PAPPICINI' 1:1 - KITTA' MATANGKASA'

¹ Ia bonena anne Kittaka, iamintu apa-apa le'baka Napappicinikang Isa Almasi ri passala'na sikontu apa-apa lakajarianga sallang. Napappiassengangi Allata'ala mae ri Almasi sollanna Napabattu Almasi mae ri sikontu atanNa Allata'ala apa-apa tenayamo nasallo namusti kajariang. Nasuromi Almasi a'lampa malaeka'Na mae ri atanNa, iamintu Yohanes, untu' ampappiassengangi mae ri ia anjo apa-apa lakajarianga.

PAPPICINI' 1:1 Iomraidhean Croise

PAMMUJI 25:14

Batara belana tu mappilangngeria, Napappiassengangi ri ke'nanga apa Nakaerokia.

DANIEL 8:16

Nia' kulangngere' sa'ra akkio' battu ri ba'leanna Binanga Ulai, angkana, “Gabriel, pakasingaraki ri ia battuanna anjo apa nacinika.”

DANIEL 9:21

Lalang appala' doangku, anjo Gabriel, le'baka kucini' lalang paccinikku riolo, nia'mi anri'ba' a'lampa mae ri nakke. Anjo wattua narapi'mi wattunna taua assare koro'bang karueng.

DANIEL 9:23

Ri wattunnu appakkaramula appala' mae ri Allata'ala, appialimi. Battua' anne ampabattuangko lanri Nakamaseangko Allata'ala. Jari pilangngerimi baji'-baji' nakupakasingara' battuanna anjo apa nucinika.

AMOS 3:7

Tena le'bakai Batara Kaminang Tinggia anggaukang apa-apa punna tena Napa'nyatai rancanaNa mae ri sikamma na'bia, ata-atanNa.

YOHANES 12:49

Nasaba' teai battu ri ero' KalengKu naKupabattu anjo bicaraya; Manggea assuroA', Iami ampassuroangi ri Nakke apa musti Kupau siagang Kupabattu.

YOHANES 15:15

Tenamo naKukio' atako nasaba' se'rea ata tanaassengai apa nagaukanga karaenna. Kukio' sari'battang mako, nasaba' sikontu apa Kulangngereka battu ri Manggea Kupabattui mae ri kau.

YOHANES 17:8

Le'ba'mi Kupabattu ri ke'nanga kana-kana Kipabattua mae ri Nakke, nanatarimamo ke'nanga. Naassemmi ke'nanga, angkanaya iNakke ma'nassa iKatte Kukabattui, siagang tappa'mi ke'nanga angkanaya iKatte assuroA' battu ri linoa.

YOHANES 3:32

Ia nabicara apa-apa le'baka Nacini' siagang Nalangngere', mingka tenanniakka manna sitau ampatappaki kasa'bianNa.

YOHANES 8:26

Jai iji passala' laKupau ri kau ngaseng siagang laKuadeliangko. Mingka Ia assuroA ri Nakke akkullei nipatappa'. Na Kupabattumi ri lino apa le'baka Kulangngere' battu ri Ia.”

ROMA 16:25

Nipujimi Allata'ala! Makoasai anjarreki tappa'nu, situru' Kabara' Baji' battua ri Allata'ala, iamintu ri passala'na Isa Almasi, le'baka kubirittakang. Kubirittakangi anjo passalaka situru' apa Napa'nyataya Allata'ala; iamintu ri sesena rancanaNa Allata'ala, a'bilangngang taungamo tanaassenga taua.

GALATIA 1:12

Tena nabattu ri rupataua kutarima anjo kabaraka. Siagang tena manna sitau ampangngajarrangi mae ri nakke. KalenNa Isa Almasi ansungkei bonena anjo Kabara' Bajika mae ri nakke.

EFESUS 3:3

Nasungkemi Allata'ala mae ri nakke rahasia eroka Nagaukang na Napauanga'. (Bodona anne passalaka le'ba'mi kutulisi' irate;

TITUS 1:1

Natarimai anakku Titus! Anne suraka battu ri nakke Paulus, atanNa Allata'ala siagang tunisuroNa Isa Almasi. Nipilea' siagang nisuroa' untu' antulungi sikamma tau Napilea Allata'ala sollanna a'jari jarre' tappa'na ke'nanga. Musti kubantu tongi ke'nanga sollanna naasseng katojengang napangngajarranga agamata,

PAPPICINI' 1:19

Lanri kammana, tulisi' ngasengi sikamma apa-apa nucinika, iamintu apa-apa niaka ri kamma-kammaya anne, siagang apa-apa lakajarianga sallang.

PAPPICINI' 1:9

Inakke Yohanes, sari'battannu ngaseng, nuaganga' a'julu sessa sangkamma nakasiaka sikontu tau amminawanga ri Almasi. Sa'barakki' angkasiaki kasessanga, lanri ikatte anne umma'Naki'. Nipelakka' mange ri Pulo Patmos passabakkang kupa'la'bangi pappasang battua ri Allata'ala, Napakajarreka Isa lalang ri kasa'bianNa.

PAPPICINI' 17:1

Le'baki anjo battumi mae ri nakke kalase'renna anjo tujua malaeka' anna'galaka pammoneang na nakana, “Maeko, lakupicinikiangko antekamma batena lanihukkung anjo pasundala' lompoa, iamintu anjo kota lompoa, nibangunga ri ampi'na binanga-binangaya.

PAPPICINI' 19:10

Nampa su'ju'ma' ri dallekanna anjo malaekaka, ero' anynyomba ri ia; mingka nakanamo ri nakke, “Teako! Teako anynyombai ri nakke, mingka Allata'ala nusomba! Nasaba' inakke ata tonja' sangkamma ikau siagang sikontu sari'battannu anna'gala' jarreka mae ri biritta tojenga, Napabattua Isa!” Nasaba' iaminjo kasa'bianga mae ri Isa assarei taua pangngissengang untu' ampabattui biritta battua ri Allata'ala.

PAPPICINI' 19:9

Nampa nakana anjo malaekaka mae ri nakke, “Tulisiki anne: ‘Maupaki sikamma tau le'baka nibuntuli mae ri passua'-suarranna pa'buntinganNa anjo Ana' Gimbalaka.’ ” Nampa nasambung pole anjo malaekaka angkana, “Iaminne biritta tojenga, battua ri Allata'ala.”

PAPPICINI' 21:2

Kucini'mi anjo kota matangkasaka, iamintu kota Yerusalem berua, turunga battu ri Allata'ala ri suruga. Le'ba'mi nipasadia anjo kotaya sanrapang bunting baine nimodeia untu' bunting bura'nena.

PAPPICINI' 21:9

Kalase'renna anjo tujua malaeka' anta'galakai pammoneanna anjo tujua bala kala'busang, battui mae ri nakke na nakana, “Maeko! Lakupicinikiangko Buntinga, iamintu bainenNa anjo Ana' Gimbalaka.”

PAPPICINI' 22:1

Napicinikiang tomma' anjo malaekaka binanga assarea katallassang je'ne'na. Anjo binangaya accillaki je'ne'na sanrapang kaca a'lo'loroka battu ri empoang kala'biranNa Allata'ala siagang battu ri anjo Ana' Gimbalaka,

PAPPICINI' 22:16

“INakke Isa, Kusuromi malaekakKu mae ri kau ngaseng sollanna napau ngaseng anne passalaka untu' kasalamakkanna sikontu jama'aka. INakkemi sossoranna Daud; iNakkemi anjo bintoeng singaraka, niaka battu raya.”

PAPPICINI' 22:6

Nampa nakana anjo malaekaka mae ri nakke, “Sikamma anne bicaraya sangnging bicara kontutojeng siagang akkullei nipatappa'. Karaeng Allata'ala iamintu le'baka ampassareangi RohNa mae ri na'bi-na'bia, iami assuroi malaeka'Na untu' ampappiassengangi mae ri ata-atanNa apa-apa tenayamo nasallo namusti kajariang.”

PAPPICINI' 22:8

Inakke, Yohanes, le'ba' ngasemmi kulangngere' siagang kucini' ngaseng sikammaya anjo. Le'ba'na kulangngere' siagang kucini', su'ju'ma' ri dallekanna anjo malaeka' ampicinikianga' sikammaya anjo, siagang ero'ma' anynyomba mae ri ia;

PAPPICINI' 22:9

mingka nakanamo mae ri nakke, “Teako! Teako anynyombai ri nakke! Allata'alamo nusomba! Nasaba' inakke ata tonja' sangkamma ikau, sangkamma sikontu sari'battannu na'bi-na'bia, kammayatompa sikontu tau amparhatikangai sikamma pappakaingaka lalang ri anne kittaka!”

PAPPICINI' 4:1

Le'baki anjo anggappama' pole paccini'. Accinikka' se're pakke'bu' tassungke ri suruga. Nampa kulangngere'mo pole anjo sa'ra le'baka kulangngere' a'bicara mae ri nakke, sangkammaya tarompe' sa'ranna. Nakana anjo sa'raya, “Naikko mae anrinni. Erokko Kupicinikiang apa lakajarianga sallang.”

PAPPICINI' 5:7

Nampa maju anjo Ana' Gimbalaka angngallei anjo gulungang kittaka battu ri lima kananNa anjo ammempoa irate ri empoang kala'biranga.