ZAKHARIA 11:12 - KITTA' MATANGKASA'

^12-13 Kukanamo mae ri ke'nanga, “Punna situju ngasengki', kisareanga' gajiku; punna tena, tea' maki'.” Nampa nasarema' ke'nanga tallumpulo doe' pera' untu' gajiku. Nakana Batara ri nakke, “Pantamaki anjo doeka ri tampa' pammoneang doeka ri BallakKu.” Jari kupantama'mi anjo tallumpuloa doe' pera' ri tampa' pammoneang doeka ri Balla'Na Batara. Sikamma jinjo bawang pangnganggara'na ke'nanga mae ri nakke!

ZAKHARIA 11:12 Iomraidhean Croise

PA'JARIANG 23:16

Situjumi Abraham ri anjo anggarang ballinna. Narekemmi doe' pera'na sangkamma jaina anjo napaua Efron, iamintu patambilangngang doe' pera', situru' timbangang ia biasaya napake padangganga. Nampa nabayara'mo mae ri Efron, nisa'bi ri sikamma tu Het niaka hadere'.

PA'JARIANG 37:28

Na ri wattunna nia' siapa are padanggang battu ri Midian allalo, nipasulu'mi Yusuf ri sikamma sari'battanna battu lalang ri anjo bungunga. Nampa nabalukang ke'nanga ri anjo tu Ismaelka. Na ia ballinna iamintu ruampulo doe' pera'. Nampa nierammo Yusuf ri anjo sikamma padangganga mange ri Mesir.

1 KARAENG-KARAENG 21:2

Ri se'reang allo nakanamo Ahab ri Nabot, “Sareamma' anjo koko anggoro'nu nasaba' ambani anjo kokoa battu ri balla' kakaraengangku. Erokka' a'lamung gangang-gangang anjoreng. Lakusareko koko anggoro' la'bi bajika sambenna, yareka punna erokko lakuballi situru' anggarang siratannaya.”

1 KARAENG-KARAENG 5:6

Naassemmi Karaeng Allata'ala angkanaya ri tangnga-tangngana ra'yakku tena tau cara'de' anna'bang poko' kayu sangkamma ra'yatta. Lanri kammana anjo, kupalaki ri katte poro akkullei kisuro ra'yatta ampa'na'bangnganga' poko'-poko' camara ri Libanon. Lakusuroji ra'yakku ambantui ke'nanga, siagang manna siapa gaji kipattantua untu' ke'nanga anjo taunta, lakubayaraki.”

KALAPPASSANG 21:32

Punna anjo tau nibunoa ata bura'ne yareka baine, anjo patanna sapi musti a'bayaraki tallumpulo doe' pera' mae ri anjo patanna ata, siagang anjo sapi lakia musti nisambilai batu sa'genna mate.

YEREMIA 32:9

Jari kuballimi anjo tampaka battu ri Hanameel, sampulo antuju doe' pera' ballinna. Akkio'ma' siapa are sa'bi, siagang ri dallekanna ke'nanga kutekemmi sura' pammallina, nampa kusare segele' siagang kutimbangi doe'na.

MALEAKHI 3:5

Nakana Batara Kaminang Koasaya, “LabattuA' mae ri kau ngaseng untu' angngadeli. LabattuA' linta' anjari sa'bi mae ri pabale'-bale' mataya, sikamma tau a'gau' bawanga, pasa'bi balle-ballea, a'gau' jekkonga ansarei gajina tau angnganre gajia, tau anjallakkangai sikamma jandaya, ana'-ana' kukanga, siagang bansa maraeng battua annompang, mae ri sikontu tau tenaya napakala'birikKa'.”

MATIUS 26:15

Nakanamo ri ke'nanga, “Apa lanusareanga' punna kupassareang Isa ri kau?” Nisaremi ri ke'nanga tallumpulo doe' pera'.

MATIUS 27:10

Na anjo doeka napakei ke'nanga ammalli Tampa' Papare' uring, situru' le'baka Napassuroang Batara ri nakke.”

MATIUS 27:9

Lanri kammana, a'rupami apa le'baka napau Na'bi Yeremia, angkanaya, “Natarimai ke'nanga tallumpulo doe' pera', iamintu pa'bayara' ballinna KalenNa, napassamaturukianga bansa Israel.

YOHANES 13:2

Angnganre bangngi Isa siagang ana'-ana' gurunNa. Antama'mi Billisika ri atinna siagang cinnana Yudas, ana'na Simon Iskariot, sa'genna ero'mi Yudas ambalukangi Isa.