PAPPICINI' 5:6 - KITTA' MATANGKASA'

⁶ Nampa nia' kucini' sikayu Ana' Gimbala' ammenteng ri tangnga-tangngana anjo empoang kala'biranga nikulilingi ri anjo appaka anu attallasa' siagang sikontu anjo pamimpinga. Anjo Ana' Gimbalaka sangkammai le'ba' nisamballe nicini'. Nia' tuju tanru'na siagang tuju matanna: iamintu tujua roh battu ri Allata'ala, nisuroa battu mange ri sikontu linoa.

PAPPICINI' 5:6 Iomraidhean Croise

2 PATTOTTORANG 16:9

Naparhatikangi Batara sikontu linoa untu' ansarei kagassingang tau majarreka tappa'na mae ri Ia. Toloko ri anjo panggaukannu; lanri kammana anjo appakkaramula kamma-kamma anne tuli lanukasiaki pa'bundukanga.”

DANIEL 7:14

Nisarei kalompoang siagang kakoasanga salaku karaeng, sa'genna sikamma tau battua ri sikontu bansaya, suku bansaya siagang bahasaya napare' atai kalenna mae ri ia. Lattahangi kakoasanna satunggu-tungguna, siagang pamarentahanna tena nalanigulung.

DANIEL 8:3

nampa ri birinna anjo binangaya nia' kucini' sikayu gimbala' laki, la'bu tanru'na, naia se'rea la'buangngangi natanru' se'rea siagang la'bi berui.

MIKHA 4:13

Nakana Batara, “He pandudu'na Yerusalem, a'lampamako mange angngonjo'-onjokangi musunnu! LaKupakagassingko rapang sapi attanru' bassia siagang akkanuku tambagaya. Lanuancuruki jaia bansa, siagang kakalumanynyangngang wassele' narampasaka ke'nanga lanupassareangi mae ri Nakke, Batarana sikontu linoa.”

HABAKUK 3:4

BattuKi' lalang caya malompoTa, battu ri limanTa assulu' singara' lompoa, anjoremmi Kicokko koasaTa.

ZAKHARIA 3:9

Kupadongkoki ri dallekanna Yosua se're batu assulapa' tujua laKusarea ukirang siagang tulisang-tulisang. LaKupelaki dosaya battu ri anne pa'rasanganga lalang siallo.

LUKAS 1:69

Nasaremaki' tu Mappasalama' makoasaya, ikatte atanNa, sossoranna Daud.

YOHANES 1:29

Ammukona, nia'mi Isa nacini' Yohanes battu mae ri ia. Nakanamo Yohanes, “Cini'mi, Iaminjo Ana' Gimbala'Na Allata'ala, antangkasiai dosana bonena linoa.

YOHANES 1:36

Ri wattunna nacini' Isa ammalo, nakanamo, “Ciniki! Iaminjo Ana' Gimbala'Na Allata'ala.”

LAMPA-LAMPANA 8:32

Iaminne anjo aya'-aya' nabacaya ri Kittaka, “Sanrapangi gimbala' nieranga lamange nisamballe, sanrapangi ana' gimbala' tenaya nassa'ra punna nigoncingi bulunna, kamma tomminjo tamakkana-kanana.

PAPPICINI' 1:4

Sikamma sari'battang niaka ri tujua jama'ah ri daera Asia! Inakke, Yohanes, ma'minasa' nuporo nisare ngaseng barakka' siagang kasalewangang battu ri Allata'ala, Ia niaka battu ri pakaramulanna, ri kamma-kammaya anne, sa'genna satunggu-tungguna; kammayatompa battu ri tujua roh ia niaka ri dallekang empoang kala'biranNa Allata'ala,

PAPPICINI' 12:11

Le'ba'mi nibeta ri sari'battanta tete ri cera'Na anjo Ana' Gimbalaka, siagang tete ri katojenganna anjo biritta battua ri Allata'ala, ia le'baka napa'la'bang ke'nanga. Rellai ke'nanga angkoro'bangkangi kalenna sa'genna mate.

PAPPICINI' 13:8

Anjo olo'-oloka lanisombai ri sikontu tau attallasaka ri lino, pantaranganna tau le'bakamo nitulisi' arenna ri wattu tenanapa nipa'niaki linoa, lalang ri kitta' katallassanNa anjo Ana' Gimbala' le'baka nisamballe.

PAPPICINI' 14:1

Nampa kuciniki, nakucini'mo anjo Ana' Gimbalaka ammenteng rate ri Bulu' Sion. Nia' Naagang tau 144.000 jaina, niaka ngaseng ri tompo' kanynyinna ke'nanga tattulisi' arenNa siagang arenNa ManggeNa.

PAPPICINI' 17:14

La'bunduki ke'nanga angngewai anjo Ana' Gimbalaka. Mingka lanibetai anjo sikamma karaenga ri anjo Ana' Gimbalaka siagang sikamma taunNa tamamminraya le'baka Nakio' siagang Napile; nasaba' Ia minjo Ana' Gimbalaka Batarana sikamma tumalompoa, siagang Karaenna sikamma karaenga.”

PAPPICINI' 21:22

Tenai kucini' Balla'Na Allata'ala ilalang ri anjo kotaya, nasaba' ia Balla'Na Allata'ala iamintu KalenNa Batara, Allata'ala Kaminang Koasaya, siagang anjo Ana' Gimbalaka.

PAPPICINI' 21:23

Tena naparallu nasiori mataallo yareka bulang anjo kotaya, lanri nisiorimi ri kala'biranNa Allata'ala, siagang Iaminjo Ana' Gimbalaka a'jari lampunna.

PAPPICINI' 22:1

Napicinikiang tomma' anjo malaekaka binanga assarea katallassang je'ne'na. Anjo binangaya accillaki je'ne'na sanrapang kaca a'lo'loroka battu ri empoang kala'biranNa Allata'ala siagang battu ri anjo Ana' Gimbalaka,

PAPPICINI' 22:3

Tena sikali lalang ri anjo kotaya apa-apa akkullea nataba pangngalarroiNa Allata'ala. Anjo empoang kala'biranNa Allata'ala siagang Ana' Gimbalaka niaki lalang ri anjo kotaya. Lanynyombami sikamma atanNa Allata'ala mae ri Allata'ala;

PAPPICINI' 4:8

Anjo appaka anu attallasa', massing nia' annang ka'nyi'na; siagang rassi ngasengi mata ri tammulilina kalenna siagang ilalanganna kalenna. Allo bangngi anjo anu attallasaka tena nale'ba' ammari akkelonga tojeng, angkana, “Matangkasa', matangkasa', matangkasaki Batara, Allata'ala Kaminang Koasaya; Ia niaka ri pakaramulanna, ri kamma-kammaya anne, sa'genna satunggu-tungguna.”

PAPPICINI' 5:11

Nampa accinikka' pole. Nia' kulangngere' sa'ra malaeka' assa'bu-sa'bu siagang a'juta-juta jaina! Ammentengi ke'nanga angkulilingi anjo empoang kala'biranga siagang anjo appaka anu attallasa' kammayatompa anjo ruampuloa angngappa' pamimping.

PAPPICINI' 5:12

Siagang sa'ra lompo, nakana, “Anjo Ana' Gimbala' le'baka nisamballe, siratangi annarima koasa, kakalumanynyangang, kacara'dekang siagang kagassingang; siratangi nipakalompo, nipakala'biri' siagang nipuji-puji!”

PAPPICINI' 5:13

Nampa akkelong kulangngere' sikontu anu attallasa' niaka ri langi', ri lino, irawanganna linoa, siagang lalang ri tamparanga; bodona kana sikontu anu attallasa' niaka ri anne linoa akkelong ngasengi angkana, “Ia ammempoa irate ri empoang kala'biranga, siagang anjo Ana' Gimbalaka, Iami nipuji na nipakalompo, kammayatompa nipakala'biri' na makoasa, sa'genna satunggu-tungguna!”

PAPPICINI' 5:14

Appialimi anjo appaka anu attallasa', angkana, “Aming!” Nasu'ju'mo anynyomba anjo pamimping-pamimpinga.

PAPPICINI' 6:16

Akkio'mi ke'nanga mae ri buluka siagang batu-batua, angkana, “Tujumi naung ikambe! Cokkoi ikambe battu ri paccini'Na anjo ammempoa irate ri empoang kala'biranga, siagang battu ri pangngalarroiNa anjo Ana' Gimbalaka!

1 SAMUEL 2:10

Musu-musunNa Batara ancu'-ancuruki, mallaki ke'nanga; a'gunturuki battu ri langika. Batara angngadeli sikontu anne linoa, na Nasare koasa mala'biri' ri karaeng Nipilea.”