NEHEMIA 5:12 - KITTA' MATANGKASA'

¹² Appialimi anjo sikamma pamimpinga angkana, “Anjo pappakaingatta lanaturukimi ikambe. Yangasenna lanapoterangi ikambe siagang tena nalappala' ikambe apa-apa battu ri ke'nanga.” Kukio'mi sikamma imanga nampa kusuro anjo sikamma pamimpinga sumpadeng untu' assumpa ri dallekanna anjo imang-imanga, angkanaya le'ba'mi akkana kamma anjo ke'nanga, siagang lanagaukang tojeng-tojengi anjo kananna ke'nanga.

NEHEMIA 5:12 Iomraidhean Croise

EZRA 10:12

Assa'ra lompomi ke'nanga appiali angkana, “Lanaturukimi ikambe anjo kananta.”

EZRA 10:5

Jari appakkaramulami Ezra angngalle tindakang. Nasuromi imang-imang kapalaya, sikamma tu Lewia, kammayatompa tu Israel maraengannaya untu' assumpa angkanaya lanagaukangi ke'nanga sangkamma anjo napakkanaya Sekhanya.

NEHEMIA 10:29

Nipasse're ngasemmi kalenta siagang sikamma pamimpinna ikambe untu' assumpa lattallasa' situru' hukkunNa Allata'ala, ia le'baka Napassareang tete ri atanNa iamintu Musa. Poro nitunrai ikambe punna tanarupaia ikambe anne parjanjianga. Assumpai ikambe lamannuruki ri sikontu parentaNa, hukkunNa siagang paratoranNa Batara, Allata'alana ikambe.

NEHEMIA 10:30

Assumpami ikambe untu' tala'buntinga accampuru' siagang bansa-bansa maraeng niaka ammantang ri pa'rasanganna ikambe.

NEHEMIA 10:31

Punna nia' bansa maraeng ero' ambalukangi gandunna yareka barang-barang apa mamo mae ri kambe ri allo Pammari-marianga yareka allo nipakatangkasaka maraengannaya, talanaballiai ikambe. Punna narapi' taung-taung makatujua, talanjamayai ikambe ri kokoa siagang talanasingarai pangnginranganna ikambe.

NEHEMIA 13:25

Kupakaingaki ke'nanga siagang kutunrai ke'nanga. Nia' todong kuba'ji siagang kuparuntang uu'na. Nampa kusuro ke'nanga assumpa lalang arenNa Allata'ala angkana ke'nanga siagang ana'-ana'na ke'nanga tenamo nalasicampuru' a'bunting pole.

NEHEMIA 5:11

Ero'na ikau pole tea' mako pabayaraki inranna anjo ra'ya' angnginranga ri kau, baji' na'rupa doe', kammayatompa a'rupa anggoro' yareka minynya' zaitun. Poterangi linta' kokonna, koko anggoro'na, koko zaitunna kammayatompa balla'na ke'nanga!”

MATIUS 26:63

Mingka tena Nakkana-kana Isa. Nakanamo pole imang lompoa ri Ia, “Nasaba' Allata'ala mattallasaka, paumi ri kambe, maka Ikau tojeng mintu Karaeng Mappasalamaka, Ana'naya Allata'ala?”

LUKAS 19:8

Ri wattunna battumo ri balla'na Zakheus, ammentemmi nampa nakana ri Isa, “O Batara, lakupassidakkangi tawaruanna pa'barang-barangangku mae ri tu kasi-asia; namanna inai punna le'baki kutipu, lakubayaraki ammotere' sa'genna a'lappi appaka!”