NEHEMIA 12:43 - KITTA' MATANGKASA'

⁴³ Anjo alloa jai koro'bang nipassareang ri Batara. A'rannu-rannui ra'yaka lanri nipakasunggui ri Allata'ala. Sikamma bai'-bainea siagang ana'-anaka amminawang tongi assua'-suara', siagang kalangngerammi sa'genna bella sa'ra karannuanna ke'nanga.

NEHEMIA 12:43 Iomraidhean Croise

2 PATTOTTORANG 20:13

Lalanna anjo wattua sikontu tu bura'ne Yehuda siagang massing tubai'-bainena kammayatompa ana'-ana'na ke'nanga ammentengi ri Balla'Na Batara.

2 PATTOTTORANG 20:27

Nampa napimping Yosafat sikontu pasukanga ammotere' mange ri Yerusalem. Rannui nyawana ke'nanga lanri Nabetanamo Batara musunna ke'nanga.

2 PATTOTTORANG 7:10

nampa ammukona ri tanggala' 23 bulang 7, nasuromi Salomo ammotere' anjo taua. Rannu kabusuki taua mae ri anjo sikontu kabajikang Nagaukanga Batara mae ri bansa Israel umma'Na, mae ri Daud, kammayatompa mae ri Salomo.

EZRA 3:13

Sa'genna taniassengami nibatei angkanaya kereanga sa'ra rannu lompo siagang sa'ra karru'. Teai sipato' lompona sa'ranna ke'nanga, sa'genna kalangngerang sa'genna bella.

NEHEMIA 12:27

Ri wattunna niresmikang tembo' kalli'na kota Yerusalem, nikio' ngasengi sikamma tu Lewia battu ri sikamma tampa' pammantanganna ke'nanga, sollanna akkulle ke'nanga amminawang ampakasuaraki anjo kajarianga siagang kelong-kelong appala' sukkuru', siagang gambusu' na kacapi.

NEHEMIA 12:42

ri bokona ke'nanga a'jappai Maaseya, Semaya, Eleazar, Uzi, Yohanan, Malkia, Elam siagang Ezer. Sikamma pakelonga akkelongi nipimping ri Yizrahya.

AYUB 34:29

Punna tappu' a'merekiji bawang Allata'ala, manna sitau tabarani ancallai. Punna Nacokko rupanNa, manna sitau takkulle ambuntuluki.

PAMMUJI 27:6

Anne kamma ammetama' mae ri musungku niaka angkatulunga'; jari makkio' rannuma' assare koro'bang sukkuru' ri BallatTa; erokka' akkelong siagang mammuji mae ri Batara.

PAMMUJI 28:7

Batara pa'la'langangku siagang Tumappatojengku, tappaka' mae ri Ia. Natulunga' siagang Napakarannui pa'maikku, mammujia' mae ri Ia siagang lagu sukkuru'.

PAMMUJI 9:2

Erokka' appala' sukkuru' lalang sikontu atingku ri Katte Batara, nakukabarrang kalompoanna bate paretTa.

PAMMUJI 92:4

angngo'bi' gitar sampuloa otere'na, nirurungang ri gambusu' siagang kacapi.

YESAYA 61:3

untu' assarei karannuang siagang kate'neang pa'mai' sikamma tau si'naya siagang tau susaya; untu' ampinrai si'nana ke'nanga a'jari kelong pammuji. Larapangi ke'nanga poko' kayu nilamunga ri KalenNa Batara. Lanagaukangi ke'nanga apa bajika siagang annabaya, sa'genna nipakala'biri' Batara.

YEREMIA 31:13

Ri anjo wattua la'jogeki tau loloa assannang-sannang pa'mai'. Tau toaya siagang tau rungkaya para lamate'ne ngasengi pa'mai'na, nasaba' iNakke lassaleori ke'nanga. Susana ke'nanga Kupinrai a'jari karannuang, Kupinrai si'naya a'jari mate'ne.

YEREMIA 33:11

Mingka anjoreng ri tampaka lania' pole kalangngerang sa'ra karannuang siagang kalompoang pa'mai' kammayatompa sa'ra passua'-suarrang pa'gaukang pa'buntingang. Lania' todong kalangngerang kelong-kelong tau angngerang koro'bang kasukkurang mange ri BallakKu. Lanakana ke'nanga, ‘Appala' sukkurukko mae ri Batara Kaminang Koasaya, lanri Ia bajiki siagang pangngamaseanNa sa'genna satunggu-tungguna.’ Anne pa'rasanganga laKupa'jari kalumanynyangi sangkamma riolo. INakke, Batara, anne akkana.”

PAMMILANGNGANG 10:10

Kammayatompa ri allo-allo karannuannu, iamintu ri allo passua'-suarrang Bulang Beru siagang passua'-suarrannu maraengannaya, anjo tarompeka musti nituiki ri wattunnu assare koro'bang nitunu siagang koro'bang passiamakkang mae ri Nakke. Jari iNakke lantulung ngasengko. INakkemi Karaeng Allata'alanu.”

MATIUS 21:15

Mingka larromi imang-imang kapalaya siagang guru-guru agamaya nacini'na Nagaukang Isa anjo gau' appakalannasaka. Larro tommi ke'nanga nalangngere'na ana'-anaka akkiok-kio' lalang ri Balla'Na Batara angkana, “Nipakalompoi Ana'na Daud!”

MATIUS 21:9

Nampa a'jappa anjo tau jaia ri dallekanNa siagang ribokoNa Isa. Akkiok-kio'mi ke'nanga angkana, “Nipakalompoi Ana'na Daud! Nibarakkakimi battua lalang arenNa Batara! Nipujimi Allata'ala Kaminang Tinggia!”

YOHANES 16:22

Kamma tomminjo ri kau ngaseng: kamma-kamma anne susai nyawanu, mingka lasibuntulu' poleang jaki' sallang, jari la'jari rannumi nyawanu. Na tenanniakka tau lakkulle angngallei anjo karannuanga battu ri nyawanu.

EFESUS 5:19

Pakei kana-kana mappakala'birika, kelong pammuji-mujia siagang lagu-lagu rohania lalang ri kana-kanannu. Paralluko rannu pa'mai' akkelong mammuji-muji mae ri Batara makoasaya.

YAKOBUS 5:13

Punna nia' ri tangnga-tangnganu tau susa, parallui appala' doang. Punna nia' tau rannu, parallui akkelong mammuji ri Allata'ala.

1 SAMUEL 4:5

Battunamo anjo Patti Parjanjianga mae ri kemaya, a'gora-gora lompomi tu Israel, sa'genna ta'ge'goso' buttaya.