PAPPICINI' 15:4 - KITTA' MATANGKASA'

⁴ Inai tamallakka ri Katte, Batara? Inai taeroka ampa'la'bangi kalompoanTa? IKatteji bawang matangkasaka. Sikontu bansaya labattui anynyomba ri Katte, nasaba' nacini' ngasemmi sikontu taua kaadelang le'baka Kigaukang.”

PAPPICINI' 15:4 Iomraidhean Croise

PAMMUJI 105:7

Batarami Allata'alata, kaputusanNa Napabattui ri sikontu linoa.

PAMMUJI 111:9

Napakabebasaki umma'Na, appareki parjanjiang mannannungang siagang ke'nanga. Iami Batara matangkasa' siagang sannaka poreNa!

PAMMUJI 22:23

Lakucaritai sikamma gautTa mae ri sikamma sari'battangku; lalang ri passirapakkanna ummatTa mammuji-mujia' ri Katte.

PAMMUJI 22:27

Tu kasi-asia langnganrei sa'genna bassoro'; tau battua mae ri Batara lamammuji ri Ia. Poro salewangang ngasengko sa'genna satunggu-tungguna!

PAMMUJI 22:3

O, Allata'alaku, akkioka' ri wattu allo, mingka tuli a'merekiKi'. Appala' doanga' ri wattu bangngi, mingka tena todong na sannang atingku.

PAMMUJI 86:9

Sikontu bansa Kipa'jaria labattu ngasengi, o, Batara, untu' anynyomba mae ri Katte siagang mammuji ri kalompoanTa.

PAMMUJI 89:7

Ri langi' tena sangkammanTa o, Batara, tena apa ri suruga ampasangkammaiKi'.

PAMMUJI 97:8

Sannangi pa'mai'na pandudu'na Sion siagang kota-kota Yehuda ri wattu nalangngere'na kaputusanNa Batara.

PAMMUJI 99:5

Pakala'biriki Batara Allata'alata, su'jukki' ri dallekang empoang kala'biranNa, Iami matangkasa'!

PAMMUJI 99:9

Pakala'biriki Karaeng Allata'alata, sombai ri bulu' matangkasa'Na, saba' matangkasaki Karaeng Allata'alata.

YESAYA 24:15

na tau niaka ri bageang iraya lamammuji mae ri Ia. Pandudu' niaka ri biring tamparanga lanapakala'biriki Batara, Allata'alana Israel.

YESAYA 25:3

LanipujiKi' ri bansa-bansa makassaka, siagang lanikamallakkangKi' ri kota-kotana sikamma bansa pallaka.

YESAYA 26:9

Punna bangngi, nakkuki nyawaku mae ri Katte, punna bari'basa' mattayangi atingku. Punna sallang Kiadeli buttaya, lanaassemmi pandudu'na linoa apa annabaya.

YESAYA 45:23

INakke le'ba' a'janji, na janjingKu tena nalasala-salang; lanri KalengKu na Kuassumpa: Tunggala' taua lakkulantuki ri dallekangKu, lalang massing bahasana a'janji massing talamamminraya mae ri Nakke.

YESAYA 57:15

Saba' kammaminne kananNa Allata'ala Kaminang Tinggia na matangkasa', makoasaya sa'genna satunggu-tungguna, “AmmantangA' ri tampa' tinggia siagang tangkasaka, mingka ammantang tongA' ri alla'na tau tuna pa'maika siagang tau assesse' lalanga lanri dosa-dosana, untu' ampamollei sumanga'na siagang panrannuanna ke'nanga.

YESAYA 6:3

Akkioki ke'nanga battu ri se'rea mae ri maraengannaya angkana: “Matangkasa', matangkasa', matangkasa'. Matangkasaki Batara Kaminang Koasaya. Rassi linoa ri kahaderang mala'biri'Na.”

YESAYA 60:5

Lannasa' mako nucini'na anjo siagang accayami rupannu; dinging-dingingi siagang lompoi pa'mai'nu. Nierangi barang-baranna sikamma bansaya mae ri kau, nitambungiko ri kakalumanynyangang battu ba'leang tamparanga.

YEREMIA 10:7

Inai kutadeng taeroka mappilangngeri mae ri Katte, Karaenna sikontu bansaya? Tojeng, siratang sikaliKi' nipakalompo. Battu ri sikontu cara'deka ri alla'na bansa-bansaya siagang battu ri sikontu karaenna ke'nanga, tena manna sitau akkulle nipasangkamma iKatte, o Batara.

YEREMIA 16:19

O Batara, iKattemi alla'langngia' siagang assarea' kagassingang; iKatte antulunga' ri wattungku kasukkarang. Labattui bansa-bansaya battu ri cappa'na linoa mae ri Katte na nakana, “Boe-boena ikambe poro rewata takontutojengaji bawang napatappa', tena sikalia matu-matunna.

YEREMIA 5:22

INakke Batara; angngapa natena numalla' ri Nakke? Mustina annekkerekko mae ri Nakke! INakke ampa'jari biring tamparanga a'jari pa'baeng-baeng tamparang tenaya nakkulle nilaloi sa'genna satunggu-tungguna. Tamparanga akkullei lompo bombanna siagang a'jallo' bombanna, mingka takkulleai nalalo anjo pa'baeng-baenga.

HOSEA 3:5

Mingka lanarapiki sallang wattunna nalammotere' bansa Israel mae ri Karaeng Allata'alana ke'nanga, siagang mae ri karaenna ke'nanga battua ri jari-jarina Daud. Nampa lamalla' siagang lanapakalompo ke'nanga Batara, kammayatompa nanatarimamo barakka'-barakka'Na.

HABAKUK 1:12

O Batara, battu rioloji naiKatte Allata'ala. IKatte Allata'alaku matangkasaka siagang mannannunganga. O Batara, Allata'alaku siagang pa'la'langangku, anjo bansa Babel Kipilei siagang Kipa'jari kassaki untu' anghukkungi ikambe.

ZAKHARIA 14:16

Nampa sikontu tau niaka ija attallasa' ri alla'na anjo bansa-bansa ambundukai Yerusalem, la'lampai mange ri anjo kotaya untu' anynyomba ri Karaeng, Batara Kaminang Koasaya, siagang untu' ampakalompoi Passua'-suarrang Pa'ballakang Leko'-Lekoka.

ZAKHARIA 2:11

Anjo wattua jai bansa labattu mae ri Batara untu' a'jari umma'Na. Ia lammantang ri tangnga-tangnganu, siagang lanuassengi angkanaya Batara assuroa' battu mae ri kau ngaseng.

MALEAKHI 1:11

NipakalompoA' ri sikamma bansa-bansaya ri sikontu linoa. Kere-keremae nitunui dupaya untu' ampakalompoi arengKu siagang nipassareangi sikamma koro'bang siratanga, ba'lalo sikontu bansaya napakalompoA'.

ROMA 15:9

Napa'jari tommi Isa bansa-bansa maraenga appakala'biri' mae ri Allata'ala, lanri baji' pa'mai'Na Allata'ala mae ri ke'nanga. Nia' tattulisi' lalang ri Kittaka, angkanaya, “Lanri kammanami anjo nakulamammuji-muji mae ri Katte ri tangnga-tangngana bansa-bansaya, lamakkelonga' mammuji-muji mae ri arenTa.”

1 PETRUS 1:16

Nia' tattulisi' lalang ri Kittaka angkanaya, “Paralluko matangkasa', nasaba' iNakke tangkasaka'.”

PAPPICINI' 11:15

Nampa napasa'ra tarompe'na malaeka' makatujua; na nia'mo nilangngere' ri suruga sa'ra-sa'ra sannaka lompona, angkanaya, “Kamma-kamma anne nia'mi lalang limanNa Batarata siagang Karaeng Mappasalama' Napa'janjianga kakoasanga untu' ammarenta ri anne linoa, iamintu Karaeng Mappasalama' Napa'janjianga. Lammarentai sa'genna satunggu-tungguna!”

PAPPICINI' 14:7

Akkio' lompomi anjo malaekaka nakana, “Malla' mako ri Allata'ala, siagang pujimi kalompoanNa! Nasaba' narapi'mi wattunna laNaadeli Allata'ala rupataua. Sombami Ia ampa'jariai langika, buttaya, tamparanga siagang sikontu timbusenna je'neka!”

PAPPICINI' 16:5

Kulangngere'mi anjo malaeka' makoasaya ri je'neka angkana, “Adeleki hukkungang Kipassareanga, o Kaminang Matangkasaka, Allata'ala niaka, siagang niakamo!

PAPPICINI' 16:7

Nampa nia' kulangngere' sa'ra battu ri tampa' pakkoro'bangnganga angkana, “Batara, Allata'ala Kaminang Koasaya, annabai siagang adeleki sikamma hukkungang le'baka Kitappuki!”

PAPPICINI' 19:2

Adeleki siagang annabai pangngadelanNa! Napabattumi hukkunganNa mae ri pasundala' lompoa, ampanrakiai linoa siagang gau' bawanna. Le'ba'mi Nahukkung Allata'ala anjo pasundalaka, lanri nabunona sikamma ata-atanNa Allata'ala.”

PAPPICINI' 19:8

Nipassareammi mae ri Ia kaeng lenang accillaka untu' Napake.” (Anjo pakeang lenanga iamintu panggaukang-panggaukang baji' nagaukang Umma'Na Allata'ala.)

PAPPICINI' 3:7

“Untu' mae ri malaeka'na jamaah ri Filadelfia, tulisiki kamma anne: Iaminne pappasang battu ri Ia matangkasaka siagang kontutojenga. Iami anta'galaki konci battua ri Daud; punna Nasungkei pakke'buka, tena manna sitau akkulle antongkoki, siagang punna Natongkoki, tena manna sitau akkulle ansungkei.

PAPPICINI' 4:8

Anjo appaka anu attallasa', massing nia' annang ka'nyi'na; siagang rassi ngasengi mata ri tammulilina kalenna siagang ilalanganna kalenna. Allo bangngi anjo anu attallasaka tena nale'ba' ammari akkelonga tojeng, angkana, “Matangkasa', matangkasa', matangkasaki Batara, Allata'ala Kaminang Koasaya; Ia niaka ri pakaramulanna, ri kamma-kammaya anne, sa'genna satunggu-tungguna.”

PAPPICINI' 6:10

Akkio' lompomi ke'nanga angkana, “O Batara Kaminang Koasaya, Ia matangkasaka na tojeng! Siapapi sallona nampa Kiadeli tuma'buttaya ri lino siagang Kihukkung ke'nanga lanri nabunona ikambe?”

1 SAMUEL 2:2

Tena matangkasa' sangkamma Batara! Iaji bawang akkulle a'jari pa'la'lang.