YO"EL 2:3 - KITTA' MATANGKASA'

³ Rapang pepe' akkanrea siagang appakamutung naputtai ke'nanga sikontu lamung-lamunga. Riolo, anjo pa'rasanganga rapangi Eden, iamintu kokonNa Batara, kale'bakkanna, santanja'mi parang kassi' kalotoroka. Tenamo nia' ammantang tassesa, tena sikali ta'lappasa' battu ri pa'bakkaina ke'nanga.

YO"EL 2:3 Iomraidhean Croise

PA'JARIANG 13:10

Nacinikimi Lot anjo daeraya na nacini'mo angkanaya sikontu Lappara'na Yordan sa'genna mange ri kota Zoar jai je'ne'na, sangkamma kokona Batara, yareka sangkamma butta Mesir. (Kammaminjo kaadaanna ri wattu tenanapa niancuruki kota-kota Sodom siagang Gomora ri Batara.)

PA'JARIANG 2:8

Le'baki anjo appare'mi Allata'ala koko ri Eden, irayanganna anjo tampaka, nampa Napamantang anjoreng anjo tau le'baka Napare'.

PAMMUJI 50:3

Battui Allata'alata siagang talammantangai a'mereki, a'jappa rioloi ri pepe' a'lepa'-lepaka, nikulilingi ri angnging sannaka lompona.

PAMMUJI 97:3

A'la'baki pepeka ri dallekanNa, Napakamutungi musu niaka akkuliling.

KALAPPASSANG 10:15

Sikontu tompo'na buttaya nitongko' ngasengi ri katimbang sa'genna le'leng nicini' buttaya. Sikontu apa niaka nikanre ngasemmi ri anjo katimbanga, iamintu niaka tassesa tenaya nipanraki ri bosi es, kammayami rappo-rappo kayua. Ri sikontu pa'rasanganga tenamo apa-apa moncongbulo ammantang tassesa ri poko'-pokoka siagang lamung-lamunga.

KALAPPASSANG 10:5

Sikontu buttaya lakatongkokang taba sikali ri katimbang sannaka jaina. Sikontu lamung-lamung niaka tassesa, ba'lalo poko'-poko' kayu tenaya nipanraki ri bosi es, lanipaccappuki ri anjo katimbanga.

YESAYA 14:17

Iakami angngancuruki kota-kotaya siagang ampinrai linoa a'jari parang kassi'? Iaka minne le'baka allappassangi sikamma tunitahanna yareka allappassangi ke'nanga ammotere'?’

YESAYA 15:6

Je'ne' binangana Nimrim siagang ruku' attimboa ri birinna kalotoro' taba sikalimi, tenamo timbo-timboang moncongbulo.

YESAYA 33:4

Kamma pa'rappungang katimbang battu taua ambakkai siagang angngellaki ke'nanga.

YESAYA 51:3

Ikau Yerusalem, laKusaleoriko, siagang sikontu niaka ammantang ri alla'na rumbangannu. Sikamma parang kalotoro'nu Kupa'jari koko ga'ga, rapang Eden, koko coppongKu. Anjoreng taua larannui siagang ma'reja-rejai siagang appala' sukkuru' lalang kelong-kelong.

YESAYA 9:18

Sanna' larroNa Batara Kaminang Koasaya, na hukkunganNa rapangi pepe' a'rinra lompo; nampa anjo bansaya napare' kayu tunuang sa'genna cappu' nakanre pepe'. Tena manna sitau angkamaseangi sari'battanna.

YESAYA 9:19

Ri sikontu anjo pa'rasanganga massing a're'bu'mi siagang sambarang mami apa-apa nakanre, mingka tena bassoro'na ke'nanga. Ba'lalo massing para iami sikanre-kanre sipa'agangngang!

YEREMIA 5:17

Lanapaccappuki ke'nanga wassele' buttanu siagang kanre-kanreannu kammayatompa nabunoi ana'-ana'nu. Lanasamballei ke'nanga olo'-olo' sapinu siagang gimbala'nu, siagang lapanraki ngasengi poko'-poko' anggoro'nu siagang poko'-poko' aranu. Lanaancuruki ke'nanga kota-kota ammakea tembo' pattahangngang ia nupattoanga.

YEHEZKIEL 36:35

Jari sikontu taua la'jari lannasaki lanri anjo butta rosoka sumpaeng, kamma-kamma anne a'jarimi koko Eden; siagang kota-kota sinoa riolo, ancuruki siagang a'jari loromi, kamma-kamma anne a'jarimi kota-kota kassa' pattahanganna siagang jai pandudu'na.

AMOS 7:4

Anggappa' se're paccini' pole battu ri Batara Kaminang Tinggia. Kuciniki sadia-sadia untu' anghukkungi umma'Na siagang pepe'. Anjo pepeka nalepaki tamparanga sa'genna la'busu' irawa ri buttaya siagang appakkaramulami napammutung kokoa.

HABAKUK 1:6

Bansa Babel sekkeka siagang pallaka laKupa'jari bansa makoasa. A'barrisiki ke'nanga assulu' battu ri pa'rasanganna nampa najappai sikontu linoa untu' ambetai bansa-bansa maraenga.

ZAKHARIA 7:14

Sanrapang anging barubu, Kubarrasaki ke'nanga sa'genna tarpassa ammantang ri sikamma pa'rasangang-pa'rasangang maraenga. Anne butta copponga a'jari sino sikalimi, tena sikali tau ammantang, siagang roso'mi buttana.”