PAPPICINI' 15:3 - KITTA' MATANGKASA'

³ Na nakelongammo ke'nanga kelong-kelonna Musa, atanNaya Allata'ala; kammayatompa kelong-kelonNa Ana' Gimbalaka. Kammaminne anjo kelong-kelonga, “Batara, Allata'ala Kaminang Koasaya, teai sipato' lompona siagang appakalannasa'na sikamma panggaukanTa! Karaenna sikontu bansaya, teai sipato' adele'na siagang annabana sikamma gautTa!

PAPPICINI' 15:3 Iomraidhean Croise

PA'JARIANG 17:1

Ri wattunna salapampulo assalapang taung umuru'na Abram, Napappicinikammi KalenNa Batara mae ri ia na Nakana, “INakkemi Allata'ala Kaminang Koasaya. Turuki laloA' siagang tuli gaukangi erokKu.

1 PATTOTTORANG 6:49

Ia Harun siagang turunganna nisarei tugasa' attunu dupa, assare koro'bang nitunua irate ri tampa' pakkoro'bangnganga, anggaukangi sikamma pa'gaukanga lalang ri Kamara' Kaminang Matangkasaka, siagang ampassareangi koro'bang untu' antangkasiai dosana umma' Israel. Nagaukang ngasengi ke'nanga anjo sikammaya situru' apa napangngajaranga Musa, atanNa Allata'ala.

2 PATTOTTORANG 24:6

Lanri kammana anjo nakio'mi Imang Yoyada pamimpinna ke'nanga, nampa akkuta'nang Yoas angkana, “Sai anjo Musa atanNa Batara le'ba' nasuroi ra'yaka a'bayara' sima untu' angngongkosi KemaNa Batara? Kamma-kamma anne apa saba'na natena kipakkaro-karoi tu Lewia untu' ampasse'rei sima battua ri ra'ya' Yehuda siagang Yerusalem?” (

NEHEMIA 9:14

Allo Pammari-mariang matangkasaka musti napakalompoi ke'nanga, na tete ri Musa Kipassareang hukkunTa.

AYUB 36:24

Ia tuli nipuji lanri bate pare'Na, na ikau pole siratang tongi nupakalompo.

AYUB 5:9

Yangaseng bate pare'Na Allata'ala tamaka heba'na; takkulleai nipahang. Gau'-gau' appakalannasa' Napareka, takkulleai nibilang na tena la'busu'na.

PAMMUJI 100:5

Saba' bajiki Batara; sa'genna satunggu-tungguna pangngamaseanNa, nyawa tamamminraNa sa'genna sikontu turungang.

PAMMUJI 105:5

He, turunganna Abraham, atanNa, siagang turunganna Yakub tunipileNa, u'rangi sikontu gau' appakalannasa' sikontu le'baka Nagaukang, teako kaluppai sikamma kaputusanNa.

PAMMUJI 111:2

Tamaka appakalannasa'na sikamma panggaukanNa Batara, siratangi nipilajari ri tau mangngaia ri Ia.

PAMMUJI 111:7

Adeleki siagang tamamminrayai Batara lalang sikontu tindakanNa, sikontu parentaNa akkullei nipattoang.

PAMMUJI 139:14

Mammujia' ri Katte saba' inakke teai sipato' hebakku! Sikontu gautTa appakalannasaki siagang tamaka lompona, sanna' kupahang tojenna anjo sikammaya.

PAMMUJI 145:17

Adeleki Batara lalang sikontu tindakanNa siagang rassi pangngamaseang lalang sikontu panggaukanNa.

PAMMUJI 145:6

Nakabarrangi ke'nanga sikamma panggaukang hebatTa, lakupappiassengangi kalompoanTa.

PAMMUJI 18:30

Kipakagassinga' untu' antumpasaki musua; lanri pannulunNa Allata'alaku nakutarrusu' pannahanna ke'nanga.

PAMMUJI 78:12

Ri dallekanna boe-boena ke'nanga, a'gau' appakalannasaki Allata'ala ri pa'rasangang Mesir, ri lappara' Zoan.

PAMMUJI 92:5

Saba' panggaukanTa napakarannui pa'maikku, makkelong rannua' lanri bate paretTa.

PAMMUJI 99:4

Ri Kattemi kakoasanga, o, Karaeng mangngaia ri hukkung; iKatte ampaentengi katojenganga; iKatte ampajappai hukkunga siagang kaadelanga ri Israel.

YESAYA 33:22

Sikontu pakkakasa' niaka ri kappala'na ke'nanga tena ngaseng matu-matunna; sikamma sombala'na takkulleai nipaka'rang! Sikontu kakalumanynyanganna pasukang musua lanirampasaki, teai sipato' jaina, sa'genna manna tau pesoka anggappa ngaseng bageang. KalenNa Batara la'jari karaenta; Ia lammarenta, ampaentengi hukkunga siagang ampasalamakki' battu ri musua.

YESAYA 45:21

Pamajumi parkaranu, paridallekammi butti-buttina, iyo, boli'mi kamma appare' ke'nanga passitujuang. Inaika angkabarrangi anjo passalaka siagang le'ba' ampaui baku' battu riolo iji? Sai iNakke, Bataraya? Tena allata'ala pantaranganna iNakke. INakkemi Allata'ala adeleka siagang Mappasalamaka, tena maraeng pantaranganna iNakke!

DANIEL 6:20

Ri wattu subua ambangummi nai' karaenga nampa karo-karo a'lampa mange ri leang singaya.

DANIEL 9:11

Sikontu tu Israel nadakkaimi hukkung-hukkunTa siagang taerokami ampilangngeri kananTa. Dorakami ikambe mae ri Katte. Lanri kammanami anjo naKipabattu mae ri kambe pangngalarroinTa, ia niaka tattulisi' lalang ri kitta'na Musa, atanTa.

HOSEA 14:9

Lanapelaki tu Israel patung-patung barhalana; laKuparakai ke'nanga naKupilangngeri pappala' doanna. Rapang poko' kayu tuli jaina leko'na, iNakke lalla'langngi ke'nanga. INakkemi kabattuanna sikontu barakkaka mae ri ke'nanga. INakke, Batara, anne akkana.”

MIKHA 7:20

Mae ri ummatTa, iamintu jari-jarina Abraham siagang Yakub, laKipappicinikangi majarretTa siagang pangngainTa tenaya sanggana sangkamma Kipa'janjianga mae ri boe-boena ikambe battu riolo dudu.

ZEFANYA 3:5

Mingka nia' iji Batara ri anjo kotaya; tuli Nagaukangi apa annabaya siagang tale'bakai sala. Tunggala' bari'basa' mattantu Nasarei kaadelang umma'Na. Mingka, tau tenaya naassengi kaadelanga ri anjo kotaya, tuli tenana siri'na a'gau' ja'dala'.

ZAKHARIA 9:9

He pandudu'na Sion, rannu mako! He pandudu'na Yerusalem, makkio' rannuko! Ciniki! Battui Karaennu angngerang pammetang! Ia Karaeng adele' angngeranga kasalamakkang. Mingka tuna pa'maiki lalang kabattuanna A'dongko' keledai, sikayu keledai rungka.

YOHANES 1:17

Nitarimai HukkunNa Batara, tete ri Musa. Mingka pangngamaseang siagang pangngatutuiNa Allata'ala nipa'nyatami lalang ri Isa Almasi.

PAOLE 31:30

Nampa napabattumo Musa anne kelong-kelonga sa'genna puppusu', nampa mappilangngeri sikontu bansa Israel.

PAOLE 32:3

Kumammuji ri arenNa Batara. Kabarrangi kalompoanNa Allata'alata!

PAOLE 34:5

Nampa matemo Musa, anjo atanNa Batara, ri butta Moab, sangkamma le'baka Napau riolo Batara.

1 TIMOTIUS 1:17

Siratangi nipakalompo siagang tuli nipuji Allata'ala, Karaenna sikontu jammanga, lanri Iami mannannungang, tenaya nakacinikang siagang tenaya ruanna! Aming.

IBRANI 3:5

Tamalanreai Musa a'jari palayang lalang ri Balla'Na Allata'ala siagang ampabattui apa-apa laNapa'nyataya Allata'ala sallang ri allo labattua.

YOSUA 22:5

Siagang tutuko sollanna nukatutui hukkung naparentakanga Musa mae ri kau, iamintu: Mangngamaseangko mae ri Karaeng Allata'alanu, pinawangi ero'Na, turuki parenta-parentaNa, majarre' pa'maikko mae ri Ia, siagang pare' atai kalennu mae ri Ia lalang sikontu atinnu siagang sikontu nyawanu.”

PAPPICINI' 1:8

“INakkemi uru-urua, siagang iNakkemi kala'busanga,” kammami anjo kananNa Karaeng Allata'ala, Ia niaka battu ri pakaramulanna, ri kamma-kammaya anne, sa'genna satunggu-tungguna, Ia Kaminang Makoasaya.

PAPPICINI' 11:17

Nakana ke'nanga, “Batara, Allata'ala Kaminang Koasaya, Ia niaka, siagang niakamo! Appala' sukkuruki ikambe mae ri Katte lanri Kipakemi kakoasang lompoTa, siagang appakkaramula maKi ammarenta!

PAPPICINI' 14:3

Na ri dallekanna anjo empoang kalompoanga, siagang appaka olo'-olo', kammayatompa sikamma anjo pamimping akkulilinga ri anjo empoang kala'biranga, akkelong ngasemmi anjo tau 144.000 jaina. Kelongang beru anjo nakelonganga ke'nanga. Manna inai takkulleai napappilajari anjo kelonga, pantaranganna anjo tau 144.000 jaina. Yangasemmi anjo ke'nanga tau le'baka nilappassang battu ri linoa.

PAPPICINI' 14:8

Battumi pole malaeka' ribokoanganna anjo malaeka' uru-urua; akkio'mi anjo malaeka' makaruaya angkana, “Tu'guru'mi! Tu'guru'mi kota Babel lompoa! Napa'jari nasa'ring ngasemmi je'ne' anggoro' sikontu bansaya ri lino, iamintu anggoro' battu ri napasu gau' bawanna!”

PAPPICINI' 17:14

La'bunduki ke'nanga angngewai anjo Ana' Gimbalaka. Mingka lanibetai anjo sikamma karaenga ri anjo Ana' Gimbalaka siagang sikamma taunNa tamamminraya le'baka Nakio' siagang Napile; nasaba' Ia minjo Ana' Gimbalaka Batarana sikamma tumalompoa, siagang Karaenna sikamma karaenga.”

PAPPICINI' 19:16

Ri jubaNa siagang ri bongganNa nia' tattulisi' areng kammaya anne, “Karaenna sikamma karaenga, siagang Batarana sikamma tumalompoa.”

PAPPICINI' 19:2

Adeleki siagang annabai pangngadelanNa! Napabattumi hukkunganNa mae ri pasundala' lompoa, ampanrakiai linoa siagang gau' bawanna. Le'ba'mi Nahukkung Allata'ala anjo pasundalaka, lanri nabunona sikamma ata-atanNa Allata'ala.”

PAPPICINI' 4:8

Anjo appaka anu attallasa', massing nia' annang ka'nyi'na; siagang rassi ngasengi mata ri tammulilina kalenna siagang ilalanganna kalenna. Allo bangngi anjo anu attallasaka tena nale'ba' ammari akkelonga tojeng, angkana, “Matangkasa', matangkasa', matangkasaki Batara, Allata'ala Kaminang Koasaya; Ia niaka ri pakaramulanna, ri kamma-kammaya anne, sa'genna satunggu-tungguna.”