YOSUA 7:1 - KITTA' MATANGKASA'

¹ Le'ba'mi Naparentakang Batara mae ri umma' Israel angkanaya battu ri sikontu apa-apa mustia niancuru' ri Yerikho, tena sikali apa-apa akkulle nialle. Mingka anjo parentaya tena nanituruki. Nia' sitau bura'ne niareng Akhan andakkai anjo parentaya, sa'genna sanna' larroNa Batara mae ri umma' Israel. (Manggena Akhan niarengi Karmi siagang toana niarengi Zabdi, battu ri golongang bijanna Zerah lalang ri suku Yehuda.)

YOSUA 7:1 Iomraidhean Croise

PA'JARIANG 34:27

Le'baki nagaukang anjo pammunoanga ke'nanga, battu tommi ana'na Yakub maraenganga anrampasaki barang-baranna taua ri anjo kotaya, a'jari pa'balasa' lanri le'ba'na nigau' sala andi'na ke'nanga.

2 SAMUEL 24:1

Larromi pole Batara mae ri tu Israel, nampa nanyonyo' Daud lanri ero'Na Napabattu kasukkaranga mae ri anjo bansaya. Nakana Batara ri ia, “Suro bilangi pandudu'na Israel siagang Yehuda.”

2 KARAENG-KARAENG 5:24

Ri wattunna battumo ri bonto napammantangia Elisa, naallemi Gehazi anjo doeka siagang pakeanga battu ri palayang-palayanna Naaman, nampa naboli' lalang ri balla'. Nasuromi ammotere' anjo palayang-palayanga,

1 PATTOTTORANG 21:7

Tena Nasannang Allata'ala ri anjo bilanga siagang Nahukkummi tu Israel.

2 PATTOTTORANG 24:18

Jari tenamo nanynyomba ra'yaka ri Balla'Na Batara, Allata'alana boe-boena ke'nanga, mingka anynyombami ke'nanga ri barhala siagang patung-patunna Dewi Asyera. Lanri anjo dosana ke'nanga nalarromo Batara mae ri tu Yehuda siagang Yerusalem.

EZRA 9:6

Kukanamo, “O, Allata'alaku, siri'-sirika' angngangkaki ulungku ri dallekanTa. Dosa-dosana ikambe attambung-tambungi irate ri ulunna ikambe sa'genna narapi' langika.

AYUB 35:8

Parannuji bawang tau nipakarugi ri dosa-dosanu. Iatommi upa' lanri kabajikannu.

KATO'BA 9:18

A'matu-matuangngangi kacara'dekanga kala sanjataya, mingka silisere' tai balao anra'massi je'ne' sigumbang.

DANIEL 9:7

O Batara, tindakanTa tuli annabai siagang adeleki, mingka ikambe tonji tuli ampakasiriki kalenna ikambe, iamintu ikambe ngaseng ammantanga ri Yudea siagang ri Yerusalem, siagang sikontu julu bansana ikambe le'baka Kipasiara' mange ri pa'rasangang-pa'rasangang bellaya siagang ambania, lanri tenana namajarre' tappa'na mae ri Katte.

KAIMANGNGANG 10:6

Nampa nakana Musa mae ri Harun siagang sikamma ana'na maraenga, iamintu Eleazar siagang Itamar, “Teako lappassangngi akkara'ngasa' uu'nu siagang teako kekkeki pakeannu lanri ero'na nupappicinikang angkanaya si'nako lanri kamateangko. Punna kamma anjo nugaukang, lamateko, siagang sikontu umma' Israel lanikalarroi ri Batara. Mingka sikontu umma' Israel maraenga akkulle si'na lanri anjo tau ruaya mate nakanrei pepe'Na Batara.

YUNUS 1:7

Wattunna nai'mo Yunus siagang anjo juraganga, massing nakanamo para ia anjo ana'-ana' kappalaka, “Umba nanigoccangi arenga sollanna naniassengi angkana inai sala sa'genta nituju ri anne balaya!” Nagoccammi arenna ke'nanga, na arennamo Yunus nai'.

YOSUA 22:16

Nampa lalang arenna sikontu umma'Na Batara, nakanamo ke'nanga mae ri suku Ruben, suku Gad siagang suku Manasye rayaya ri Gilead, “Angngapa nugaukangi anne panggaukang ja'dala' kammaya mae ri Allata'alana Israel? Lanri nubangunna anne tampa' pakkoro'bangngang kalennu, nuewami Batara! Tenamo nanuturuki parenta-parentaNa!

YOSUA 22:18

Nampa kamma-kamma anne erokko ambokoi poleangi Batara? Punna nuewa anne alloa Batara, ammuko lalarroi mae ri sikontu umma' Israel.

YOSUA 22:20

U'rangi, anjo Akhan ana'na Zerah taerokai anturuki parentaNa Batara ri passala'na barang-barang mustia niancuru'; nampa apa kale'bakkanna? Nihukkungi sikontu umma' Israel! Akhan bawang doraka, mingka teai kale-kalenna bawang mate!”