LUKAS 5:30 - KITTA' MATANGKASA'

³⁰ Nia'mo siapa are tu Farisi siagang guru-guru agama tena nasannang nyawana anciniki ke'nanga. Nakanamo ke'nanga ri ana'-ana' gurunNa Isa, “Angngapa nusipangnganreang siagang sipangnginungang ngaseng siagang pasingara' simaya kammayatompa tau kodi sipaka?”

LUKAS 5:30 Iomraidhean Croise

YESAYA 65:5

Nakana ke'nanga, ‘Bellako, teako seroi ikambe, saba' ikambe anne tangkasakki' siagang tassa'lakki' battu ri kau ngaseng!’ Tena Kuparrangngi anciniki panggaukanna ke'nanga! A'rinrai larroKu mae ri ke'nanga rapang pepe' tenaya nakkulle mate.

MATIUS 5:46

Nasaba' punna iaji bawang tau angkamaseangako nukamaseang, apa paralluna Nabalasa' Allata'ala anjo panggaukannu? Sai manna parentea angngasseng tonji anggaukangi kammaya anjo?

MATIUS 9:11

Nia'mo siapa are tu Farisi anciniki ke'nanga sipangnganreang. Akkuta'nammi anjo tu Farisia ri ana'-ana' gurunNa Isa angkana, “Apa saba'na naNaagang sipangnganreang gurunnu pasingara' simaya siagang tau kodia sipa'na?”

MARKUS 2:16

Nia'mo siapa are guru-guru agamana tu Farisia anciniki Isa angnganre siagang anjo pasingara' simaya siagang anjo tu nicini' kodia ri tau jaia. Jari akkuta'nammi ke'nanga ri ana'-ana' gurunNa Isa angkana, “Angngapa nasiagang gurunnu anjo pasingara' simaya siagang anjo tu kodi kammaya ngaseng, angnganre?”

MARKUS 7:3

Anjo tu Farisia, kammayatompa sikontu tu Yahudia, sanna' sikali nakatutuina ada'-ada'na tu riolona ke'nanga. Tena nangnganre ke'nanga punna tena nabissai rolong limanna ke'nanga manuru' cara-cara nipattantua.

MARKUS 9:16

Nakanamo Isa ri ana'-ana' gurunNa, “Apa nupa'geakkang siagang anjo guru-guru agamaya?”

LUKAS 18:11

Anjo tu Farisia akkale-kalemi ammenteng nampa appala' doang lalang ri atinna nakana, ‘O, Allata'ala, appala' sukkurukka' mae ri Katte, lanri tena kusangkamma tau maraenga; tena kusangkamma tau angngoaya, tau jekkonga, yareka tau a'gau' bawanga. Appala' sukkurukka', lanri tena kusangkamma anjo pasingara' simaya.

LUKAS 19:7

Nalarro ngasemmo taua anciniki anjo passalaka. Nakanamo ke'nanga, “Pui'! A'lampai a'manaikang ri balla'na tau kodi sipaka!”

LUKAS 5:17

Nia' se're allo, ri wattunna angngajara' Isa, na nia' siapa are tu Farisi siagang guru-guru agama ammempo ampilangngeri. Tu battui ke'nanga ri Yerusalem siagang kota-kota niaka ri Galilea siagang Yudea. Niaki ri KalenNa Isa koasaNa Allata'ala untu' amballei na'jari baji' sikamma tau garringa.

LUKAS 5:21

Sipa'bicarami guru-guru agamaya siagang tu Farisia nakana, “Inai anne taua nabarani kamma anghinai Allata'ala? Inai akkulle ampammopporangi dosaya, pantaranganna Allata'ala?”

LUKAS 7:34

Niaki battu Ana' Ma'rupataua – nangnganre siagang angnginung – na nupakkanai, ‘Cini' sai anjo taua, balalana siagang painunna, aganna pasingara' simaya siagang tu dorakaya.’

LUKAS 7:39

Nacini'na anjo tu Farisi patannaya balla' appakamma anjo bainea, nakanamo lalang ri nyawana, “Punna na'bi anne Taua, tantu Naassengi angkanaya baine apa anjo baine anjamayai; tantu Naassengi angkanaya anjo bainea, baine sanna' jaina dosana!”

LAMPA-LAMPANA 23:9

Kale'bakkanna sanna'mi siricuina ke'nanga. Nia'mo siapa are tu Farisi a'jari guru agamaya ammenteng siagang appa'ngaraya tojeng. Nakanamo ke'nanga, “Situru' panggappana ikambe, anne taua tena salana manna sike'de'! Nasaba' nakulle nia' memang todong roh yareka malaeka' a'bicara mae ri kalenna!”