YOHANES 15:1 - KITTA' MATANGKASA'

¹ Nakanamo pole Isa, “INakkemi sanrapang poko' anggoro' sitojennaya, na ManggeKu a'jari Tummarakaina ri kokonNa.

YOHANES 15:1 Iomraidhean Croise

KELONG MALA'BIRI' 7:12

Umba ki'lampa bari'basa' mange ri kokoa, anciniki gassingka a'rappo ca'dimi poko' anggoroka, yareka ta'bakkara'mi bunganna; gassingka a'bungami poko' delimaya. Anjoreng lakusareko tanringku.

YESAYA 4:2

Nia' sallang wattunna naNapa'jari Batara sikamma lamung-lamunga siagang poko'-pokoka a'jari lompo siagang ga'ga ri anne pa'rasanganga. Anjo wattua tu Israel salamaka larannui pa'mai'na siagang lalompoi pa'mai'na lanri baji'na wassele' kattoanna.

YESAYA 60:21

Lannabai tindakanna pandudu'nu, lanapatangi ke'nanga pa'rasanganga satunggu-tungguna. Rapangi ke'nanga lamungang Kucangkoka KalengKu, untu' ampa'nyatai kala'birangKu.

YESAYA 61:3

untu' assarei karannuang siagang kate'neang pa'mai' sikamma tau si'naya siagang tau susaya; untu' ampinrai si'nana ke'nanga a'jari kelong pammuji. Larapangi ke'nanga poko' kayu nilamunga ri KalenNa Batara. Lanagaukangi ke'nanga apa bajika siagang annabaya, sa'genna nipakala'biri' Batara.

YEREMIA 12:10

Jai pamarenta bansa maraeng le'ba' ampanraki koko anggorokKu siagang angngonjo'-onjokangi sikamma kokongKu. Pa'rasangang ga'gaKu napinrai a'jari parang luara' sinoa.

YEREMIA 2:21

Kulamungko rapang poko' anggoro' Kupilea battu ri lamungang bajika. Mingka kamma-kamma anne amminra mako, a'jari lamung-lamung liara' siagang tenaya matu-matunna.

YEHEZKIEL 19:10

Amma'nu rapangi poko' anggoro' ga'ga attimboa ri koko a'biring pangka binangaya. Coppongi leko'na na'rappo lanri alla'bina je'neka anjoreng.

HOSEA 10:1

Israel rapangi poko' anggoro' roasaka rapponna. Pila' katambangi kalumanynyanna, pila' jai tongi tampa' pakkoro'bangnganga napareka. Pila' kalumanynyangi, pila' baji' tongi patung-patunna barhala nasombaya.

ZAKHARIA 3:8

Pilangngeri, he ikau Imang Malompo Yosua, kammayatompa ikau ngaseng sikamma imang-imang aganna maraenga, ikau ngasemmi a'jari pangngebarang battu ri allo baji' labattua. Anjo wattua laKusuroi atangKu niarenga ‘I Cu'la'’.

MATIUS 15:13

Appialimi Isa angkana, “Sikamma lamung-lamung tenaya Nalamungi Manggeku ri suruga lanibi'buki.

MATIUS 20:1

“Punna ammarenta Allata'ala, pangngebaranna lakammaminne: Nia' se're tau ero' a'boya pajama ri koko anggoro'na. A'lampa bari'basa'mi a'boya tau.

MATIUS 21:33

Nakanamo pole Isa, “Pilangngerimi pole anne se'rea pangngebarang. Nia' se're tau ero' allamungi kokonna anggoro'. Napangngalakkimi attammulili kokonna. Nampa appare' kali'bong eroka napake ammacco' je'ne' anggoro'. Appare' tommi balla'-balla' jaga tinggia. Le'baki anjo napappitesangammi anjo koko anggoro'na mae ri siapa are pajama koko. Nampa a'lampa ri se'reang pa'rasangang maraeng.

MARKUS 12:1

Nampa appakkaramulami Isa a'bicara pangngebarang mae ri anjo imang-imang kapalaya, guru-guru agamaya kammayatompa pamimping-pamimpinna tu Yahudia. Nakana Isa, “Nia' se're tau a'lamung anggoro' ri kokoa, nampa nakalli' ri tammulilina. Le'baki anjo angngekemi kali'bong eroka napake ammacco' je'ne' anggoro'. Nampa appare' balla' pakkammikang. Le'baki anjo napappitesangammi anjo koko anggoroka mae ri siapa are pajama koko, nampa a'lampa ri se'reang pa'rasangang maraeng.

LUKAS 13:6

Le'baki anjo, Nacarita tommi Isa anne pangngebaranga, Nakana, “Nia' se're tau, nia' poko' ara ri koko anggoro'na. Ri se'reang allo nanaboya rapponna anjo poko' araya, mingka tena manna sibatu nabuntulu' rapponna.

YOHANES 1:17

Nitarimai HukkunNa Batara, tete ri Musa. Mingka pangngamaseang siagang pangngatutuiNa Allata'ala nipa'nyatami lalang ri Isa Almasi.

YOHANES 1:9

Singara' sitojennaya, assingariai sikontu rupataua, nia'mi battu ri lino.

YOHANES 15:2

Sikamma tangke-tangke niaka ri Nakke nata'rappoa, lanipelaki. Na sikamma tangke-tangke a'rappoa, lanitangkasi sollanna pila' jai rapponna.

YOHANES 6:32

Nakanamo Isa ri ke'nanga, “Sitojeng-tojenna, tappa' mako angkanaya, teai Musa, passangalinna ManggeKumi assareko pangngebarang roti sitojennaya, iamintu battu ratea ri suruga.

YOHANES 6:55

Nasaba' assingKumi kanre sitojennaya, siagang cerakKumi inungang sitojennaya.

ROMA 11:17

Anjo tangke-tangkenna poko' zaitunga – iamintu pangngebaranna tu Yahudia – le'ba'mi nitoto sipa'rua. Nampa anjoreng ri bate le'baka nitoto nipaccangkokimi tangke poko' zaitun tenaya niparakai, iamintu pangngebaranna ikau bansa maraenga. Nipacangko' mako mae anjoreng sollanna nukasia' sikamma kabajikang battua ri katallassang rohanina tu Yahudia.

1 KORINTUS 3:9

Ikambe sangkamma jaki' para tau anjama ri Allata'ala; na ikau sanrapangko kokonNa Allata'ala. Yareka sanrapang tongko balla' bangunanNa Allata'ala.

1 YOHANES 2:8

Mingka manna nakamma, beru tonji anne kutulisika; nasaba' akkullei nicini' katojenganna lalang ri KalenNa Almasi siagang lalang ri kalennu ngaseng. Nasaba' lanynya'mi kamma-kamma anne sassanga siagang assioro'mi singara' kontutojenga.