MATIUS 26:10 - KITTA' MATANGKASA'

¹⁰ Nalangngere'na Isa anjo bicaranna ke'nanga, Nakanamo, “Angngapa nanususai kamma anne bainea? Anu baji' siagang anu annaba anne nagaukanga ri Nakke.

MATIUS 26:10 Iomraidhean Croise

NEHEMIA 2:18

Nampa kucaritamo ri ke'nanga antekamma bateku nitulung ri Allata'ala siagang apa le'ba' nakana karaenga mae ri nakke. Appialimi ke'nanga angkana, “Umba kippakkaramula ambangung!” Nampa sadia ngasemmo ke'nanga untu' appakkaramula anjama.

AYUB 13:7

Akkullekai lanri Allata'ala, nu'balle-balle? Akkullekoka a'balle-balle untu' kaparalluanNa?

MATIUS 26:11

Ia tau kasi-asia tuli lania'na ri ampi'nu, mingka iNakke tena Kutuli lania' ri ampi'nu.

MATIUS 26:9

Akkullei nibalukang ka'jala' anjo minynya'-minynyaka nampa nipassareang ballinna mae ri tau kasi-asia!”

MARKUS 14:6

Mingka Nakanamo Isa, “Lappassammi nagaukang kammaya! Angngapa nuero' ansusa-susai? Apa baji' siagang apa akkulle nipuji nagaukang mae ri Nakke.

LUKAS 8:49

Sitabang a'bicaraNa Isa, nia'mo sitau tunisuro battu mae ri Yairus, iamintu tau battu ri balla'na Yairus. Nakanamo anjo taua ri Yairus, “Matemi anjo ana' baineta. Tea' maki' susa-susai pole anjo Bapa' Guru.”

2 KORINTUS 9:8

Makoasai Allata'ala assareko barakka' allumpa-lumpa, sollanna tena nukakurangang ri apa-apa nuparalluanga. Ba'lalo lakala'biangko, sollannu akkulle a'gau' baji' siagang appare' amala'.

GALATIA 1:7

Sikontutojenna tena “kabara' baji' maraeng”. Mingka nia'naji bawang siapa are tau ambirittakangi mae ri kau “kabara' baji'” ri sesena Almasi, nanaputara' bale' anjo kabaraka sa'gennu nipa'jari lingu.

GALATIA 5:12

Bajikangangi punna assulu' memang battu ri jama'aka anjo tau angkacoai pikkirannu!

GALATIA 6:17

Kammayatompa pole, poro tena lalomo manna sitau ansusaia' pole; nasaba' nia'mi butti-buttina ri kalengku, angkanaya ma'nassa ana' gurunNa' Isa.

EFESUS 2:10

Ikatte bate pare'Naki' Allata'ala; tete ri Isa Almasi, Napare' beru maki' Allata'ala, sollanna nigaukang apa-apa bajika, le'baka Napasadiangki' Allata'ala.

KOLOSE 1:10

Na lanri kammanami anjo nukkullemo attallasa' situru' ero'Na Allata'ala, siagang natuli nupakasannang pa'mai'Na; sa'genna ilalang ri apa-apa mamo, akkulleko appa'nia' wassele' apa-apa baji'. Kammayatompa katambang tommi pammahannu ri sesena Allata'ala.

1 TIMOTIUS 3:1

Kontu tojengi anne bicara angkanaya, “Inai-nai ero' a'jari pamimping jama'ah, eroki ri jama-jamang sannaka lompona anggaranna.”

1 TIMOTIUS 5:10

niassemmi angkanaya nangai a'gau' bajika, kammaya: le'ba'mi napakalompo baji' ana'-ana'na, nangai annarimaya toana a'bangngi ri balla'na, nalayani tau tappaka, siagang natulungi tau susaya; bodona kana, le'ba'mi nagaukang tojeng-tojeng a'rupa-rupaya jama-jamang baji'.

2 TIMOTIUS 2:21

Inai-nai antangkasi kalenna battu ri sikontu gau' tenaya nabaji' iami lanipake untu' gau'-gau' kaparalluang lompoa. Iami a'jari taunna siagang a'matu-matua mae ri karaenna. Iami nipasadia untu' lanipake ri jama-jamang bajika.

TITUS 1:16

Nakana kalenna ke'nanga Naassengi Allata'ala, mingka ma'nassa nasassali lalang ri panggaukanna ke'nanga. Sanna' appakaringi'-ringi'na ke'nanga siagang taerokai mappilangngeri; tau tena sikali naero' ke'nanga anggaukangi apa-apa bajika.

TITUS 2:14

Le'ba'mi Nakoro'bangkang KalenNa untu' kasalamakkanta battu ri sikontu kaja'dallanga, na Napa'jariki' umma'Na matangkasaka, siagang rajenga a'gau' baji'.

TITUS 3:1

Piu'rangiangi anggota-anggota jama'anu sollanna mappilangngeri mae ri pamimping-pamimpinga siagang mae ri tau anna'galaka koasa ri pa'rasanganga; kammayatompa mannuruki siagang sadia anggaukangi sikamma kabajikanga.

TITUS 3:14

Yangaseng taunta musti appilajaraki anggaukangi apa-apa bajika, sollanna akkulle massing nagappa apa-apa sannaka naparalluina ke'nanga; gassingka tena matu-matunna katallassanna ke'nanga.

TITUS 3:8

Sanna' kontutojenna anne bicaraya. Kukellaiko ampakasingara' tojeng-tojengi yangasenna anne, sollanna akkulle usaha tojeng-tojeng sikamma tau tappaka mae ri Allata'ala, untu' anggaukangi jama-jamang bajika siagang a'matu-matua untu' yangasenna taua.

IBRANI 13:21

Poro Allata'ala, iamintu kabattuanna barakka' kasalewanganga ampassukku' ngasengko siagang sikontu apa-apa baji', nuparalluanga untu' anggaukangi ero'Na. Poro tete ri Isa Almasi, naNagaukang Allata'ala lalang ri kalenta apa Nakaerokia. Poro tuli nipuji-puji Almasi sa'genna satunggu-tungguna! Aming.

1 PETRUS 2:12

Musti sannaki nubajikinna panggaukannu ri tangnga-tangngana tau tenaya naassengi Batara. Sollanna punna napitinako ke'nanga angkana tau ja'dalakko, mingka musti napakkontutojengi panggaukang-panggaukang baji'nu; sa'genna lanapuji sallang ke'nanga Allata'ala, ri allo kabattuanNa.