MIKHA 1:11 - KITTA' MATANGKASA'

¹¹ Ikau ngaseng pandudu'na Safir, a'lampamako mange ri tampa' pammelakkanga tammakea pakeang siagang tena siri'-siri'nu! Tu Zaanan tena nabarani assulu' battu ri kotana ke'nanga. Sa'ra ammarranna taua ri Bet-Haezel a'jari tanra mae ri kau angkanaya anjoreng tenamo pa'la'langngang.

MIKHA 1:11 Iomraidhean Croise

YESAYA 16:2

Attayangi tu Moab ri birinna Binanga Arnon nampa lingu pitijappa-jappai, rapang jangang-jangang nibongka battu ri ru'munna.

YESAYA 20:4

Lanaallei karaeng Asyur natahang taua ri anjo ruaya pa'rasangang siagang laniembai ke'nanga assolara'. Tau toa tau rungka, yangasenna la'jappai tammake baju siagang pa'lapa' bangkeng nakacinikang pajana, a'jari tanra nihinana tu Mesir.

YEREMIA 13:22

Gassingka akkuta'nangko angkana angngapa nabattu ngaseng anjo sikammaya antujuko, angngapa nanikae pakeannu siagang angngapa nanigau' bawangko. Parallui nuasseng angkanaya nakajariang anjo sikammaya lanri lompo duduna dosanu.

YEREMIA 48:6

Nakana ke'nanga, ‘Karo-karoko! Pasalamaki nyawanu! Lariko rapang keledai liaraka ri paranga!’

YEREMIA 48:9

Attannangko batu nisang untu' Moab, lanri tasalloami anjo pa'rasanganga nanipanraki taba sikali. Kota-kotana laruntungi siagang tena manna sitau lammantang anjoreng.”

YEHEZKIEL 16:37

Lanri kammana anjo, sikontu tanrinnu laKupasse'rei, baji' nanungaia kammayatompa tenaya nungai. Lammentengi ke'nanga antammuliliko siagang lanapasulu' ngasengi ke'nanga care-carenu, sa'genna akkulle ke'nanga anciniki kalennu assolara'.

YEHEZKIEL 23:29

Lanri birisiki ke'nanga mae ri kau, sikontu wassele' usahanu lanarampasaki ke'nanga. Lanabokoiko assolara' sibatu kale sangkamma pasundala' siagang lanicinikiko ri tau jaia. Kabalerannu siagang kalaleannu tonji

MIKHA 1:8

Lanri kammana anjo, inakke, Mikha, si'nai pa'maikku siagang akkunrarenga'. La'jappa' natena kummakeang siagang tena kummake pa'lapa' bangkeng untu' ampappicinikangi angkanaya antekamma si'nana pa'maikku. Lappilollonga' rapang kongkong romang siagang lammarranga' rapang unta.

NAHUM 3:5

Nakana Batara Kaminang Koasaya, “He Niniwe laKusessako! Kusungkei pakeannu ri dallekanna bansa-bansaya, sa'genna nacini' ngaseng ke'nanga kodinu.

ZAKHARIA 14:5

Lalariko allalo ri anjo lappara' ka'bung ambage ruayai anjo buluka. Lalariko sangkamma boe-boenu ri wattunna ta'ge'goso' buttaya ri wattu ammarentana Uzia, iamintu karaenna Yehuda. Nampa battu Karaeng Allata'alaku, nirurungang ri sikontu malaekaka.

YOSUA 15:37

Kammayatompa anne sampuloa angngannang kota siagang desa-desa niaka ri tammulilina: Zenan, Hadasa, Migdal-Gad, Dilean, Mizpa, Yokteel, Lakhis, Bozkat, Eglon, Khabon, Lahmas, Khitlis, Gederot, Bet-Dagon, Naama siagang Makeda.