LUKAS 9:16 - KITTA' MATANGKASA'

¹⁶ Nampa Naalle Isa anjo roti limambatua siagang juku' ruang kayua. Accongami nai' ri langika, appala' sukkuru' ri Allata'ala. Le'baki anjo Nabage-bagemi anjo rotia siagang jukuka; nampa Napassareang mae ri ana'-ana' gurunNa, sollanna natawa-tawai anjo taua.

LUKAS 9:16 Iomraidhean Croise

MATIUS 14:19

Nasuromi anjo tau jaia ammempo naung ri paranga. Le'baki anjo, Naallemi anjo roti limambatua siagang juku' ruang kayua. Nampa acconga nai' ri langika, appala' sukkuru' ri Allata'ala. Nabage-bagemi anjo rotia, nampa Napassareang mae ri ana'-ana' gurunNa, sollanna natawa-tawai anjo tau jaia.

MATIUS 15:36

Nampa Naalle anjo roti tujumbatua siagang anjo jukuka. Le'baki appala' sukkuru' ri Allata'ala, Nabage-bagemi anjo rotia siagang jukuka nampa Napassareang mae ri ana'-ana' gurunNa. Natawa-tawaimi ke'nanga anjo tau jaia.

MARKUS 7:34

Le'baki anjo accongami nai' ri langika, nampa a'mai' la'bu na Nakana ri anjo taua, “Efata,” battuanna, “Tassungke mako!”

LUKAS 22:19

Le'baki anjo angngallemi roti Isa. Na le'ba'na appala' sukkuru', Napue-puemi anjo rotia siagang limanNa, nampa Napassareang mae ri ke'nanga, na Nakana, “Iaminne batangkalengKu [nipassareanga untu' ikau ngaseng. Gaukammi anne kammaya, untu' a'jari pangngu'rangi mae ri Nakke.”

LUKAS 24:30

Ri wattunna ammempo sipangnganreang ke'nanga, angngallemi roti Isa. Appala' sukkuru'mi ri Allata'ala, naNapue-pue anjo rotia, nampa Napassareang mae ri ke'nanga.

LUKAS 9:15

Nagaukammi ana'-ana' gurunNa Isa anjo apa Napassuroanga.

LUKAS 9:17

Angnganre ngasemmi ke'nanga sa'genna bassoro'. Nampa napasse're ana'-ana' gurunNa Isa kanre alla'bia, nia' sampulo anrua baku' jaina.

YOHANES 6:11

Le'baki anjo, Naallemi Isa anjo rotia nampa appala' sukkuru' ri Allata'ala. Nampa Nabage-bage anjo rotia mae ri anjo tau jaia. Napakamma tomminjo jukuka; le'baki appala' sukkuru' Nabage-bage tommi anjo jukuka. Nangnganre ngasemmo ke'nanga sa'genna bassoro'.

YOHANES 6:23

Nampa nia'mo siapa are biseang battu ri kota Tiberias mange anjoreng ri ampi'na tampa' le'baka napangnganrei roti tau jaia ri wattunna nisare ri Isa.

LAMPA-LAMPANA 27:35

Le'baki akkana kamma Paulus, angngallemi roti nampa appala' sukkuru' mae ri Batara ri dallekanna ngaseng ke'nanga. Nampa napa'bage-bageang anjo rotia, nanakanre anjo rotia.

ROMA 14:6

Nia' tau ampa'jari la'bi paralluangangi allo-allo attantua, lanri ero'na napakala'biri' Batara. Nia' tau a'rupa-rupai nakanre, lanri ero'na napakala'biri' Batara, nasaba' napakei appala' sukkuru' mae ri Allata'ala anjo kanrea. Kammatommi anjo tau kanre-kanreang attantuaji bawang nakanre; anjo taua napakala'biriki Batara siagang appala' sukkuruki mae ri Allata'ala.

1 KORINTUS 10:30

Punna appala' sukkurukka' ri Allata'ala angkanrei kanrea, angngapa nakunacalla taua, nakule'ba'mo appala' sukkuru' mae ri Allata'ala?”

1 KORINTUS 11:24

na ri wattunna le'ba' appala' sukkuru' mae ri Allata'ala, Nabage-bagemi anjo rotia, nampa Nakana, “Iaminne batangkalengKu nipassareanga untu' ikau ngaseng. Gaukammi anne kammaya untu' pangngu'rangi mae ri Nakke.”