NEHEMIA 8:10 - KITTA' MATANGKASA'

¹⁰ Kamma-kamma anne ammotere' mako; angnganre angnginung mako a'rannu-rannu. Passareangi sipa'gang kanrenu siagang anggoro'nu mae ri tau kakuranganga. Anne alloa, allo nipakatangkasa' untu' Batara, jari teako susai. Karannuang Napassareanga Batara lampakajarrekko.”

NEHEMIA 8:10 Iomraidhean Croise

1 KARAENG-KARAENG 8:66

Ri allo makasagantujuna, nasuromi Salomo taua ammotere'. Yangasenna ke'nanga mammujimi ri ia, nampa ammotere' mange ri balla'na ke'nanga siagang rannu pa'mai', lanri yangasenna anjo barakka' Napassareanga Batara mae ri atanNa Daud siagang mae ri umma'Na bansa Israel.

1 PATTOTTORANG 16:27

Ia nitammulili ri kalompoang siagang kala'birang, balla'Na marassi koasa siagang karannuang.

NEHEMIA 8:11

Kammayatompa sikamma tu Lewia napakasannammi anjo ra'yaka na'mole-mole angkana, “Teako si'nai pa'mai'nu ri anne allo nipakatangkasaka.”

NEHEMIA 8:12

Jari ammotere'mi sikontu ra'yaka untu' angnganre, angnginung, siagang a'bage-bage kanre mae ri tau maraenga. Rannumi pa'mai'na ke'nanga lanri napahammi battuanna anjo nalangngereka ke'nanga nibaca.

ESTER 9:19

Iaminjo saba'na nasikamma tu Yahudi niaka ammantang ri kota-kota ca'dia tanggala' sampulo angngappa' bulang Adar napakalompo ke'nanga untu' a'rannu-rannu. Anjo alloa assua'-suara' lompoi ke'nanga siagang massing sisarei hadia kanre-kanreang.

ESTER 9:22

Nasaba' ri wattu iaminjo alloa nanabeta musu-musunna ke'nanga, sa'genna anjo si'nana siagang paccena ke'nanga amminrami a'jari karannuang siagang kasungguang. Lanri kammanami anjo namusti napakalompo ke'nanga anjo allo-alloa, iamintu assua'-suara', appare' parjamuang, kammayatompa massing sisarei ke'nanga kanre-kanreang siagang assarei ke'nanga passidakka ri tu kasi-asia.

PAMMUJI 149:2

Rannuko, he Israel, lanri Mappa'jarinu; ma'reja-rejako, he pandudu'na Sion, lanri Karaennu!

PAMMUJI 89:17

Sila'busu' allo rannu ke'nanga siagang tuli majarre', lanri kabajikanTa.

PANGNGEBARANG 17:22

Rannu pa'maika napakkamalei tubua; pa'mai' susaya annepoki sumanga'.

KATO'BA 11:2

Pantamaki modala'nu ri a'rupa-rupaya usaha; a'boyako usaha sipajai-jaina. Saba' parallui taua tutu, ri tenanapa natattuju balaya.

KATO'BA 2:24

Tenamo bajikangngang mae ri rupataua nikanaya angnganre, angnginung siagang angkasiaki wassele' jama-jamanna. Kuassengi angkanaya anjo lagi napassareNaji bawang Allata'ala.

KATO'BA 3:13

Bajikangngangi angnganre ngasengki' siagang angnginung kammayatompa nipikasiakki wassele' jama-jamanta. Anjo passareNa ngaseng Allata'ala.

KATO'BA 5:18

Punna nia' sitau annarima kakalumanynyangngang siagang barang-barang battu ri Allata'ala, nampa nisare ising untu' ampinyamangngi anjo kakalumanynyangnganna, musti appala' sukkuruki siagang nakasia' baji' sikontu wassele' jama-jamanna. Anjo kammaya passareNa tonji bawang Allata'ala.

KATO'BA 9:7

Umba, ningnganremo siagang a'rannu-rannu, inungi anggoro'nu numatte'ne-te'ne pa'mai'. Tena Napappisangkangi Allata'ala, ba'lalo Nakellai.

KELONG MALA'BIRI' 5:1

Battua', mae ri kokongku, andi', buntingku, appasse'rea' muru' siagang rampa-rampa; kukanrei ru'mung baniku siagang je'ne' baniku, kuinungi dadika siagang je'ne' anggorokku. Angnganre siagang angnginung ngaseng mako, bela-belaku, angnginungko sa'gennu nasa'ring pattanringang.

YESAYA 49:5

Ri tenanapa kulassu', Nakioka' Batara a'jari atanNa, untu' ampasse'rei umma' Israel, sollanna ammotere' ke'nanga mae ri Ia. Napa'jaria' Batara tunipakalompo, Allata'ala a'jari kagassingangku.

YESAYA 61:10

Nakana Yerusalem, “Rannui pa'maikku lanri Batara, mate'nei atingku lanri Allata'ala. Rapang bunting bura'ne siagang baine ammake belo-belo ga'ga ngaseng, kammaminjo Napatabaya Batara ri nakke baju kasalamakkang siagang pammetang.

YO"EL 2:23

He ra'ya' Sion, rannu mako! Ma'reja-rejako nu ma'rannu-rannu! Lanri sikontu kabajikang battua ri Karaeng Allata'alanu. Ri wattu timoroka Napaturungangko bosi siganna'na. Ri wattu baraka Napaturungi bosia, kammayatompa ri wattu a'rappona rappo-rappoanga kamma riolo.

ZAKHARIA 14:21

Sikontu panci niaka ri Yerusalem siagang ri sikontu Yehuda lanisa'laki nipakatangkasa' untu' Napatang Batara Kaminang Koasaya. Pandudu' angngeranga koro'bang passare lanapakei untu' ampallui dageng lanapassareanga. Punna battu sallang anjo wattua, tenamo nania' padanggang ri Balla'Na Batara Kaminang Koasaya.

LUKAS 11:41

Anjo bageang lalanganna mangko'nu siagang pirinnu, iaminjo musti nupassareang mae ri tu kasi-asia. Punna kammamo anjo batenu, ma'nassa la'jari tangkasa' ngasemmi ri kalennu.

2 KORINTUS 8:2

Le'ba'mi ke'nanga niso'ri siagang kasukkarang lompo. Mingka ri tangnga-tangngana anjo kasukkaranga, tuli rannuna pa'mai'na ke'nanga. Manna nakasi-asi ke'nanga, mingka lammoro' pa'maiki ke'nanga assare sumbangang, untu' antulungi tau maraenga.

FILIPI 3:4

Sikontutojenna akkulle tonga' tanjeng mae ri sikamma pangngadakkang kammaya anjo. Nasaba' punna nia' tau angkana nia' saba'na nakkulle tanjeng mae ri pangngadakkang nacinika mata, inakke la'biangampa pole.

PAPPICINI' 11:10

Lamarannui tuma'buttaya ri lino lanri matena anjo ruaya sa'bi. Lassua'-suaraki ke'nanga siagang massing lasikiringi ke'nanga hadia, lanri iaminjo ruaya na'bi le'ba' angngerang passessa mae ri sikontu rupataua ri lino.

1 SAMUEL 25:8

Pakkuta'nangngang mami ri ke'nanga, mattantu napakkontutojenna ke'nanga anjo passalaka. Lanri kammana anjo, kuminasai nanutarima baji' ana' buaku ri balla'nu, lanri battui ikambe ri anne allo lompoa. Sare tongi anne sikamma ata-atannu siagang inakke pole Daud, agang baji'nu, apa-apa mamo situru' nakate'neanga pa'mai'nu.”