MATIUS 1:12 - KITTA' MATANGKASA'

^12-16 Battu ri wattunna nipela' bansa Israel mange ri butta Babel sa'genna lassu' Isa Almasi, iaminne areng-arenna ke'nanga: Yekhonya, Sealtiel, Zerubabel, Abihud, Elyakim, Azur, Zadok, Akhim, Eliud, Eleazar, Matan, Yakub, Yusuf bura'nenna Maria. Na battu ri iaminjo Maria lassu' Isa nigallaraka Almasi.

MATIUS 1:12 Iomraidhean Croise

2 KARAENG-KARAENG 24:14

Karaeng Yoyakhin, amma'na, sikamma bainenna, pagawe-pagawena, siagang pamimping-pamimpinna tu Yehuda, kabusu'na nia' 7.000 tau parallu, nitahangi siagang niengkaki mange ri Babel. Kammayatompa sikontu tau cara'deka siagang panre bassia nia' 1.000, kabusu'na sangnging tau kassa' ngaseng siagang tau barani untu' a'bundu'. Bija-bija karaenga siagang pamimping-pamimpinga niengka' kabusuki mange ri pa'rasangang pammelakkanga, yangasenna nia' 10.000 jaina tau. A'biringi sikontu pandudu'na Yerusalem niengka' a'lampa; ia ammantanga iamami ra'ya' kaminang kasi-kasia.

2 KARAENG-KARAENG 25:27

Ri tanggala' 27 bulang 12 lalang ri taung makatallumpulo antuju le'ba'na niengka' Yoyakhin mange ri pammelakkanga, Ewil-Merodakh a'jari karaeng ri Babel. Ia memang anjo taunga namangngamaseang mae ri Yoyakhin na nalappassang battu ri tarungkua,

1 PATTOTTORANG 3:17

Iaminne turungang battua ri Yoyakhin, karaeng nibetaya nanitarungku ri tu Babel. Nia' tuju ana'na bura'ne, iamintu: Sealtiel,

EZRA 3:2

Nampa Yesua ana'na Yozadak siagang sikamma agang-aganna sikamma imanga, Zerubabel ana'na Sealtiel siagang sikamma bija pammanakanna, nabangummi ammotere' tampa' pakkoro'bangnganga untu' Allata'alana tu Israel. Lanri kammana akkullemi ke'nanga attunu koro'bang irateanna, situru' sikamma pitunju' niaka tattulisi' lalang ri kitta' hukkunna Musa, atanNa Allata'ala.

EZRA 5:2

Nalangngere'na pappasanna anjo ruaya na'bi, appakkaramulami linta' Zerubabel ana'na Sealtiel, siagang Yesua ana'na Yozadak, ambangungi ammotere' Balla'Na Batara ri Yerusalem, nampa nibantui ri anjo ruaya na'bi.

NEHEMIA 12:1

Iaminne sikamma imanga siagang tu Lewia, ammotereka battu ri pa'rasangang pammelakkanga siaganga a'rurung Zerubabel ana'na Sealtiel siagang Imang Lompo Yesua:

YEREMIA 22:24

Nakana Batara ri Karaeng Yoyakhin, ana' bura'nena Yoyakim karaeng Yehuda, “Lanri iNakke, Allata'ala mattallasaka, Kupattantu tojeng-tojengi angkanaya manna pole ikau rapangko cincingKu ammakea meterei ri lima kanangKu, mingka laKupasulukko

YEREMIA 22:28

Inakke Yeremia, kukana, “Apaka anjo Karaeng Yoyakhin a'jarimi sanrapang uring reppe' nipelaka siagang tenayamo ningai? Iakami anjo saba'na nanibongkai siagang nipelaki siagang ana'-ana'na mange ri pa'rasangang tenaya naassengi ke'nanga?”

YEREMIA 22:30

“Anjo taua le'ba'mi nipattantu angkanaya latappelaki ana'-ana'na siagang tuli lasalasai lalang katallassanna. Battu ri jari-jarina tena tasalasa lalang ammarentana ri Yehuda, tena nasangkamma Karaeng Daud. INakke, Batara, anne akkana.”

HAGAI 1:1

Ri taung makarua pamarentahanna Karaeng Darius ri Persia, ri tanggala' se're bulang makaannang, a'bicarai Batara tete ri Na'bi Hagai. Anjo pasanNa Batara nipatujui mae ri Zerubabel ana'na Sealtiel, guburnur Yehuda, siagang mae ri Imang Lompoa Yosua ana'na Yozadak.

HAGAI 1:12

Nampa Zerubabel siagang Yosua kammayatompa sikontu umma' Israel niakamo ammotere' battu ri pammelakkanga ri Babel, naturukimi kana-kananna Hagai, iamintu suroNa Batara. Nagaukammi ke'nanga apa Naparentakanga Batara mae ri ke'nanga, lanri malla'na ri Batara.

HAGAI 1:14

Kammami anjo bateNa Batara ampagioki atinna Guburnur Zerubabel, Imang Lompoa Yosua siagang sikontu tau niakamo ammotere' battu ri pammelakkanga, sollanna anjama ngaseng ke'nanga ambangungi Balla'Na Batara Kaminang Koasaya, Allata'alana ke'nanga.

HAGAI 2:2

Nasuroi Batara anjo Hagai a'bicara ri Guburnur Zerubabel, Imang Lompo Yosua, kammayatompa sikontu ra'yaka untu' ampabattui anne pasanga angkana,

HAGAI 2:23

Ri anjo alloa, ikau Zerubabel, atangKu, laKuangkakko untu' ammarenta lalang arengKu. Nasaba' ikaumi le'ba' Kupile.” Batara Kaminang Koasaya anne akkana.

MATIUS 1:17

Jari, punna nisusungi appakkaramula battu ri Abraham sa'genna Daud nia' sampulo angngappa' lapisi'na sossorang. Na punna nisusung battu ri Daud sa'genna ri wattunna nipela' bansa Israel mange ri butta Babel nia' todong sampulo angngappa' lapisi'na sossorang. Kammayatompa punna nisusung battu ri wattunna nipela' bansa Israel mange ri butta Babel sa'genna nilassukang Almasi nia' todong sampulo angngappa' lapisi'na sossorang.