NEHEMIA 12:45 - KITTA' MATANGKASA'

⁴⁵ nasaba' iami ke'nanga anggaukangi upacara pannangkasia siagang upacara-upacara maraengannaya, ia le'baka Naparentakang Allata'ala. Sikamma pakarena musika siagang pajaga pakke'bu' lompona Balla'Na Batara ri Yerusalem nagaukang tommi tugasa'na ke'nanga situru' parentaNa Karaeng Daud siagang Salomo ana'na.

NEHEMIA 12:45 Iomraidhean Croise

2 KARAENG-KARAENG 7:10

Lanri kammana anjo ammotere'mi ke'nanga mange ri Samaria nampa akkio' mae ri pangawala'na pakke'bu' lompona kotaya, angkana, “Le'baki kambe a'lampa mange ri pakkemaanna tu Siria, nampa tena sikalimo tau anjoreng. Narapikangi kambe jaranna siagang keledaina ke'nanga nia' ngasengiji tappaukang ri tampa'na, nampa kemana ke'nanga nabokoi bawang-bawanji.”

1 PATTOTTORANG 23:28

Musti nabantui imang-imang turunganna Harun lalang anggaukangi pa'gaukang sambayanga lalang ri Balla'Na Batara, amparakai parang lakkenna siagang sikamma kamaraka lalang ri anjo Balla'Na Batara, siagang sollanna yangasenna apa-apa le'bakamo nipa'jari tangkasa' untu' Batara tena na'jari ra'masa'.

1 PATTOTTORANG 26:26

Selomit siagang bija pammanakanna tanggong jawa' mae ri sikontu passare napassareanga Karaeng Daud, kapala-kapala kaluargaya, pamimping-pamimping pa'rappungang bijaya, siagang sikamma perwira tinggina tantaraya.

2 PATTOTTORANG 23:6

Tena manna sitau akkulle antama' ri Balla'Na Batara pantaranganna sikamma imang siagang tu Lewi tugasaka. Akkullei anjo ke'nanga antama, lanri le'ba'mi ke'nanga nitangkasi untu' Batara. Sikamma tau maraenga musti tunduki ri paratoranNa Batara siagang ammantangi pantarang.