LUKAS 8:44 - KITTA' MATANGKASA'

⁴⁴ A'reppese'mi anjo bainea battu ri bokoNa Isa, nampa nasero cappa' jubaNa. Ammari memammi silalonna nalari cera' anjo bainea.

LUKAS 8:44 Iomraidhean Croise

KALAPPASSANG 15:26

Nakana Batara, “Mannuruki tojeng-tojeng mako mae ri Nakke, siagang gaukangi apa Kukanaya baji'; turuki sikamma parentaKu. Punna nugaukang anjo kammaya, tena nulaKuhukkung sangkamma garring le'baka Kupabattu mae ri tu Mesirka. INakkemi Batara ampamolleako.”

MALEAKHI 4:2

Mingka ikau tau mannurukia ri Nakke, lammumbai koasangKu mappasalamaka rapang mataallo, nasioro'na angngerangi pappakamolle ri garring. Lata'lappasakko siagang larannuko rapang ana' sapi beru assuluka battu ri barana.

MATIUS 20:34

Tu'guru'mi pangngamaseanNa Isa ri ke'nanga. Najamami matanna ke'nanga, nakkulle memammo accini' silalonna. Nampa amminawammi ke'nanga ri Isa.

MATIUS 8:3

Naangka'mi limanNa Isa naNajama anjo tau garring salaya, na Nakana, “Kuerokangi, a'jari baji' mako!” Apaji nammari memammo silalonna garrinna anjo taua.

MATIUS 9:20

Ri tangngana aganga, nia'mo sitau baine battu ri boko a'reppese' mae ri Isa. Anjo bainea sampulomi anrua taung garring nalari cera'. Na nakana pikkiranna, “Manna kuseroja bawang jubaNa, akkullema' a'jari baji' ri garringku.” Jari naseromi jubaNa Isa.

MARKUS 6:56

Kemae-kemae battu Isa – baji'na ri kampong-kamponga, ri desa-desaya, yareka ri kota-kotaya – anjoreng tommi battu taua massing angngerangi tau garrinna na napadongko' ri lapanganga. Nampa napala' dudu ri Isa, sollanna nipa'biang ngaseng anjo tau garringa anseroi jubaNa, manna cappa'naja nasero ke'nanga. Na sikontu tau le'baka anseroi jubaNa, a'jari baji' ngasemmi.

LUKAS 13:13

Nampa Napadongko' limanNa Isa irateanganna anjo bainea; na anjo wattua akkullemi ammenteng silalonna anjo bainea, nampa ammuji-muji ri Allata'ala.

LUKAS 7:38

Mangemi ammenteng ri bokoNa Isa, iamintu ri ampi' bangkenNa Isa. Angngarru'mi anjoreng, nampa nabasai bangkenNa Isa siagang je'ne' matanna. Nampa nalu'lu' nakalotori bangkenNa Isa siagang uu'na, nampa natumpai minynya'-minynya' bau'.

LUKAS 8:43

Nia' tommo ri alla'na ke'nanga sitau baine; anjo bainea sampulomi anrua taung garring nalari cera'. La'busu'mi barang-baranna napangngongkosang mae ri dottoroka, mingka tena manna sitau akkulle amballei.

LUKAS 8:45

Akkuta'nammi Isa Nakana, “Inai anseroi jubaKu?” Assassala' ngasemmi taua. Nakanamo Petrus, “Jai sikali tau angkulilingiKi', siagang ansorong-sorongKi' Bapa'!”

YOHANES 5:13

Mingka tanaassengai anjo tau le'baka niballei angkana inai anjo tau le'baka amballei. Nasaba' a'lampami Isa battu ri alla'na anjo tau jaia.

LAMPA-LAMPANA 19:12

Ebara'na, punna nierang passapunna yareka passikko' aya' le'baka napake Paulus mae ri tau garringa, akkullemi a'jari baji' taua, yareka assulu'mi roh ja'dalaka ri kalenna ke'nanga.

LAMPA-LAMPANA 5:15

Ba'lalo lanri kammana anjo, nierammi assulu' ri aganga tau garringa rate ri bulekang, yareka nipadongko' ri tappereka, sollanna punna numalo Petrus, kaminang sike'de'na manna taung-taunnaja antabai anjo tau garringa, nakkulle a'jari baji'.

PAOLE 22:12

Papakei rombeng-rombeng ri appaka cappa'na pakeannu.”