YOSUA 10:8 - KITTA' MATANGKASA'

⁸ Nakana Batara ri Yosua, “Teako mallakki mae ri ke'nanga. Le'ba'mi Kupattantu laKupassareang pammetanga mae ri kau; lanri kammana anjo tena manna sitau ri ke'nanga akkulle attahang angngewako.”

YOSUA 10:8 Iomraidhean Croise

1 KARAENG-KARAENG 20:13

Lalang anjo wattua, nia'mo sitau na'bi mange ri Karaeng Ahab na nakana, “Nakana Batara, ‘Nuciniki anjo tantara jaia? LaKusareko pammetang mae ri ke'nanga anne alloa. Lanuassengi angkanaya iNakkemi Batara.’ ”

ROMA 8:31

Apamo lanikana kamma-kamma anne ri passala' kammaya ngaseng anjo? Punna Narurungangki' Allata'ala, maka inai akkulle angngewaki'?

PAOLE 3:2

Mingka Nakanamo Batara mae ri nakke, ‘Teako mallakki mae ri ia, Musa. LaKupassareangi anjo taua mae ri kau, kammayatompa tantarana siagang sikontu daerana. Gaukammi mae ri ia sangkamma apa le'baka nugaukang mae ri Sihon, karaenna tu Amori ammarentaya ri Hesybon.’

PAOLE 7:24

LaNapassareangi sikamma karaenna ke'nanga mae ri kau. Lanubunoi ke'nanga, nampa nikaluppaimo arenna ke'nanga. Tena manna sitau akkulle attahang andallekangko; anjo ke'nanga lanuancuru' ngasengi.

YOSUA 10:25

Le'baki anjo nakanamo Yosua mae ri sikamma perwiraya, “Teako lussakki siagang teako mallakki. Paralluko tappa' siagang barani, nasaba' kammaminne caraNa Batara langgauki sikontu musunnu.”

YOSUA 10:9

Sipattangi bujuru' Yosua siagang pasukanna a'gio' battu ri Gilgal mange ri Gibeon, nampa nabunduki silalonna tu Amori.

YOSUA 11:6

Nakanamo Batara mae ri Yosua, “Teako mallakki mae ri ke'nanga. Ri wattu kamma-kammaya anne ammuko, le'ba' ngasemmi Kubuno ke'nanga lanri tu Israel. Musti nupesoki jaranna ke'nanga, siagang musti nutunui kareta-kareta pa'bundukanna ke'nanga.”

YOSUA 8:1

Nakana Batara ri Yosua, “Passe'rei sikontu tantaranu, nampa a'lampako siagang ke'nanga mange ri Ai. Teako lussakki siagang teako mallakki! INakke lassareko pammetang mae ri karaeng Ai. Ra'ya'na, kotana, kammayatompa pa'rasanganna lanuallei.

HAKING-HAKING 6:16

Nakanamo Batara, “Tantu akkullenu, nasaba' iNakke lambantuko. Akkullei nuancuru' tu Midian siagang gampang, sanrapang angkanaya sitauji nudallekang.”

HAKING-HAKING 7:9

Anjo bangngia Nakanamo Batara ri Gideon, “Ambangung mako Gideon! Mange mako ambunduki tu Midian ri kemana. Kusareko pammetang mae ri ke'nanga.

1 SAMUEL 17:47

Siagang sikontu tau niaka anrinni lanaciniki angkanaya tena Naparallu Batara ri pa'dang yareka poke untu' ampasalamaki umma'Na. Iami ampattantui jappana anne pa'bundukanga, siagang Iami lampassareang ngasengko mae ri limanna ikambe.”