buluka. Sikontu bansaya a'balulungi mange anjoreng,

YEREMIA 20:2

naparentakammi sollangku nitunrung siagang niepong ri Pakke'bu' Lompo Benyamin, pakke'bu' lompo bageang ratena Balla'Na Batara.

YEREMIA 30:18

Nakana pole Batara: “Ikau, ummakKu laKukamaseangko siagang laKupakabajiki ammotere' katallassannu ri butta passolongang cera' kalennu. Lanibangungi ammotere' Yerusalem, siagang lanipakabajiki balla' karaenna.

YEREMIA 37:13

Mingka ri wattungku battu mange ri Pakke'bu' Lompo Benyamin, komandang tantara tugasaka anjoreng natahanga' nampa nakana, “Erokko lari a'limbang mange ri tu Babel!” (Anjo komandang tantaraya niarengi Yeria, ana'na Selemya, cucunna Hananya).

YEREMIA 38:7

Anjo wattua nia' sitau tu Sudan anjama ri balla' karaenga. Arenna iamintu Ebed-Melekh. Nalangngereki angkanaya nipantamakka' ri anjo bungunga. Ri wattunna karaenga sitabangi ammimping rapa' ri Pakke'bu' Lompo Benyamin,

AMOS 9:11

Nakana Batara, “Lanarapiki wattunna naKupoterang kakaraenganna Daud. Kamma-kamma anne anjo kakaraenganga kontumi balla' rumbanga. Mingka laKupakabajiki ammotere' tembo'-tembo'na siagang laKubangungi ammotere' sa'genna a'jari sangkamma riolo.

MIKHA 4:1

Ri allo-allo labattua bonto, tampa' Balla'Na Batara, lammenteng kassaki nai' ri langika la'biangngangi nasikamma monconga siagang bonto-bontoa. Sikontu bansaya a'balulungi mange anjoreng

ZAKHARIA 12:6

Anjo alloa sikamma kaluarga Yehuda laKupa'jari rapang pepe' lalang ri pa'gompoang kayu tunua yareka sulo a'rinraya irawanganna gandung-gandung nikawarranga; lanaancuruki ke'nanga sikamma bansa-bansa niaka ri tammulilina. Mingka pandudu'na Yerusalem tuli ammantangi lalang ri kotaya siagang amang.

ZAKHARIA 2:4

Nakana malaeka' makase'rea mae ri malaeka' makaruaya, “A'lampako linta' mange ri anjo tau rungkaya, siagang pauangi angkanaya lateai sipato' rassina kota Yerusalem napakamma tau siagang olo'-olo' niparakai, sa'genna tena olona lakkulle nibangung tembo' pakkallika ri tammulilina.

ZAKHARIA 8:3

LammoterekKa' mange ri Yerusalem, anjo kota matangkasakKu, nampa ammantang anjoreng. Laniassengi Yerusalem salaku kota tamamminraya, siagang bontoNa Batara Kaminang Koasaya lanigallaraki Bonto Matangkasa'.

HAKING-HAKING 20:45

Tantarana tu Benyamin maraengannaya nagilimmi kalenna nampa lari ammalo ri daera parang lompo mangea ri moncong-moncong batu ri Rimon. Nia' 5.000 tau battu ri ke'nanga nibuno ri tangngana aganga. Maraenganga niondang tulusuki sa'genna mange ri Gideon. Nia' 2.000 tau battu ri ke'nanga nibuno.

HAKING-HAKING 20:47

Mingka battu ri anjo ke'nanga laria ammalo ri daera parang lompo mangea ri moncong-moncong batu ri Rimon, nia' 600 tau lappasa'. Ammantangi ke'nanga ri Rimon patambulang sallona.

HAKING-HAKING 21:13

Nampa sikontu umma' Israel akkirimmi tunisuro mange ri tu Benyamin niaka ri moncong-moncong batu ri Rimon untu' angngerang passiamakkang.