PAPPICINI' 13:7 - KITTA' MATANGKASA'

⁷ Nipa'biang tommi angngewai siagang ambetai Umma'Na Allata'ala. Kammayatompa nipassareammi ri ia kakoasanga mae ri sikontu sukua, pa'rasanganga, bahasaya, siagang bansa-bansaya.

PAPPICINI' 13:7 Iomraidhean Croise

KALAPPASSANG 9:16

Mingka Kulappassang ngasengko attallasa', sollanna akkulle Kupappicinikang kakoasangKu mae ri kau, sa'genna a'jari masahoro' arengKu ri sikontu linoa.

YESAYA 10:15

Mingka Nakana Batara, “Maka akkullei napattampoang kalenna pangkuluka mae ri tau ampakei ammangkulu'? Maka la'bi paralluangangi garagajia na tau ampagaragajiai? Teai palu-palua angngangkaki taua, passangalinna tauaji angngangkaki palu-palua.”

YESAYA 37:26

Tale'bakapi nulangngere' angkanaya yangasenna anjo apa le'baka kajariang apa le'ba' memammo Kurancana battu riolo? Nampa kamma-kamma anne iNakke anggaukangi. INakke assareko koasa untu' angngancuruki kota-kota niaka pattahanganna a'jari rumbangang.

YEREMIA 25:9

‘LaKukioki sikontu bansaya battu wara', kammayatompa atangKu Nebukadnezar karaeng Babel. LaKupaturungi ke'nanga untu' a'bundu' angngewai Yehuda siagang pandudu'na kammayatompa sikontu bansa niaka ri tammulilina. Lanipanraki bansa Yehuda siagang bansa-bansa naaganga singngampi', nampa Kubalang parekang ancuru' sa'genna satunggu-tungguna. Sikamma tau ancinikai lata'bangkai siagang a'jari mallaki. INakke, Batara, anne akkana.

DANIEL 12:1

Nakanamo pole anjo malaeka' ammakea pakeang lenang, “Ri anjo wattua lammumbai malaeka' lompoa iamintu Mikhael pajagana bansanu. Nampa lania' wattu kasukkarang tenaya sanrapanna baku' nia'na bansa-bansaya. Mingka sikontu tau battua ri bansanu, ia niaka tattulisi' arenna lalang ri kitta'Na Allata'ala, lanipasalamaki.

DANIEL 7:21

Ri wattunna kuparhatikang, a'bunduki anjo tanruka siagang umma'Na Allata'ala siagang nabetai ke'nanga.

DANIEL 7:25

Bicaranna langngewai ri Allata'ala Kaminang Tinggia siagang lanajallakkangi umma'Na Allata'ala. Eroki napinra sikamma hukkung-hukkung siagang allo lompona agamana umma'Na Allata'ala, siagang lanikoasai ke'nanga lalang tallu assitangnga taung.

LUKAS 4:6

Nakanamo Billisika ri Isa, “Sikontu anjo kakoasang siagang kakalumanynyangang Nucinika lakupassareangi mae ri Kau. Nasaba' yangasenna anjo le'ba'mi nipassareang mae ri nakke. Jari akkullei kupassareang mae ri tau kungaia kusareang.

YOHANES 19:11

Appialimi Isa Nakana, “Punna taNasareako' Allata'ala anjo koasanu, tena sikali koasanu mae ri Nakke. Lanri kammana, lompoangangi dosana tau ampassareangai KalengKu mae ri kau, kala ikau.”

PAPPICINI' 10:11

Nampa nisuroma' angkana, “Pa'la'bangi sikalipa pole biritta battua ri Allata'ala ri passala'na bansa-bansaya, sikamma pa'rasanganga, bahasa-bahasaya, kammayatompa sikamma karak-karaenga.”

PAPPICINI' 11:18

A'jalloki tau tenaya natappa' ri Batara, lanri narapi'mi wattunTa ampappicinikangi kalarroanTa, siagang narapi' tommi wattunna Kiadeli tau matea. Iaminne wattunna laKisare passawallang sikontu atanTa, na'bi-na'biTa, kammayatompa sikontu ummatTa, iamintu sikontu tau anynyombaya mae ri Katte, baji' natau lompo, kammayatompa tau ca'di. Iaminne wattunna laKiancuru' tau angngancurukai buttaya!”

PAPPICINI' 11:7

Le'baki napabattu birittana ke'nanga, laniewami ke'nanga ri anjo olo'-olo' assuluka battu ri tubiri'na kamateanga. Lanibetai siagang lanibunoi ke'nanga.

PAPPICINI' 12:17

A'jari sanna'mi larrona anjo nagaya mae ri anjo bainea, sa'genna a'lampa mange ambunduki sossoranna maraenga anjo bainea, iamintu sikontu tau mannurukia ri parentaNa Allata'ala, siagang a'jari sa'bia ri passala'na Isa siagang kakoasanNa.

PAPPICINI' 17:15

Nakana pole anjo malaekaka, “Anjo je'ne' nucinika, napammempoia anjo pasundalaka, iaminjo bansa-bansaya, ra'ya'-ra'yaka, pa'rasangang-pa'rasanganga siagang bahasa-bahasaya.

PAPPICINI' 5:9

Akkelommi ke'nanga se're kelongang beru nakana: “IKattemi siratang angngallei anjo kittaka, siagang anreppeki sege'-segele'na. Nasaba' Ikattemi le'ba' nibuno, na lanri kamateanTa, na le'ba'mo Kiballi sikontu rupataua battu ri a'rupa-rupa suku, bahasa, pa'rasangang, siagang bansa, untu' Kierang ri Allata'ala.