PAMMUJI 81:8 - KITTA' MATANGKASA'

⁸ Lalang kasusannu akkiokko, naKupasalamakko. Kupialiko battu ri gunturu' tampa' paccokkoangKu, Kuso'riko ri timbuseng je'neka ri Meriba.

PAMMUJI 81:8 Iomraidhean Croise

PAMMUJI 50:7

“Pilangngeri, ikau ummakKu, erokKa' a'bicara, Israel, eroki Kusa'bi mae ri kau ngaseng; iNakke anne Allata'ala, Allata'alanu.

PAMMUJI 81:13

Lanri kammana Kubalang parekangi ke'nanga terasa' ulunna; lappassammi naturuki ero'na ke'nanga.

KALAPPASSANG 15:26

Nakana Batara, “Mannuruki tojeng-tojeng mako mae ri Nakke, siagang gaukangi apa Kukanaya baji'; turuki sikamma parentaKu. Punna nugaukang anjo kammaya, tena nulaKuhukkung sangkamma garring le'baka Kupabattu mae ri tu Mesirka. INakkemi Batara ampamolleako.”

KALAPPASSANG 17:7

Anjo tampaka niarengi Masa, lanri anjorengi ri tampaka tu Israel naso'ri Batara wattunna akkuta'nang ke'nanga angkana, “Apaka Narurungangki' Batara yareka tena?” Anjo tampaka niareng tongi Meriba, lanri anjoremmi ri tampaka akkunrareng tu Israel.

KALAPPASSANG 19:16

Ri makatalluna alloa, ri bari'basa'na, battumi gunturuka siagang kilaka. Nia'mo ammumba rammang kapala' rate ri monconga siagang nia'mo kalangngerang sa'ra tarompe' sannaka lompona sa'ranna. Annekkere' ngasemmi sikontu taua ri kemaya napakamma malla'.

YESAYA 1:19

Punna erokko mannuruki mae ri Nakke, lanukasia' ngasengi apa bajika, iamintu wassele'na pa'rasangannu.

PAMMILANGNGANG 20:13

Iaminjo timbuseng je'ne' niarenga Meriba. Nasaba' anjoremmi ri tampaka a'moro-moro tu Israel mae ri Batara, siagang anjoreng tommi Napappicinikang kakoasanNa Batara matangkasaka mae ri anjo bansaya.

YOHANES 3:11

Patappa'mi angkanaya: nipauang mako apa naassenga ikambe; siagang apa nacinikamo ikambe iatomminjo bawang nasa'bi ikambe; mingka tena ngaseng nuero' ampatappaki kasa'bianna ikambe.

LAMPA-LAMPANA 20:21

Baji' namae ri tu Yahudia, yareka mae ri bansa-bansa maraenga, tuli kupakainga' ngasemmi sollanna massing toba', battu ri dosa-dosana ke'nanga nabattu mae ri Allata'ala siagang tappa' mae ri Isa.

PAOLE 32:46

nakanamo Musa, “Katutui sollannu mannuruki ri sikontu parenta kupassareanga mae ri kau anne alloa. Pangngajarrangi mae ri ana'-ana'nu, sollanna akkulle mannuruki ke'nanga ri sikontu hukkunNa Batara siagang pa'mai' tamamminra.

PAOLE 5:27

Lanri kammana anjo, a'lampa mako Musa, pilangngeri sikontu apa Napaua Karaeng Allata'alata, nampa pabattui sallang mae ri kambe anjo apa Napaua mae ri kau. Lanapilangngeri ikambe siagang mannuruki ikambe.’

1 YOHANES 5:9

Tappakki' mae ri kasa'bianna rupataua, mingka jarrekangangi pole kasa'bianNa Allata'ala. Na iaminjo kasa'biang le'baka Napassareang Allata'ala ri passala'na Ana'Na.