PAPPICINI' 18:6 - KITTA' MATANGKASA'

⁶ Appanggaukang mako mae ri ia sangkamma batena appanggaukang mae ri kau ngaseng; balasaki a'lappi rua sikamma apa le'baka nagaukang Bonei mangko'na inungang a'lappi ruaya terasa'na nainungang napasadiaya untu' ikau ngaseng.

PAPPICINI' 18:6 Iomraidhean Croise

PAMMUJI 137:8

He Babel, ikau laniancurukko! Mate'nei tau ambalasakai ri kau kaja'dallang nugaukanga mae ri kambe.

PAMMUJI 28:4

Hukkung laloi ke'nanga lanri panggaukanna ke'nanga, lanri kaja'dallang nagaukanga ke'nanga. Hukkung laloi ke'nanga situru' panggaukanna ke'nanga; hukkungi ke'nanga simbattala' panggaukanna ke'nanga.

YESAYA 40:2

Pakasannangi atinna tu Yerusalem, pauangi angkanaya lakala'busammi nipare' ata. Kupammopporammi salana, le'ba'mi Kuhukkung a'lappi rua sikamma dosana ke'nanga.”

YESAYA 61:7

Lanri le'ba' mako nipakasiri' a'lappi tallu, siagang ra'masaka kammayatompa tunaya a'jari bageannu, na nunggappamo warisi' a'lappi rua ri pa'rasangannu, na nupatang karannuang mannannunganga.

YEREMIA 16:18

LaKubalasaki dosana siagang kaja'dallanna ke'nanga siagang hukkungang a'lappi rua, lanri narantassimi pa'rasangangKu siagang jai barhala. Anjo barhala-barhalaya tena na'nyawa, sangkammai maya'.”

YEREMIA 17:18

Poro Kipakasiriki siagang Kipa'jari mallaki sikamma tau angngondangia' siagang anjallakkangia'. Mingka teaKi' gaukangngi anjo kammaya mae ri nakke, o Batara. Kipabattui balaya mae ri ke'nanga sa'genna ancuru' taba sikali ke'nanga.

YEREMIA 50:15

Ammarrangko akkio' bundu' ri tammulilina anjo kotaya! Kamma-kamma anne manyarami Babel. Tembo'-tembo'na le'ba'mi nilappo siagang niruntung. Kamma-kamma anne Kugaukangi pa'balasaka mae ri Babel. Lanri kammana anjo gaukammi mae ri ke'nanga sangkamma nagaukanga ke'nanga mae ri tau maraenga.

YEREMIA 50:29

Nakana Batara, “Suroi sikamma tantara angngeranga pana ambunduki Babel. Pagio' ngasengi sikamma tau cara'deka ammake sanjata pana. Kurungi anjo kotaya siagang teako lappassangngi manna sitau ta'lappasa'. Balasaki sikontu panggaukanna siagang gaukammi ri ke'nanga sangkamma le'baka panggaukanna, lanri le'baki a'gau' kurangajara' mae ri Nakke, Kaminang Matangkasaka, iamintu Allata'alana Israel.

YEREMIA 51:24

Nakana Batara, “Kalennu anciniki kamma-kamma anne antekamma batena Kubalasa' mae ri Babel siagang pandudu'na sikontu kaja'dallanna ke'nanga, iamintu nagaukanga mae ri Yerusalem.

YEREMIA 51:49

Jaimi tau ri sikontu linoa mate nibuno lanri Babel, mingka kamma-kamma anne latu'guru'mi Babel lanri Israel mate nabunoa. INakke, Batara, anne akkana.”

PIRAUNG 3:64

Kihukkung laloi ke'nanga situru' panggaukanna o Batara.

ZAKHARIA 9:12

Ammotere' mako he sikamma tunipelaka, anne kamma nia'mo panrannuannu. Ammoterekko mange ri tampa' pa'la'langannu, iNakke tuli lambarakkaki ngasengko. Pilangngeri: LaKubarakkakiko a'lappi rua lanri sikontu kasessang le'baka nukasia'.

2 TIMOTIUS 4:14

Aleksander, anjo tukang tambagaya sanna' ja'dala'na panggaukanna mae ri nakke. Mingka lanibalasaki ri Batara situru' anjo panggaukanna.

PAPPICINI' 13:10

“Tau lanitarungkua, musti lanitarungkui. Siagang tau lanibunoa siagang pa'dang mattantu lanibunoi siagang pa'dang. Iaminjo saba'na namusti sa'bara' siagang tamamminraya Umma'Na Allata'ala.”

PAPPICINI' 14:10

anjo taua langnginungi anggoro'Na Allata'ala, iamintu anggoro' pangngalarroinNa le'bakamo nipanaung ri pangnginunganna; manna sike'de' tena nalanipakurang anjo anggoro' pangngalarroia! Yangasenna anjo taua lanisessai lalang ri pepeka siagang bara a'rinraya ri dallekanna malaeka'-malaeka' matangkasaka siagang ri dallekanNa anjo Ana' Gimbalaka.

PAPPICINI' 16:19

Assisa'la'mi anjo kotaya ta'bage tallu, siagang ancuru' tommi kota-kotaya ri sikontu pa'rasanganga ri linoa. Nampa Nau'rangimo Allata'ala anjo Babel lompoa. Jari Napainummi Allata'ala anjo Babel anggoro' battua ri pammoneang anggoro'Na Allata'ala – iamintu anggoro' pangngalarroi lompoNa.

PAPPICINI' 17:2

A'gau' bawang ngasemmi karaenna linoa siagang ia, siagang nasa'rimmi bonena linoa lanri nainunna ke'nanga anggoro' panggaukang bawanna.”

PAPPICINI' 17:4

Anjo bainea ammakei baju lango-lango siagang eja toaya tanja'na, kammayatompa nibelo-beloi siagang belo-belo bulaeng, paramata, siagang mutiara. Na ri limanna nia' nata'gala' se're mangko' bulaeng rassia bonena siagang apa ra'masaka siagang kodi dudua, wassele' panggaukang bawanna.

PAPPICINI' 18:20

He, surugaya, a'rannu-rannuko lanri posso'na anjo kotaya. He, Umma'Na Allata'ala, suro-suroa, siagang na'bi-na'bia ma'rannu-rannuko! Nasaba' nihukkummi ri Allata'ala anjo kotaya, a'jari pa'balasa' mae ri apa-apa le'baka nagaukang mae ri kau ngaseng!