LUKAS 3:16 - KITTA' MATANGKASA'

¹⁶ Jari nakanamo Yohanes ri ke'nanga, “Inakke je'ne' kupake anje'nekko, mingka nia' labattu tau lompoanganga na inakke. Manna alla'gasia otere' sapatuNa tena todong kusiratang. Iami sallang lanje'nekko siagang RohNa Allata'ala siagang pepe'.

LUKAS 3:16 Iomraidhean Croise

PANGNGEBARANG 1:23

Pilangngeria' punna kupasaileko, na lakupa'nyata bonena atingku, siagang kuajarrangko pangngassengangku.

YESAYA 32:15

Mingka sikalipi pole labattu Allata'ala siagang koasaNa. Na sikamma parang luaraka la'jari koko-koko coppong, sikamma kokoa la'jari sangkamma romang jaina.

YESAYA 4:4

Lanri koasaNa Batara laNaadeli siagang laNatangkasi umma'Na. LaNatangkasi Yerusalem battu ri cera'na sikamma tau nibunoa ri anjo kotaya.

YEHEZKIEL 36:25

Le'baki anjo Kupiracciki mako je'ne' ci'nong, sollannu a'jari tangkasa' battu ri sikontu barhalanu siagang battu ri sikontu anra'massiako.

ZAKHARIA 13:9

Bage talluna mami lasalama'. Siagang anjo ke'nanga laKupakatangkasaki rapang pera' nipakati'noka siagang pepe'. LaKuuji ke'nanga rapang tau angngujia bulaeng. Nampa lappala' doang ke'nanga mae ri Nakke, siagang laKupiali pappala'na ke'nanga. LaKupauangi ke'nanga angkanaya iami ke'nanga ummakKu, nampa ke'nanga lamangaku tongi angkanaya iNakkemi Karaeng Allata'alana ke'nanga.”

MATIUS 3:11

Inakke je'ne' kupake anje'nekko a'jari pammatei angkanaya ma'nassa toba' mako battu ri gau' dosa-dosanu; mingka labattua sallang ri bokoangangku, iami sallang lanje'nekko pepe' siagang RohNa Allata'ala. La'birangangi nainakke. Manna a'jari pabinting sapatuNa tena todong kusiratang.

MATIUS 3:12

Nia'mi pa'dinginga lalang limanNa, eroka Napake antapi sikontu berasaka sa'genna tangkasa'. Sikontu berasaka laNaboliki lalang ri pammolikanna, mingka sikamma awanga laNatunui lalang ri pepe' tenaya nalammari rinrana.”

YOHANES 1:26

Appialimi Yohanes, nakana, “Inakke je'ne' kupake anje'neki taua. Mingka nia' ri tangnga-tangnganu tau tenaya nuassengi.

YOHANES 1:27

Ia battu ri bokoangangku, mingka manna alla'gasiangi passikko' sapatuNa tena todong nakusiratang.”

YOHANES 1:33

Anjo wattua tenapa nakuassengi angkana inai anjo. Mingka nipauamma' ri Allata'ala assuroa' anje'neki taua siagang je'ne' angkana, ‘Punna nucini' manurung RohNa Allata'ala, nampa ammantang irateang se'reang tau, Iaminjo taua lanje'neki taua siagang RohNa Allata'ala.’ ”

YOHANES 7:38

Ri passala'na tau tappaka mae ri Nakke, niaki tattulisi' lalang ri Kittaka angkana, ‘Battu lalang ri atinna assolong je'ne' assarea katallassang.’ ” (

LAMPA-LAMPANA 1:5

Nasaba' je'ne' napake Yohanes anje'nekko, mingka tasalloami anne nulanije'ne' siagang RohNa Allata'ala.”

LAMPA-LAMPANA 10:44

Sitabang a'bicarana ija Petrus, naummi RohNa Allata'ala, nanakoasai sikamma tau allangngerekai anjo kabaraka.

LAMPA-LAMPANA 2:33

Niangka'mi nai' ri empoang kaminang tinggia siagang nisaremi koasa ri Allata'ala, nampa Natarima RohNa Allata'ala, le'baka Napa'janjiang Manggea. Na anne apa nulangngereka siagang nucinika kamma-kamma anne iaminjo RohNa Allata'ala, Napaturunga mae ri kambe.

1 KORINTUS 12:13

Kamma ngaseng tommaki' anjo; ikatte tu Yahudia kammayatompa bansa-bansa maraenga, ikatte nikanaya kalenta ata kammayatompa tau bebasaka, le'ba' ngaseng maki' nije'ne' lalang se're Roh, sollanta nipa'jari se're lalang ri tubuNa Almasi. Sukku' ngaseng tommi le'ba'na nikasia' kakoasanNa anjo Roh se'rea.