MATIUS 11:5 - KITTA' MATANGKASA'

⁵ accini'mi tau butaya, a'jappami tau pesoka, a'jari baji'mi tau garring salaya, allangngere'mi tau tongoloka, attallasa' poleammi tau matea, kammayatompa nibirittakammi Kabara' Baji' battua ri Allata'ala mae ri tu kasi-asia.

MATIUS 11:5 Iomraidhean Croise

2 KARAENG-KARAENG 5:14

Lanri kammana anjo a'lampami Naaman mange ri Binanga Yordan nampa antama' ampaselangi kalenna pintuju sangkamma napassuroanga Elisa. Na'jari baji'mo Naaman. A'jari baji'mi ammotere' tanja'na kalenna sangkamma kale turungka.

2 KARAENG-KARAENG 5:7

Ri wattunna nabaca karaeng Israel anjo suraka, nakekke'-kekke'mi pakeanna napakamma lussa', na nakana, “Ballasa'ma' nakke! Apa saba'na nanapala' karaeng Siria sollanna kupammolle anne taua? Teai inakke Allata'ala, Ia niaka koasaNa untu' ampattallasaki yareka ampamatei rupa taua. Ma'nassa ero'naja anjo karaeng Siria a'boya pa'bettesang mae ri nakke!”

PAMMUJI 146:8

siagang ampa'jari tau butaya akkulle accini'. Napabangungi tau tu'guruka, siagang Nakamaseangi tau lambusuka.

PAMMUJI 22:26

Ri tangnga-tangngana passe'reanna ummaka mammujia' mae ri Katte, lanri sikontu apa le'baka Kigaukang. Ri dallekang umma' mappilangngeria kupassareang koro'bang le'baka kupa'janjiang.

KALAPPASSANG 4:11

Nakanamo Batara mae ri ia, “Inaika assarei bawa rupataua? Inai ampa'jari pepei siagang ampa'jari tongoloki? Inai assarei paccini' siagang ampa'jari butai? Teaika iNakke, Bataraya?

YESAYA 29:18

Anjo wattua tau tongoloka lanalangngereki kana-kana nibacaya battu ri se'reang kitta', siagang tau butaya, ia sassanga tallasa'na sumpaeng, lakkullei accini'.

YESAYA 29:19

Tau kasi-asia siagang tau hinaya lanakasiaki ammotere' kate'neang Napassareanga Allata'ala matangkasa'na Israel.

YESAYA 43:8

Nakana Allata'ala, “Suroi maju mae ri dallekang bansaKu butaya, manna pole nania'ja matanna; ia tongoloka, manna pole nania'ja tolinna.

YESAYA 66:2

Sikontu linoa sangnging bate pare' limangKu, jari yangasenna anjo apa nipa'jari. Mingka ia Kungaia iamintu tau tuna pa'maika, assesse' lalanga lanri dosa-dosana, ia mallaka siagang mannurukia mae ri Nakke.

ZAKHARIA 11:7

Nampa inakke, Zakharia, nigajima' ri sikamma padanggang gimbalaka untu' angkalawaki sikamma gimbala' lanipolonga. Inakke nia' rua takkangku; se'reanga kuarengi “Kalammorang” nampa se'reanga pole kuarengi “Sikkokang”. Nampa appakaramulama' anjagai siagang amparakai anjo sikamma gimbalaka.

MATIUS 10:8

Pakabaji'mi sikamma tau garringa; pabangung poleangi tau matea pakabaji'mi tau garring salaya, siagang bongkami sikamma setanga. Na anne Kusareangako, apa kupassareang bawang-bawanji ri kau ngaseng. Jari passareang bawang-bawang tommi mae ri taua.

MATIUS 11:4

Appialimi Isa Nakana, “Ammotere' mako mae ri Yohanes nanupauang apa le'baka nucini' siagang nulangngere', iamintu:

MATIUS 12:13

Le'baki anjo Nakanamo Isa ri anjo tau mate sialia limanna, “Pajonjoi limannu.” Napajonjomi limanna anjo taua; apaji na'jari baji'mo limanna anjo taua sangkamma limanna sialia.

MATIUS 21:14

Battumi tau butaya siagang tau pesoka nierang mae ri dallekanNa Isa lalang ri Balla'Na Batara. Nampa niballei ngaseng ri Isa, na'jari baji' memang silalonna.

MATIUS 5:3

“Mate'nei tau tanjenga ri Allata'ala lanri naassenna kalenna tau tena kullena; nasaba' iami a'jari umma'Na Allata'ala!

MATIUS 9:30

Apaji nakkullemo accini' ke'nanga. Napakainga' dudumi Isa ke'nanga, sollanna tena napaui ke'nanga anjo kajarianga manna pole ri nai.

MARKUS 7:37

Nalannasa' ngasemmo taua allangngereki. Nakana ke'nanga, “Napa'jari baji' ngasemmi tau garringa! Ba'lalo Napa'jarimi allangngere' tau tongoloka, siagang a'bicara tau pepea!”

MARKUS 9:25

Wattunna Nacini' Isa, angkanaya appakkaramulami jai tau battu a'lipung, Nasuromi a'lampa anjo roh ja'dalaka. Nakana, “E kau roh tongoloka siagang pepea, Kuparentakangko assulu' battu lalang ri kalenna anne anaka, siagang tea' laloko antamakki pole!”

LUKAS 4:18

“Niaki RohNa Batara ri KalengKu, Nasaba' le'ba'Ma' Nalanti' untu' ambirittakangi Kabara' Bajika mae ri tu kasi-asia. NasuroA' battu untu' ampa'la'bangi biritta kalappassanna tu nitarungkua siagang lamaccini'na tu butaya; untu' allappassangi tu nijallakkanga

YOHANES 10:25

Appialimi Isa Nakana, “Le'ba' mako Kupauang, mingka tena ngaseng nutappa'. Sikamma jama-jamang Kugaukanga lalang arenNa ManggeKu, a'jari ngasemmi butti mae ri KalengKu.

YOHANES 10:38

Mingka lanri Kugaukammi, tappa' mako mae ri sikamma anjo apa le'baka Kugaukang, manna pole taerokako tappa' ri Nakke. Lalang kammana minjo nanuasseng siagang nupahang angkanaya tuli se'rena Manggea siagang iNakke, siagang tuli se'reKu siagang Manggea.”

YOHANES 2:23

Lalang ri nia'na Isa ri Yerusalem, ri wattunna allo Passua'-suarranna Paskaya, jaimi tau tappa' ri Ia lanri sikamma gau' appakalannasa' le'baka Nagaukang.

YOHANES 3:2

Nia' se're wattu nabattu bangngi mange ri Isa. Nakana ri Isa, “Bapa' Guru, niassemmi angkanaya Allata'ala assuroKi' battu. Nasaba' tenanniakka manna sitau akkulle anggaukangi gau' appakalannasa' sangkamma le'baka Kigaukang, punna tena nanirurungangi ri Allata'ala.”

YOHANES 5:36

Mingka lompoangangi kasa'biangKu na kasa'bianna Yohanes. Apa Kugaukanga ri kamma-kammaya anne, iamintu jama-jamang Napassuroanga Manggea mae ri Nakke, iaminjo a'jari butti, ma'nassana Manggea assuroA' battu.

YOHANES 9:7

na Nakana ri ia, “A'lampamako ambissai rupannu ri Balang Siloam.” (Siloam battuanna ‘Nisuro’.) Jari a'lampami anjo taua ambissai rupanna. Ri wattunna ammotere', akkullemi accini'.

LAMPA-LAMPANA 2:22

Sikamma sari'battangku tu Israelka! Pilangngeri anne apa kupaua: Anjo Isa, battua ri Nazaret, nisarei tugasa' ri Allata'ala untu' ikau ngaseng. A'nassa sikalimi anjo lalang ri gau'-gau' appakalannasa' siagang apa-apa tenaya narapiki akkala'nu, le'baka Nagaukang Allata'ala ri tangnga-tangnganu lalang ri KalenNa anjo Isa. Yangasenna anjo massing nuassemmi.

YAKOBUS 2:5

U'rangi sikamma sari'battangku, sannaka kukarimangnginna! Ia tau nicini' kasi-asia ri anne linoa, iami nipilei ri Allata'ala untu' a'jari tu kalumanynyang lalang ri katappakkanga. Iaminjo tau kammaya la'jari Umma'Na Allata'ala situru' Napa'janjianga Allata'ala mae ri sikamma tau angkamaseangai.