PA'JARIANG 26:3 - KITTA' MATANGKASA'

³ Inakke lanjagaiko siagang lambarakkakiko. Sikontu anne daeraya laKupassareangi mae ri kau, siagang mae ri turungannu. LaKurupai janjingKu, ia le'baka Kupau mae ri Abraham manggenu.

PA'JARIANG 26:3 Iomraidhean Croise

PA'JARIANG 12:7

Napappicinikammi KalenNa Batara mae ri Abram na Nakana ri ia, “Iaminne pa'rasangang laKupassareanga mae ri sossorannu.” Nampa ambangummo Abram se're tampa' pakkoro'bangngang anjoreng untu' Batara, ia le'baka ampappicinikangi KalenNa mae ri ia.

PA'JARIANG 13:15

Sikontu anjo butta nucinika laKupassareangi mae ri kau siagang mae ri sossorannu, sollanna nukammai satunggu-tungguna.

PA'JARIANG 13:17

Kamma-kamma anne, jappaimi anne sikontu pa'rasanganga, nasaba' laKupassareangi anne mae ri kau.”

PA'JARIANG 15:18

Anjo wattua memang, appare'mi Batara parjanjiang siagang Abram. Nakana Batara, “A'janjiA' angkanaya laKusarei turungannu sikontu anne buttaya, appakkaramula battu ri pa'baeng-baenna pa'rasangang Mesir sa'genna mange ri Binanga Efrat,

PA'JARIANG 17:19

Mingka Nakanamo Allata'ala, “Tena. Anjo bainennu Sara lamanaki sitau ana' bura'ne na lanuareng Ishak. LaKuta'gala' majarreki parjanjiangKu siagang anjo anaka siagang sikontu turunganna sa'genna satunggu-tungguna. Anjo Parjanjianga sa'gennai satunggu-tungguna.

PA'JARIANG 17:8

LaKupassareangi mae ri kau siagang mae ri turungannu, anne butta nupammantangia kamma-kamma anne salaku tubattu-battu. Sikontu butta Kanaan lanapatangi ana' cucunna sa'genna satunggu-tungguna, siagang iNakke la'jari Allata'alana ke'nanga.”

PA'JARIANG 20:1

A'letteki Abraham battu ri Mamre, ri bageang timboranna butta Kanaan, nampa ammantang anjoreng ri alla'na Kades siagang Syur. Siapa are wattu ribokoanganna, ri wattunna ammantang ri Gerar,

PA'JARIANG 25:11

Ri wattu matenamo Abraham, Nabarakkakimi Allata'ala anjo Ishak, ana'na Abraham. Anjo wattua ammantangi Ishak ri ampi'na bungung niarenga “Iami Amparhatikanga'”.

PA'JARIANG 26:12

Appakioro'mi bine siagang a'lamung-lamummi Ishak anjoreng ri pa'rasanganga. Nanggappamo wassele' a'lappi sibilangngang battu ri apa napakioroka, lanri nibarakkakinna ri Batara.

PA'JARIANG 26:14

Angngiri matami tu Filistin ri ia lanri jaina surona, pa'rappungang gimbala'na siagang sapina.

PA'JARIANG 26:24

Anjo bangngia Napappicinikammi KalenNa Batara ri ia, na nakana, “INakkemi Allata'alana manggenu Abraham. Teako mallakki; laKujagaiko. LaKubarakkakiko siagang laKusareko turungang sannaka jaina lanri janjingKu mae ri atangKu Abraham.”

PA'JARIANG 28:13

Na ri sa'rinna ammentemmi Batara siagang Nakana, “INakkemi Batara, Allata'ala napakalompoa Abraham siagang Ishak. LaKupassareangi mae ri kau siagang mae ri turungannu anne butta nupanra'baia.

PA'JARIANG 28:15

U'rangi, angkanaya laKutulungko siagang laKujagaiko, manna kemae lampanu. Kammayatompa laKururungangko ammotere' mae anrinni ri anne pa'rasanganga. Tena nalaKubokoiko sa'genna le'ba' ngaseng Kugaukang apa le'baka Kupa'janjiang mae ri kau.”

PA'JARIANG 31:3

Nakanamo Batara mae ri Yakub, “Ammotere' mako mange ri pa'rasanganna manggenu siagang sikamma bija pammanakannu. INakke lanjagaiko.”

PA'JARIANG 35:12

Pa'rasangang le'baka Kupassareang mae ri Abraham siagang Ishak, laKupassareangi mae ri turungannu.”

PA'JARIANG 39:2

Nitulummi Yusuf ri Batara, sa'genna tuli a'jari baji' sikontu apa najamaya. Ammantammi ri balla'na karaenna, anjo tu Mesirka.

PA'JARIANG 39:21

Mingka nitulungi Yusuf ri Batara, siagang tuli nikamaseangi. Sa'genna ningai ri kapala balla' tarungkua.

PA'JARIANG 48:21

Nampa nakanamo Yakub mae ri Yusuf, “Sangkamma nucinika, a'birimmi a'jalakku. Mingka laNatulung ngasengko Allata'ala siagang laNaerang ngasengko ammotere' mange ri pa'rasanganna boe-boenu.

PA'JARIANG 50:24

Nakanamo ri sikamma sari'battanna, “A'birimmi narapi' a'jalakku, mingka mattantu laNaparakai ngasengko siagang laNapimpingko Allata'ala assulu' battu ri anne pa'rasanganga mange ri pa'rasangang le'baka Napa'janjiang siagang sumpa mae ri Abraham, Ishak siagang Yakub.”

1 PATTOTTORANG 16:16

Appareki parjanjiang siagang Abraham nampa pole siagang Ishak,

PAMMUJI 105:8

Tuli Nau'ranginna parjanjianNa, tappakei janjinNa satunggu-tungguna.

PAMMUJI 105:9

Anjo parjanjianNa Napareki siagang Abraham, nampa mae ri Ishak;

PAMMUJI 32:8

Nakana Batara, “LaKupicinikiangko oloang mustia nuolo, laKurenrengko siagang laKupakaingakko.

PAMMUJI 39:12

Lanri kasalanna rupataua, Kihukkungi siagang Kiajaraki sanrapang bu'bu' Kiancuruki apa lompoa anggaranna mae ri ke'nanga. Tojeng, rupataua sanrapanji sipa'maikang nappasa' bawang.

KALAPPASSANG 2:24

Nipilangngerimi ke'nanga ri Allata'ala, siagang Nau'rangimi parjanjianNa siagang Abraham, Ishak, na Yakub.

KALAPPASSANG 3:12

Appialimi Allata'ala angkana, “INakke lantulungko. Napunna nuerammo assulu' anjo bansaya battu ri Mesir, lanugaukang ngasemmi ibadaya mae ri Nakke ri anne monconga. Iaminjo a'jari butti angkana iNakke assuroko.”

KALAPPASSANG 6:4

Kulangngere'mi kunrarenna tu Israel, nipare' ataya ri bansa Mesir, nampa Kuu'rangimo anjo janjingKu.

KALAPPASSANG 6:7

LaKuerangko mange ri pa'rasangang Kupa'janjianga ammake sumpa mae ri Abraham, Ishak siagang Yakub; Kupassareangi anjo buttaya mae ri kau a'jari ikau ampatangi. INakkemi Batara.”

KALAPPASSANG 6:8

Sikontu anjo pasanNa Batara napabattui Musa mae ri bansa Israel, mingka taerokai ke'nanga anjampangi Musa, lanri tappu' minasami ke'nanga napakamma anjo sessanamo ke'nanga nipare' ata.

YESAYA 43:2

Punna nusombali je'neka, iNakke anrurungangko, tena nulatallang lalang ri sikamma kasukkarrannu. Punna allaloko ri pepeka, tena nulammutung, tena nalanabalaiko sikamma paccoba battalaka.

YESAYA 43:5

Teako mallakki, saba' iNakke alla'langiko. Battu lau' siagang battu raya Kusuroi ana' cucunnu battu asse're.

MIKHA 7:20

Mae ri ummatTa, iamintu jari-jarina Abraham siagang Yakub, laKipappicinikangi majarretTa siagang pangngainTa tenaya sanggana sangkamma Kipa'janjianga mae ri boe-boena ikambe battu riolo dudu.

PAMMILANGNGANG 23:19

Anjo Allata'ala tena nasangkamma rupataua gampanga assesse' lalang siagang nangaia a'balle-balle. Punna a'janji Allata'ala, mattantu laNarupai! Punna a'bicarai, tena taNagaukanNa!

PAOLE 1:8

INakke, Batara, le'ba' ampa'janjiangi sikontu anjo buttaya mae ri boe-boenu iamintu Abraham, Ishak siagang Yakub kammayatompa mae ri jari-jarina ke'nanga. Jari a'lampa mako mange ampammantangngi anjo buttaya.’ ”

PAOLE 34:4

Nampa Nakanamo Batara mae ri Musa, “Iaminjo pa'rasangang Kupa'janjianga mae ri Abraham, Ishak siagang Yakub untu' nipassareang mae ri jari-jarina ke'nanga. Kupappicinikangi mae ri kau, Musa, mingka tena naKupa'biangko a'lampa mange anjoreng.”

FILIPI 4:9

Gaukammi anjo apa-apa le'baka nupappilajari siagang nutarima battu ri nakke; baji' nakana-kanangku, yareka apa-apa kugaukanga. Naporo Allata'ala, kabattuanna salewanganga, anrurungang ngasengko ri katallassannu.

IBRANI 11:9

Lalang tappa'na ammantammi Abraham ri anjo pa'rasangang Napa'janjianga Allata'ala, a'jari kamma tu battu-battu. Ammantangi Abraham anjoreng, lalang ri kema napareka. Kamma tomminjo Ishak siagang Yakub, le'baka todong antarimai anjo janji kammaya battu ri Allata'ala.

IBRANI 6:17

Eroki Napakajarre' janjinNa Allata'ala mae ri sikamma tau Najanjia angkanaya talaNapinrayai janjinNa. Iaminjo saba'na naNapirurungi sumpa anjo janjinNa.