YOHANES 8:44 - KITTA' MATANGKASA'

⁴⁴ Ia manggenu iamintu Billisika, naia eroka nuturuki iamintu ero'na manggenu. Battu ri uru-urunaji napabuno memang anjo Billisika. Tena le'bakai mae ri katojenganga, lanri tena katojengang ri kalenna. Punna a'balle-balle, anjo biasa memanji ri ia, nasaba' kamma memanjinjo sipa'na. Iami paballe-balle, siagang iami nakabattui sikontu balle-ballea.

YOHANES 8:44 Iomraidhean Croise

PA'JARIANG 3:15

Lasikabirisiko siagang anne bainea. Sossorannu siagang sossoranna latuli simusui. Laniancuruki ulunnu ri sossoranna, nalanukokko' kacunu'na ke'nanga.”

1 KARAENG-KARAENG 22:22

Akkuta'nammi Batara angkana, ‘Antekamma carana?’ Appialimi anjo roh angkana, ‘La'lampa' nampa kupa'jari a'balle-balle ngaseng na'bi-na'bina Ahab.’ Nakanamo Batara, ‘Baji'mi, gaukammi anjo, lakkulleko antu anynyonyoki.’ ”

1 PATTOTTORANG 21:1

Eroki billisika ancilakai tu Israel; lanri kammana nanyonyo'mi Daud sollanna nasuro bilang taua.

AYUB 1:11

Mingka ebara' angkana Kialle ngasengi anjo sikontu kakalumanynyanganna mattantu lanatunrai memang maKi' lalang silalonna.”

MATIUS 12:34

Ikau tau ja'dala' ngasengko! Antekammako lakkulle ampaui kabajikanga punna tau ja'dalakko? Apa nupau iamintu bonena lalang atinnu, assulu' battu ri bawanu!

MATIUS 13:15

Nasaba' tattongko' ngasemmi pikkiranna ke'nanga anne, a'jari tamallangngerai tolinna na tatassungkea matanna. Kajariammi anne, sollanna taccinika matanna tallangngera tolinna, tammahanga pikkiranna, na taeroka ammotere' mae ri Nakke, nampa Kupa'jari baji' ngaseng ke'nanga.’ ”

MATIUS 13:38

Anjo tanaya, iaminne linoa nataba. Na anjo lamungang bajika, iamintu tau a'jariamo umma'Na Allata'ala. Na anjo reaya, iamintu tau mannurukia ri Billisika.

YOHANES 6:70

Appialimi Isa Nakana, “Sai sampuloko anrua Kupile? Mingka nia' sitau ri kau a'jari setang!”

YOHANES 7:17

Inai-nai ero' anturuki ero'Na Allata'ala, lanaassengi angkanaya pangngajarang battu kemae anjo Kupangngajaranga. Apaka pangngajarang battu ri Allata'ala yareka pangngajarang battu ri KalengKu.

YOHANES 8:38

Apa Kucinika ri ManggeKu, iaminjo Kupau. Na ikau ngaseng, nugaukang tonji apa napangngajarang manggenu ri kau.”

YOHANES 8:41

Panggaukanna ngaseng manggenu antu nugaukanga ngaseng todong.” Appialimi ke'nanga angkana, “Ikambe anne teaiki' ana'-ana' harang. Se'reji manggena ikambe, iamintu KalenNa Allata'ala.”

YOHANES 8:55

mingka tena nanuassengi. Mingka iNakke Kuassengi. Ebara'na Kukana tena naKuassengi, a'jari tu paballe-balleMa', sangkamma ikau ngaseng. Mingka iNakke Kuassengi siagang Kuturuki kananNa.

LAMPA-LAMPANA 13:10

nampa nakana, “He, ikau paballe-balle lompoa, ana' tu sannaka ja'dala'na! Ikaumi musunna sikontu apa-apa bajika. Angngapa nutaeroka ampamari anrompa-rompai ero'Na Allata'ala untu' ampasalamaki rupataua?

LAMPA-LAMPANA 24:9

Amminawang ngaseng tommi sikamma tu Yahudi niaka anjoreng antudui Paulus. Siagang napakkontu tojemmi ke'nanga sikamma anjo apa le'baka napau Tertulus.

LAMPA-LAMPANA 5:3

Nakanamo Petrus, “Ananias, angngapa nanupassareang atinnu nakoasai Billisika, sa'gennu a'balle-balle ri RohNa Allata'ala? Iamintu nuboli' cokko-cokkoi untu' kalennu tawaruanna doe' ballinna anjo tanaya?

2 KORINTUS 11:3

Mingka ranggaselai pa'maikku, gassingka nigodai pikkirannu sa'genna tenamo nujarre' ri janjinnu mae ri Almasi. Sangkamma todong Hawa riolo, nigoda tongi ri kacara'dekanna ularaka.

1 PETRUS 5:8

Paralluko tuli tutu siagang a'jaga-jaga! Nasaba' anjo Billisika iami musunnu. A'lampai anrai'-kalau' sanrapang singa nye'nyereka amboyai apa akkullea nalollong.

2 PETRUS 2:4

Manna malaeka'-malaeka' dorakaya tena todong nalata'lappasa' battu ri hukkunganNa Allata'ala. Lanipela' tongi ke'nanga antama' ri naraka. Nipantamaki ke'nanga ri tampa' sassanga, nanitahang anjoreng sa'genna narapi' Allo Pangadelanga.

1 YOHANES 1:8

Punna nikana tena nakidoraka, niballe-balleimi kalenta; taniassengami Allata'ala lalang ri atinta.

1 YOHANES 2:21

Jari kutulisiki anne suraka mae ri kau ngaseng teai lanri tenanapa nanuassengi pangngajarang tojenga, mingka ba'lalo lanri nuassennamo; siagang nuassenna tommo angkanaya anjo pangngajarang tojenga tale'bakai a'balle-balle.

1 YOHANES 2:4

Inai-nai angkana, “Kuassengi Allata'ala,” mingka tena namappilangngeri mae ri sikamma parentaNa, a'balle-ballemi anjo taua, siagang tanaassengai Allata'ala lalang ri atinna.

1 YOHANES 3:12

Teako sangkammai Kain, ia battua ri I Ja'dala' assala'na, siagang ambunoai sari'battang kalenna. Apa saba'na nanabuno Kain sari'battanna? Nasaba' salai anjo apa-apa nagaukanga mingka annabai anjo apa-apa nagaukanga sari'battanna.

1 YOHANES 3:15

Inai-nai angkabirisi paranna tau iami pabuno tau; na nuassemmo angkanaya anjo tau kammaya takkulleai nagappa katallassang sitojennaya siagang mannannunganga.

YUDAS 1:6

U'rangi tongi sikamma malaeka' eroka appanggaukang allaloangai kakoasanna ke'nanga, sa'genna a'lampa ke'nanga ambokoi pammantanganna. Nisikko'mi ri Allata'ala sikamma anjo malaekaka siagang rante tamattappuka, irawa ri tampa' sassanga rawanganna buttaya. Anjoremmi ke'nanga nitahang turus, sa'genna nitappuki hukkunganna ke'nanga ri Allo sannaka heba'na sallang.

PAPPICINI' 12:9

Nipela'mi anjo naga lompoa assulukang! Iami anjo ulara' toaya niarenga Billisi' yareka Roh Ja'dalaka, antipuai sikontu linoa. Nipela'mi naung ri linoa siagang sikontu malaeka'na.

PAPPICINI' 13:14

Na natipu ngasemmo sikontu rupataua ri lino lanri anjo gau'-gau' appakalannasa' akkullea nagaukang ri dallekanna anjo olo'-olo' bungasa' battua sumpaeng. Siagang nasuro ngasemmi ke'nanga appaenteng se're patung untu' anjo olo'-olo' le'baka bokka' nataba pa'dang, mingka attallasa' iji.

PAPPICINI' 2:10

Teako mallakki mae ri kapa'risanga, tenayamo nasallo namusti nukasia'. U'rangi, angkanaya jaiko lanapantama' Billisika ri tarungkua untu' lanaso'ri. Lasessako sampulo allo sallona. Paralluko tamamminraya ri tappa'nu sa'gennu mate; na iNakke lassareangko katallassang sitojennaya siagang mannannunganga, a'jari hadia ri pammetannu.

PAPPICINI' 21:8

Mingka tau balloranga, tau a'bali' ballanga, tau bambalaka pabuno-bunoa, tau pagau' bawanga, tau ammakea pangngissengang siagang baca-baca, tau anynyombaya barhala, kammayatompa sikontu tau paballe-ballea, lanipelaki antama' ri tamparang pepeka siagang bara a'rinra-rinraya, iamintu kamateang makaruaya.”

PAPPICINI' 22:15

Mingka sikontu tau anggaukangai apa-apa tenaya matu-matunna, tau ammakea pangngissengang baca-baca, tau a'gau' bawanga, tau ammunoa, tau anynyombaya barhala, siagang tau a'balle-ballea, baji' na'balle-balle lalang bicara yareka lalang panggaukang, sikontu anjo tau kammaya pantaranganna ngasengi anjo kotaya tampa'na.

PAPPICINI' 9:11

Nia' karaenna, amparentayai ke'nanga; na anjo karaenna ke'nanga iamintu malaeka' anjagayai tubiri'na kamateanga. Arenna ilalang bicara Ibrani iamintu Abadon; na lalang bicara Yunanina iamintu Apolion (battuanna “Pammanrakia”).