PAPPICINI' 19:18 - KITTA' MATANGKASA'

¹⁸ Maeko angkanrei assinna ngaseng karaenga, panglimaya, siagang assinna tau rewaya; maeko angkanrei assinna sikamma padongko' jaranga siagang jaranna ngaseng, kammayatompa assinna sikontu rupataua, tau lompo yareka tau ca'di, ata yareka tau bebasa'!”

PAPPICINI' 19:18 Iomraidhean Croise

YEREMIA 16:4

Lamatei ke'nanga lanri nitaba ri garring angngeranga kamateang, siagang lamatei ke'nanga lalang pa'bundukang yareka mate naallei cipuru'. Tena manna sitau langngarru' yareka antarawangi ke'nanga. Latassiaraki maya'na ke'nanga rapang pupu' panynyoppongi ri butta, siagang nikanre ri jangang-jangang siagang olo'-olo' sekke'.

YEREMIA 19:7

Ri anne tampaka laKupassalasai sikontu rancanana tu Yehuda siagang pandudu'na Yerusalem. LaKubalang parekangi ke'nanga nibeta ri musu-musunna siagang nibuno lalang ri pa'bundukanga. LaKubalang parekangi maya'na ke'nanga nikanre ri jangang-jangang siagang olo'-olo' sekke'.

YEREMIA 34:20

LaKupassareangko mae ri musu eroka ambunoko. Maya'nu lanikanrei ri jangang-jangang yareka olo'-olo' sekkeka.

YEREMIA 7:33

Sikamma maya'na ke'nanga la'jari kanre-kanreangi mae ri jangang-janganga siagang olo'-olo' sekkeka, nampa tena tau ambongkai.

YEHEZKIEL 29:5

Nampa ikau siagang sikontu anjo jukuka Kupasambilako mange ri parang kassika. Latattappasaki kalennu naung ri buttaya siagang ammonrang mako anjoreng. Tena manna sitau lantarawangko. Tubunu laKupassareangi mae ri jangang-janganga siagang olo'-olo' maraenga untu' nakanre.

YEHEZKIEL 39:17

Nakana Batara Kaminang Tinggia ri nakke, “He tau, kioki sikontu jangang-janganga siagang olo'-olo' maraengannaya, sollanna nia' battu ri kere-keremae untu' angkanrei koro'bang Kupasadiakangi ke'nanga. LapparekKa' passua'-suarrang lompo ri daera moncong-monconna Israel; anjorengi ke'nanga akkulle angnganre dageng siagang angnginung cera'.

MATIUS 24:28

Kemae nia' maya', anjoreng tommi nia' jangang-jangang pakanre mayaka.”

LUKAS 17:37

Akkuta'nammi ana'-ana' gurunNa Isa angkana, “Kemae lakajariang anjo kammaya, Batara?” Appialimi Isa Nakana, “Kemae-kemae nia' maya', anjoremmi lania' jangang-jangang pakanre maya'.”

PAOLE 28:26

Punna mateko, maya'nu la'jari kanrenai jangang-janganga siagang olo'-olo' sekkeka, siagang tena manna sitau ambongkai anjo olo'-oloka.

PAPPICINI' 11:18

A'jalloki tau tenaya natappa' ri Batara, lanri narapi'mi wattunTa ampappicinikangi kalarroanTa, siagang narapi' tommi wattunna Kiadeli tau matea. Iaminne wattunna laKisare passawallang sikontu atanTa, na'bi-na'biTa, kammayatompa sikontu ummatTa, iamintu sikontu tau anynyombaya mae ri Katte, baji' natau lompo, kammayatompa tau ca'di. Iaminne wattunna laKiancuru' tau angngancurukai buttaya!”

PAPPICINI' 13:16

Sikontu rupataua, lompo yareka ca'di, kasi-asi yareka kalumanynyang, tau ata yareka tau bebasa', nipassa ngasemmi ri anjo olo'-oloka untu' annarima pammatei ri lima kananna ke'nanga yareka ri tompo' kanynyinna ke'nanga.

PAPPICINI' 17:16

Anjo sampuloa tanru' siagang anjo olo'-olo' nucinika labirisiki mae ri anjo pasundalaka. Lanarampasaki ke'nanga sikamma apa-apa niaka ri ia, siagang lanapa'jari assolaraki. Lanakanrei ke'nanga assinna siagang lanaancuruki siagang pepe'.

PAPPICINI' 19:5

Nampa nia' kulangngere' sa'ra battu ri anjo empoang kala'biranga angkana, “Pujimi Allata'ala, ikau sikontu atanNa, siagang sikontu rupataua, tau lompo yareka ca'di, ia anynyombaya ri Allata'ala, pujimi Allata'ala!”

PAPPICINI' 6:15

Nampa karak-karaeng niaka ri lino, sikamma tumalompoa, sikamma panglimaya, sikamma tau kalumanynyanga, siagang sikamma tau anna'galaka koasa kammayatompa sikamma tau maraengannaya, baji' na ata yareka tau bebasa', mange ngasemmi ancokkoi kalenna ri kali'-kali'bong buluka yareka ri alla'-alla'na batua ri buluka.

1 SAMUEL 17:44

Nampa pole napa'ngara Daud nakana, “Maju mako, nampa kupassareang kalennu mae ri jangang-janganga siagang olo'-oloka sollanna nakanreko.”

1 SAMUEL 17:46

Anne memang alloa naNapassareangko Batara mae ri nakke. Lakubetako, siagang lakusamballei kallonnu nampa kualle ulunnu. Kalennu siagang kalenna ngaseng tantara Filistin lakupassareangi ri jangang-janganga siagang olo'-oloka sollanna nakanrei. Nampa sikontu linoa lanaassemmi angkanaya ikambe bansa Israel nia' Allata'alata nisomba.