PAOLE 13:3 - KITTA' MATANGKASA'

³ tea' laloko erokki amparhatikangi. Napakei Karaeng Allata'alanu anjo taua untu' anso'riko, lanri ero'Na Nacini' angkanaya apaka ma'nassa mangngamaseang tojengko mae ri Batara yareka tena.

PAOLE 13:3 Iomraidhean Croise

1 KARAENG-KARAENG 13:19

Jari amminawammi anjo na'bi battua ri Yehuda mae ri balla'na anjo na'bi toaya nampa angnganre siagang ia.

PAMMUJI 119:2

Mate'nei tau anturukiai parentaNa, siagang sibatu pa'mai'na usaha angngassengi Batara.

PAMMUJI 66:10

O, Allata'ala, le'ba'mi Kiso'ri ikambe sanrapang tau eroka ampakati'noki peraka lalang ri pepeka.

PAMMUJI 81:7

“Le'ba'mi Kualle erangnganga ri salanggannu, naKulappassang karanjeng pisangngang niaka ri limannu.

KALAPPASSANG 20:20

Appialimi Musa angkana, “Teako mallakki. Nabattu Allata'ala kaero'nuji Naso'ri sollanna nutuli mannuruki mae ri Ia, siagang tena nudoraka.”

YESAYA 8:20

Appiali mako kamma anne, “Pilangngeri ajaranNa Batara! Tau tenaya na'bicara situru' anjo pangngajaranga, tena panrannuanna.”

MATIUS 24:24

Nasaba' lania' sallang battu siapa are tumappasalama' patipu, siagang na'bi-na'bi patipu. Lanappicinikangi ke'nanga gau'-gau' teai sipatoka lompona siagang appakalanna'-lannasaka, sollanna akkulle, manna umma'Na Allata'ala lanatipu todong.

LAMPA-LAMPANA 17:11

Anjo tau anjorenga ri Berea baji'-bajikangangi pa'mai'na na tau niaka ri Tesalonika. Sannangi pa'mai'na ke'nanga ampilangngeri anjo kabara'Na Isa; allo-allona napilajari ke'nanga apa niaka tattulisi' lalang ri Kittaka, lanri ero'na ke'nanga angngassengi angkanaya maka kontutojengi anjo napangngajarranga Paulus.

1 KORINTUS 11:19

Mingka lania' memang todong passisa'la'-sa'lakkang ri tangnga-tangnganu, sollanna kabateang sallang angkanaya kereanga tu Karisteng tojeng-tojeng.

2 KORINTUS 8:8

Tena nakuero' amparentakangi anne nakupauangko. Mingka eroki kupappicinikang mae ri kau antekamma attojeng-tojenna tau maraenga antulungi paranna tau. Na ero' tongi kuasseng angkanaya sa'ge kemae tongi bellana pangngamaseannu.

EFESUS 4:14

Jari, tena nisanrapang ana'-ana', akkullea nierang anrai'-kalau' ri pangngajaranna tau la'bua akkala' salana. Natipui siagang naakkala' salai taua, nanaerang mae ri oloang salaya.

PAOLE 6:5

Kamaseangi Karaeng Allata'alanu siagang sikontu pa'mai'nu: Pappicinikangi kammaya anjo lalang ampe-ampe tallasa'nu siagang lalang ri panggaukannu.

PAOLE 8:16

Ri parang lompoa Nasareko manna untu' a'jari kanrenu, iamintu kanre tenaya naassengi boe-boenu. Nagaukangai Batara kammaya anjo lanri ero'nu naso'ri siagang nakellaina tuna pa'mai'nu, sollanna akkulle a'gau' baji' mae ri kau ri kale'bakkanna.

PAOLE 8:2

U'rangi! Patampulo taungko Napimping Karaeng Allata'alanu lalang pa'jappang bella ammalo ri parang lompoa. Erokko Naso'ri Batara ilalang ri anjo pa'jappanga, sollanna akkulle Nacini' apa niaka lalang ri atinnu, siagang apaka lanuturukiji parenta-parentaNa yareka tena.

2 TESALONIKA 2:11

Iaminjo saba'na naNapabattu Allata'ala mae ri ke'nanga koasa appakalingu-lingua, sa'genna napatappa' ke'nanga apa tenaya natojeng.

1 YOHANES 2:19

Ia musu-musunNa Almasi, iamintu sikamma tau a'lampayamo ambokoiki', nasaba' anjo ke'nanga teai memangi taunta. Punna taunta anjo ke'nanga, tantu tuli ammantangi assiagang ikatte. Mingka assulu'mi ke'nanga battu ri katte, sollanna a'jari singara'mo angkanaya tena manna sitau battu ri ke'nanga antama' tojeng-tojenga ri golonganta.

1 YOHANES 4:1

Sikamma sari'battangku sannaka kukarimangnginna! Teako patappa' ngasengi tau nakanaya niaki RohNa Allata'ala ri kalenna; mingka pilajari rolong baji'-baji' sollanna akkulle nuasseng angkanaya roh battu kemae anjo niaka ri ke'nanga: Roh battuka ri Allata'ala yareka teai. Nasaba' kamma-kamma anne jai na'bi balle-balle a'jappa mange-mange.

1 YOHANES 4:4

Mingka sikamma ana'-anakku, ikau tau battu ngasengko ri Allata'ala assala'nu. Le'ba'mi nubeta na'bi-na'bi balle-ballea, nasaba' Roh niaka ri kau la'bi makoasangangi na roh niaka ri taunna ngaseng anne linoa.

PAPPICINI' 13:14

Na natipu ngasemmo sikontu rupataua ri lino lanri anjo gau'-gau' appakalannasa' akkullea nagaukang ri dallekanna anjo olo'-olo' bungasa' battua sumpaeng. Siagang nasuro ngasemmi ke'nanga appaenteng se're patung untu' anjo olo'-olo' le'baka bokka' nataba pa'dang, mingka attallasa' iji.

HAKING-HAKING 2:22

LaKupakei anjo bansa-bansaya untu' ancobai bansa Israel, sollanna akkullei Kuasseng angkanaya maka ero'ji yareka tenamo naero' ke'nanga anturuki sikamma parentaKu.”

1 SAMUEL 26:19

O, karaeng, kipilangngeri sai sombanna anne atanta. Ebara' angkana Batara assuroi karaengku angngewai atanta, akkullei passare koro'banga ampanaungi pangngalarroinNa mae ri atanta. Mingka ebara' angkana rupatau ansuroi karaengku, tapporo nihukkung laloi ke'nanga ri Batara! Nasaba' lanri panggaukanna anjo ke'nanga nanibongkamo atanta battu ri buttaNa Batara, siagang tarpassa musti a'lampai mange ri pa'rasangang maraeng namusti anynyomba anjoreng atanta mae ri rewata-rewata tenaya niassengi.